Dibadika 9 - MUKANDA WA MYIDI MUKULU

Tshibilu tshia Dipita dia Maweja-Nangila

¹ Mu ngondu wa kumpala wa tshidimu tshivua tshilonda tshidimu tshivua bena Izrayele bapatuka mu Ejipitu Maweja-Nangila kuambila Moshe mu tshipela tshia Sinayi ne:

² — Bena Izrayele nebenze tshibilu tshia Dipita dia Maweja-Nangila amu matuku mabafundile.

³ Nanku, mu matuku dikumi ne anayi a ngondu wa kumpala ewu, dilolu menemene, nenungenzele tshibilu etshi, bilondeshile mikenji yatshi ne bibidilu biatshi.

⁴ Moshe kumanyisha bena Izrayele meyi awu.

⁵ Nanku, matuku dikumi ne anayi a ngondu wa kumpala, dilolu menemene, bena Izrayele kuenza tshibilu tshia Dipita dia Maweja-Nangila mu tshipela tshia Sinayi, bilondeshile muvua mikenji ivua Maweja-Nangila muambile Moshe.

⁶ Kadi bantu bakuabu bavua ne mikiya dituku adi bua bitalu bivuabu balenge. Nanku kabavua mua kuenza tshibilu tshia Dipita dia Maweja-Nangila to. Kuyabu kuebeja Moshe ne Arone.

⁷ Kuambilabu Moshe ne: — Tuetu tudi ne mikiya, bualu tudi balenge bitalu. Kadi katuena mua kulambula Maweja-Nangila milambu mudi bena Izrayele netu bonsu benza bua tshinyi? Bualu mudi dituku difundile tshibilu tshia Dipita dia Maweja-Nangila anyi?

⁸ Moshe kuandamuna ne: — Indilayi, Maweja-Nangila angambile tshinudi mua kuenza.

⁹ Maweja-Nangila kuambila Moshe

¹⁰ bua kumanyisha bena Izrayele ne: “Bituadije ku lelu, too ne ku ndelanganyi yenu yonsu, pikala bena Izrayele ne mikiya bua tshitalu tshivuabu balenge, nansha bikale ku luendu dituku didibu bangenzela tshibilu tshia Dipita dianyi meme Maweja-Nangila,

¹¹ nebenze amu tshibilu atshi, kadi mu matuku dikumi ne anayi a ngondu muibidi dilolu. Nebadie munyinyi wa muana wa mukoku, ne mampa adi kaayi mela buanga, ne biseki bia bululu.

¹² Munyinyi awu, nebaujikije dituku anu dimue. Kabena mua kuboza mufuba wa mukoku to. Nebalonde amu mikenji ya tshibilu tshia Dipita dia Maweja-Nangila.

¹³ Kadi pikala muntu kayi muye ku luendu, nansha kayi ne mikiya bua tshitalu tshivuaye mulenge, ulengulula tshibilu tshia Dipita dia Maweja-Nangila dituku dimufundile ku bukole, muntu awu mmuena tshibawu. Numumushe munkatshi mua bena Izrayele, bualu kavua musue kulambula Maweja-Nangila milambu pa diba diayi.

¹⁴ Pikala benyi badi munkatshi muenu basue kungenzela tshibilu tshia Dipita dia Maweja-Nangila, batshienze mudi mikenji ne bibidilu biatshi. Bualu mikenji idi anu mushindu umue bua benyi ne bena ditunga.”

Divuba didi dibuikila muaba wa tshijila

¹⁵ Dituku divuabu base nzubu wa tshijila, divuba divua dibuikila ntenta uvua ne mushete wa ndondu. Butuku, divuba adi divua dikenka bu kapia too ne muatshiabu.

¹⁶ Matuku onsu bivua amu nanku: divuba dibuikila nzubu, dikenka bu kapia butuku.

¹⁷ Misangu yonsu ivua divuba adi diumuka pa mutu pa ntenta, bena Izrayele bavua bajula mitanda, bua kuyasa muaba uvuadi dimana.

¹⁸ Nanku, bena Izrayele bavua bajula mitanda, bayasa muaba mukuabu, pavua Maweja-Nangila muambe. Kabavua baya kuasa mitanda muaba mukuabu, pavua divuba dishale kuimana pa nzubu wa tshijila.

¹⁹ Nanku pavua divuba dishale dibuikila muaba wa tshijila matuku a bungi, bena Izrayele kabavua bumuka muaba awu to. Bavua anu bindila diyi dia Maweja-Nangila.

²⁰ Pavua divuba adi dishala dibuikila muaba wa tshijila matuku makese, bena Izrayele bavua bashale muaba awu matuku makese. Nanku bavua bajula mitanda, bayasa tshiakabidi amu ku diyi dia Maweja-Nangila.

²¹ Matuku makuabu divuba divua dishale muaba umue amu butuku bumue, nansha dituku dimue ne butuku bumue. Kadi pavuadi dibanda kulu, bena Izrayele kubanga luendu musangu umue.

²² Pavua divuba adi dishale muaba wa tshijila matuku abidi, ngondu mujima, nansha matuku mapite bungi, bena Izrayele bavua anu basombe, bindile bua divuba dibande.

²³ Nanku, bua bena Izrayele kuasa mitanda, nansha kumuka muaba uvuabu basombe, anu ku diyi dia Maweja-Nangila. Bavua bamuenzela mudimu anu bilondeshile mikenji ivuaye muambile Moshe.