Dibadika 8 - MUKANDA WA MYIDI MUKULU

Tshitekelu tshia miendu

¹ Maweja-Nangila kutuma Moshe,

² bua ambile Arone ne: — Paudi utemesha miendu muanda mutekete, uyiteke bimpe bua itokeshe kumpala kua tshitekelu tshia miendu.

³ Arone kukumbaja bionsu bivua Maweja-Nangila muambile Moshe. Kutekaye miendu ayi bimpe bua kutokeshayi kumpala kua tshitekelu tshia miendu.

⁴ Tshitekelu tshia miendu tshivua tshifula ne tshiamu tshia mpawungi nkayatshi, biangatshile ku dikasa diatshi too ne ku tshilongu tshiatshi tshia ndekelu. Bavua batshienze bilondeshile tshilejilu tshivua Maweja-Nangila muleje Moshe.

Dijidila dia bena Levi

⁵ Maweja-Nangila kuambila Moshe ne:

⁶ “Umbusha bena Levi munkatshi mua bena Izrayele, bua kumusha mikiya idi pambidi pabu.

⁷ Newenze nunku: ubamiamine mayi bua kubakobolola nawu. Pashishe bakungule boya bonsu mubidi mujima, basukule bilamba biabu. Nanku kabakuikala kabidi ne mikiya to.

⁸ Pashishe bena Levi nebafile ngombe mulume pamue ne mulambu wa bukula, busambakaja ne mafuta. Kadi wewe newangate ngombe mulume mukuabu bua mulambu wa kubakobolola nawu.

^9-10 Usangishe bena Izrayele bonsu, wimanyike bena Levi kumpala kuanyi, pabuipi ne ntenta wa kusambakena. Bena Izrayele nebabatenteke bianza.

¹¹ Nanku, Arone neajidile bena Levi, abandambule meme Maweja-Nangila pa muaba wa bena Izrayele bonsu, bua bangenzele mudimu.

¹² Bena Levi nebatenteke bianza pa mutu pa ngombe ibidi bua kuyindambula meme Maweja-Nangila, umue bua mulambu wa kubakobolola nawu, mukuabu bua mulambu wa kuosha.

¹³ Pashishe, wimanyike bena Levi kumpala kua Arone ne bana bende ba balume, bua kubanjidila, bua bikale banyi meme Maweja-Nangila.

¹⁴ Ke muudi ne bua kumusha bena Levi munkatshi mua bena Izrayele bakuabu. Tshisamba tshia bena Levi netshikale tshianyi meme.

¹⁵ Kutuadija dituku adi, bena Levi badi mua kuenza mudimu wabu mu ntenta wa kusambakena. “Nanku Moshe umushe mikiya pambidi pa bena Levi bua kubajidila, bikale banyi meme Maweja-Nangila.

¹⁶ Bualu ndi mubasungule pa muaba wa bena Izrayele bakuabu. Ndi mubangate pa muaba wa bamuanabute ba bena Izrayele.

¹⁷ Bualu, bamuanabute bonsu ba bena Izrayele too ne ku ba bimuna biabu mbanyi meme Maweja-Nangila. Bituadije dituku dimvua mubutule bamuanabute ba bena Ejipitu, ndi muangate bamuanabute ba bena Izrayele bua bikale banyi ba tshijila.

¹⁸ Kadi ndi musungule bena Levi, bua bapingane pa muaba wa bamuanabute bonsu ba bena Izrayele.

¹⁹ Ndi mubapeshe Arone ne bana bende ba balume bua babambuluishe mu dina dia bena Izrayele bakuabu bonsu. Nebenze mudimu mu ntenta wa kusambakena pa muaba wa bena Izrayele bonsu, bua kukobolola bena Izrayele. Nanku tshiakuikala kabidi ne tshilumbu tshia kunyoka bena Izrayele badi basemena pabuipi ne muaba wa tshijila to.”

²⁰ Moshe ne Arone pamue ne bena Izrayele bonsu, kukumbaja bimpe bionsu bivua Mvidi Mukulu muambe bua kuenzela bena Levi.

²¹ Bena Levi kudilongolola, kumusha mikiya yabu, kusukula bilamba biabu. Pashishe, Arone kubajidila bua bikale bantu ba Maweja-Nangila. Kubakobololaye bua kumusha mikiya.

²² Nanku Moshe kuenza bionsu bivua Maweja-Nangila mumuambile bua kuenzela bena Levi. Ke bena Levi kutuadija mudimu mu ntenta wa kusambakena. Arone ne bana bende ba balume ke bavua babalombola.

²³ Maweja-Nangila kuambila kabidi Moshe ne:

²⁴ — Padi bena Levi bakumbaja bidimu makumi abidi ne bitanu, ubateke bua bangenzele mudimu mu ntenta wa kusambakena.

²⁵ Kadi pakumbajabu bidimu makumi atanu, mudimu wabu udi ujika.

²⁶ Kadi nebashale bua kuambuluisha bana babu batshidi ku mudimu. Ke mudi bena Levi mua kungenzela mudimu nanku.