Dibadika 7 - MUKANDA WA MYIDI MUKULU

Milambu ya kujidila nayi nzubu wa tshijila

¹ Moshe mumane kuasa nzubu wa tshijila mujikije, kujidilaye nzubu awu kabidi ne bintu bionsu bivua mu nzubu pa kubilaba manyi. Kujidilaye kabidi tshilambuilu ne bintu bionsu bivuaku, kubilabaye manyi.

² Diba adi bamfumu ba bisamba bia bena Izrayele bavua balombola dibadika dia bantu, kufika ne milambu yabu.

³ Kuimanyikabu milambu yabu kumpala kua Maweja-Nangila: Matempu asambombu mabuikila tshilamba, ne ngombe dikumi ne ibidi. Ditempu dionsu divua mulambu bua bamfumu babidi, ngombe yonsu uvua mulambu bua mfumu umue. Bamfumu kufika ne milambu ayi kumpala kua nzubu wa tshijila.

⁴ Maweja-Nangila kuambila Moshe ne:

⁵ — Wangate milambu yabu. Matempu ne ngombe ebi, nebakuate nabi mudimu bua ntenta wa kusambakena. Ubifile kudi bena Levi bilondeshile midimu idibu nayi.

⁶ Nanku, Moshe kuangata matempu ne ngombe, kubiabanyina bena Levi.

⁷ Kupeshaye bena Ngershone matempu abidi ne ngombe inayi, bua bibambuluishe mu mudimu udibu nawu.

⁸ Kupeshaye kabidi bena Merari, matempu anayi ne ngomba muanda mukulu, bua mudimu udibu benza ku bulombodi bua Itamare, muana wa Arone.

⁹ Kadi kena mupeshe bena Kekate tshintu to. Bualu bobu bavua ne bua kulama bimpe bintu bia tshijila, kubiambula pa makaya.

Milambu ya kujidila nayi tshilambuilu

¹⁰ Dituku dia kujidila tshilambuilu, kutshilaba manyi, bamfumu ba bena Izrayele kufika kabidi ne milambu, kuya nayi kumpala kua tshilambuilu.

¹¹ Maweja-Nangila kuambila Moshe ne: — Bamfumu kabena mua kufika bonsu musangu umue to. Dituku dionsu mfumu umue afile milambu yende bua kujidila tshilambuilu.

^12-83 Bamfumu kufika, balondangane mushindu ewu: Dituku dia kumpala: Nashone, muana wa Aminadabe, wa mu tshisamba tshia bena Yuda. Dituku dibidi: Netaneyele, muana wa Shuware, wa mu tshisamba tshia bena Isakare. Dituku disatu: Eliyabe, muana wa Elone, wa mu tshisamba tshia bena Zebulone. Dituku dinayi: Elishure, muana wa Shedeyure, wa mu tshisamba tshia bena Rubene. Dituku ditanu: Shelumiyele, muana wa Surishadayi, wa mu tshisamba tshia bena Shimeyone. Dituku disambombu: Eliyasafe, muana wa Deyuwele, wa mu tshisamba tshia bena Ngade. Dituku dia muanda mutekete: Elishama, muana wa Amikude, wa mu tshisamba tshia bena Efrayime. Dituku dia muanda mukulu: Ngameliyele, muana wa Pedashure, wa mu tshisamba tshia bena Menashe. Dituku dia tshitema: Abidane, muana wa Ngideyoni, wa mu tshisamba tshia bena Binyamine. Dituku dia dikumi: Akiyezere, muana wa Amishadayi, wa mu tshisamba tshia bena Dane. Dituku dia dikumi ne dimue: Pagiyele, muana wa Okrane, wa mu tshisamba tshia bena Ashere. Dituku dia dikumi ne dibidi: Akira, muana wa Eyinane, wa mu tshisamba tshia Naftali. Milambu ivua mfumu yonsu mufila ivua nunku: — Dilongu disalame dia tshiamu tshitoke tshia mushinga mukole, dikale ne bujitu bua grame 1.300, ne dilongu diondoke dia tshiamu tshitoke tshia mushinga mukole, dikale dia bujitu bua grame 700, bilondeshile tshipimu tshidi muaba wa tshijila (malongu abidi aa, avua ne bukula busambakaja ne mafuta bua mulambu wa bintu bia mu madimi). — Dikopu dimue dia tshiamu tshia mpawungi dia bujitu bua grame 100, diwule ne manananshi a kuosha. — Ngombe mulume umue, mukoku wa tshimpanga umue ne muana wa mukoku umue wa tshidimu tshimue bua milambu ya kuosha. — Mbuji wa mpumbu umue bua mulambu wa dikobolola bantu. — Ngombe ibidi, mikoku ya bimpanga itanu, mbuji ya mpumbu itanu ne bana ba mikoku batanu badi bakumbaja tshidimu tshimue, bua milambu ya bobumue.

⁸⁴ Milambu yonsu ivuabu balambula kudi bamfumu aba dituku divuabu bajidile tshilambuilu idi nunku: malongu masalame dikumi ne abidi a tshiamu tshitoke tshia mushinga mukole, malongu mondoke dikumi ne abidi a tshiamu tshitoke tshia mushinga mukole a kumyamina mayi, makopu dikumi ne abidi a tshiamu tshia mpawungi.

⁸⁵ Dilongu dionsu disalame, divua ne bujitu bua grame 1.300. Dilongu dionsu diondoke divua ne bujitu bua grame 700. Tshiamu tshitoke tshia mushinga mukole tshia malongu onsu atshi tshivua tshia bujitu bua Kilo 24, bilondeshile tshipimu tshidi muaba wa tshijila.

⁸⁶ Dikopu dimue dia tshiamu tshia mpawungi divua dia bujitu bua grame 100. Nanku, makopu onsu dikumi ne abidi avua ne bujitu bua grame 1.200. Avua muwule ne manananshi tente.

⁸⁷ Muvua kabidi ngombe milume dikumi ne ibidi, mikoku ya bimpanga dikumi ne ibidi, bana ba mikoku dikumi ne babidi ba tshidimu tshimue, bua milambu ya kuosha (pamue ne milambu ya bintu bia mu madimi ya kulambula pamue ne nyama). Muvua kabidi mbuji ya mpumbu dikumi ne ibidi bua milambu ya kukobolola nayi bantu,

⁸⁸ ngombe milume makumi abidi ne inayi, mikoku ya bimpanga makumi asambombu, mbuji ya mpumbu makumi asambombu ne bana ba mikoku makumi asambombu ba tshidimu tshimue, bua milambu ya bobumue. Ke milambu ivua bamfumu ba bena Izrayele bafile bua kujidila tshilambuilu, batuangaji bamane kutshilaba manyi.

⁸⁹ Pavua Moshe ubuela mu ntenta wa kusambakena bua kuyukila ne Maweja-Nangila, uvua umvua diyi dia Maweja-Nangila, difumina pankatshi pa Bakerubine babidi, bavua pa tshibuikidiji tshia mushete wa ndondu. Diba adi Maweja-Nangila uvua uyukila ne Moshe.