Dibadika 36 - MUKANDA WA MYIDI MUKULU

Dibaka dia bakaji badi mua kupiana

¹ Bamfumu ba ku ndelanganyi ya Yozefe ba mu diku dia Ngilaade, muana wa Makire, uvua kabidi muikulu wa Menashe, kuya kudi Moshe ne bamfumu bakuabu ba bisamba bia bena Izrayele.

² Kubambilabu ne: — Maweja-Nangila uvua muambile Moshe bua atshinke ditunga dia Kenaane, adiabanyine bisamba bionsu bia bena Izrayele. Uvua mumuambile kabidi bua buloba bua muanetu Selofade, babupiane kudi bana bende ba bakaji.

³ Pikala muntu mulume wa tshisamba tshikuabu musele bana abu, nebumushe tshitupa tshia buloba buetu bua kubusangisha ne buloba bua tshisamba tshiabu tshipiatshipia. Nanku muaba uvuabu batshinke bua kutupesha neukepele.

⁴ Kabidi tshidimu tshia disanka dinene, tshitupa tshia buloba buetu atshi, netshiumuke kutudi kashidi, tshishale tshia tshisamba tshiabu tshipiatshipia.

⁵ Moshe kumanyisha bena Izrayele bivua Maweja-Nangila mumuambile ne: — Ndelanganyi ya Yozefe idi yamba bualu bulelela.

⁶ Nanku Maweja-Nangila udi wamba ne: Badi mua kusela bana ba bakaji ba Selofade kudi muntu yonsu. Kadi mulume awu ikale anu wa mu diku dia batatuabu.

⁷ Maloba a bena Izrayele, kabena mua kuangata lelu kudi bena tshisamba kampande, maloba kudi bena tshisamba tshikuabu nansha. Muena Izrayele yonsu neasombe amu mu tshitupa tshia buloba tshia tshisamba tshiabu.

⁸ Nanku pikala mukaji ne wende muaba wa bupianyi mu tshisamba tshiabu, nebamusele anu kudi mulume wa mu tshisamba tshia batatuende atshi. Tshisamba tshionsu tshia bena Izrayele netshilame buloba buvuabu bapete kudi bankambua babu.

⁹ Maloba a bena Izrayele kabena mua kuangata tshiangatangata to. Tshisamba tshionsu tshia bena Izrayele netshilame buloba buabu bimpe.

¹⁰ Bana ba bakaji ba Selofade kuitaba diyi dia Maweja-Nangila divuaye muambile Moshe.

¹¹ Kuselabu Mala, Tirsa, Ogla, Milka ne Nowa kudi bana ba batatuabu bakuabu,

¹² nanku kudi bantu ba ku ndelanganyi ya Menashe, muana wa Yozefe. Ke muvua maloba avuabu bapiane ashale mu tshisamba tshia tatuabu.

¹³ Mikenji eyi, ke ivua Maweja-Nangila muambile Moshe bua kumanyisha bena Izrayele, bavua mu mpata ya Mowabe, dishiya dia musulu wa Yardene, mitangilangane ne Yeriko.