Dibadika 34 - MUKANDA WA MYIDI MUKULU

Mikalu ya ditunga dia Kenaane

¹ Maweja-Nangila kuambila Moshe

² bua kumanyisha bena Izrayele ne: — Panuafika mu ditunga dia Kenaane, dindi mumane kunupesha, mikalu yadi idi mushindu ewu:

³ “Kuinshi kua ditunga, mukalu wenu newikale tshipela tshia Tsine, ne ditunga dia bena Edome. Ku luseke ludi diba dipatukila mukalu wenu neubange kuinshi menemene kua Mayi manene a luepu.

⁴ Mukalu awu udi upitshila kuinshi kua mukuna wa Akrabime, too ne mu tshipela tshia Tsine, bua kufika kuinshi kua Kadeshe-Barneya, pashishe upitshila ku Ashare-Adare ne ku Ashimone.

⁵ Pashishe mukalu wenu neubende mu Ashimone, bua kufika ku musulu wa mu Ejipitu, ushiki la ku Mayi manene a pankatshi pa matunga.

⁶ “Ku luseke ludi diba dibuelela, mukalu wenu newikale Mayi manene a pankatshi pa matunga.

⁷ “Ku mutu kua ditunga dia Kenaane, mukalu wa ditunga dienu newikale pankatshi pa Mayi manene a pankatshi pa matunga, ne mukuna wa Ore.

⁸ Mukalu awu udi umuka ku mukuna wa Ore, upitshila ku Lebo-Amate ne ku Sedade.

⁹ Pashishe mukalu awu udi upitshila ku Zifrone, ushikidila mu Ashare-Enane. Ke mukalu wenu wa ku mutu wa ditunga.

¹⁰ “Ku luseke ludi diba dipatukila, mukalu wa ditunga dienu wikale utuadija ku Ashare-Enane, uya ku Shefame.

¹¹ Mukalu ewu neutungunuke too ne ku Ribla, luseke ludi diba dipatukila lua Ayine. Pashishe mukalu awu neuye kumpala ufika ku bibandabanda bidi luseke ludi diba dipatukila lua dijiba dia Ngenesarete,

¹² too ne ku musulu wa Yardene, bua kushikidila ku Mayi manene a luepu. “Ke muikala mikalu ya ditunga dienu nanku.”

¹³ Moshe kuambila bena Izrayele mikenji eyi. Pashishe kubambilaye kabidi ne: — Ditunga edi ke didi Maweja-Nangila muambe bua tutshinke, tuabanyine bisamba tshitema bia bena Izrayele, ne tshitupa tshia tshisamba tshia bena Menashe.

¹⁴ Bualu bena diku dia Rubene ne dia Ngade, ne tshia bibidi tshimue tshia tshisamba tshia bena Menashe, bakadi bamane kupeta wabu muaba.

¹⁵ Bisamba ebi bibidi ne tshitupa, nebisombe dishiya dia musulu wa Yardene, luseke luawu ludi diba dipatukila, batangilangane ne Yeriko.

Badi babanyina bisamba ditunga

¹⁶ Maweja-Nangila kuambila Moshe ne:

¹⁷ — Mutuangaji Elazare ne Yoshuwa, muana wa Nune, nebabanyine bantu ditunga edi.

¹⁸ Kadi bua kubapepejila mudimu ewu, ubapeshe mfumu umue ku tshisamba tshionsu,

¹⁹ bilondangane mushindu ewu: Kalebe, muana wa Yefune, wa mu tshisamba tshia bena Yuda;

²⁰ Yemuyele, muana wa Amikude, wa mu tshisamba tshia bena Shimeyone;

²¹ Elidade, muana wa Kislone, wa mu tshisamba tshia bena Binyamine;

²² Buki, muana wa Yogli, wa mu tshisamba tshia bena Dane;

²³ Aniyele, muana wa Efode, wa mu tshisamba tshia bena Menashe, muana wa Yozefe;

²⁴ Kemuyele, muana wa Shiftane, wa mu tshisamba tshia bena Efrayime, muana wa Yozefe;

²⁵ Elishafane, muana wa Pamake, wa mu tshisamba tshia bena Zebulone;

²⁶ Paltiyele, muana wa Azane, wa mu tshisamba tshia bena Isakare;

²⁷ Ahihude, muana wa Shelomi, wa mu tshisamba tshia bena Ashere;

²⁸ Pedahele, muana wa Amikude, wa mu tshisamba tshia bena Naftali.

²⁹ Bantu aba, ke bavua Maweja-Nangila musungule bua kuabanyinabu bena Izrayele ditunga dia Kenaane.