Dibadika 29 - MUKANDA WA MYIDI MUKULU

f. Ya dituku dia Tshidimu tshipiatshipia

¹ “Dituku dia kumpala dia ngondu wa muanda mutekete, kanuenji mudimu to. Nudisangishe bua kuntendelela meme Maweja-Nangila, bualu ndituku dia kuntumbisha.

² Dituku adi, nungoshile ngombe mulume umue, mukoku wa tshimpanga umue, ne bana ba mikoku muanda mutekete, badi bamane kukumbaja tshidimu tshijima. Bimuma ebi bionsu, kabikadi ne bulema to. Dipembu dimpe diabi nedinsankishe.

³ Ku tshimuna tshionsu, nusakidile bukula busambakaja ne mafuta. Ku ngombe mulume, nusakidile bukula kilo tshitema, ku mukoku wa tshimpanga, bukula kilo isambombu,

⁴ ku muana wa mukoku yonsu, bukula kilo isatu.

⁵ Pashishe, nundambule kabidi mbuji wa mpumbu, bua mulambu wa kunukobolola nawu.

⁶ Nuenu bamane kungoshila milambu ya dituku dionsu, ne ya dituku dia kumpala kua ngondu, pamue ne milambu ya tshibidilu ya bukula ne ya maluvu a mvinyo, nenundambule kabidi milambu yonsu eyi, bua dipembu dimpe dia milambu ya kuosha eyi dinsankishe.

g. Ya dituku dinene dia Kukobolola bantu

⁷ “Matuku dikumi a ngondu wa muanda mutekete, kanuenji mudimu, nujile biakudia. Nudisangishe bua kuntendelela meme Maweja-Nangila.

⁸ Dituku adi, nungoshile ngombe mulume umue, mukoku wa tshimpanga umue, ne bana ba mikoku muanda mutekete, badi bamane kukumbaja tshidimu tshijima, bishile. Bimuna bionsu abi kabikadi ne bulema pambidi to. Dipembu diabi nedinsankishe.

⁹ Ku tshimuna tshionsu, nusakidile bukula busambakaja ne mafuta. Ku ngombe mulume, nusakidile bukula kilo tshitema, ku mukoku wa tshimpanga, bukula kilo isambombu,

¹⁰ ku muana wa mukoku yonsu, bukula kilo isatu.

¹¹ Pashishe, nundambule kabidi mbuji wa mpumbu, bua mulambu wa kunukobolola nawu. Milambu yonsu eyi, nuyilambule pamue ne mulambu wa kunukobolola nawu wa dituku adi, kabidi ne mulambu wa kuosha wa ku dituku dionsu, kabidi ne mulambu wa bukula ne wa maluvu a mvinyo. Bualu ke dituku dinene dia kukobolola bantu.

h. Ya tshibilu tshia Tuzubu tua Bisasa

¹² “Matuku dikumi ne atanu a ngondu wa muanda mutekete, kanuenji mudimu to. Nungenzele tshibilu matuku muanda mutekete, nudisangishe bua kuntendelela meme Maweja-Nangila.

¹³ Dituku dia kumpala dia tshibilu atshi, nungoshile ngombe milume dikumi ne isatu, mikoku ya tshimpanga ibidi, ne bana ba mikoku dikumi ne banayi, badi bamane kukumbaja tshidimu tshijima, bishile. Bimuma bionsu ebi kabikadi ne bulema pambidi to. Dipembu diayi nedinsankishe.

¹⁴ Ku tshimuna tshionsu, nusakidile bukula busambaja ne mafuta. Ku ngombe mulume yonsu, nusakidile bukula kilo tshitema, ku mukoku wa tshimpanga, bukula kilo isambombu,

¹⁵ ku muana wa mukoku yonsu, bukula kilo isatu.

¹⁶ Pashishe, nundambule kabidi mbuji wa mpumbu, bua mulambu wa kunukobolola nawu. Milambu yonsu eyi, nuyilambule pamue ne mulambu wa ku dituku dionsu, ne milambu ya bukula, ne ya maluvu a mvinyo.

^17-34 “Biangatshile ku dituku dibidi too ne dia muanda mutekete, nundambule dituku dionsu bimuna bidi kabiyi ne bulema pambidi, pamue ne milambu mikuabu. Nusakidile milambu eyi ku mulambu wa kuosha wa ku dituku dionsu: Dituku dibidi: nundambule ngombe dikumi ne ibidi, mikoku ya tshimpanga ibidi, bana ba mikoku dikumi ne banayi, badi bamane kukumbaja tshidimu tshijimu, kabidi ne mbuji wa mpumbu umue. Dituku disatu: nundambule ngombe milume dikumi ne umue, mikoku ya bimpanga ibidi, bana ba mikoku dikumi ne banayi, badi bamane kukumbaja tshidimu tshijima, kabidi ne mbuji wa mpumbu umue. Dituku dinayi: nundambule ngombe milume dikumi, mikoku ya bimpanga ibidi, bana ba mikoku dikumi ne banayi, badi bamane kukumbaja tshidimu tshijima, kabidi ne mbuji wa mpumbu umue. Dituku ditanu: nundambule ngombe milume tshitema, mikoku ya bimpanga ibidi, bana ba mikoku dikumi ne banayi, badi bamane kukumbaja tshidimu tshijima, kabidi ne mbuji wa mpumbu umue. Dituku disambombu: nundambule ngombe milume muanda mukulu, mikoku ya bimpanga ibidi, bana ba mikoku dikumi ne banayi, badi bamane kukumbaja tshidimu tshijima, kabidi ne mbuji wa mpumbu umue. Dituku dia muanda mutekete: nundambule ngombe milume muanda mutekete, mikoku ya bimpanga ibidi, bana ba mikoku dikumi ne banayi, badi bamane kukumbaja tshidimu tshijima, kabidi ne mbuji wa mpumbu umue.

³⁵ “Kadi dituku dia muanda mukulu, dia tshibilu, ndituku dia kudisangisha musangu wa ndekelu. Dituku adi kanuenji mudimu.

³⁶ Nundambule ngombe mulume umue, mukoku wa tshimpanga umue, ne bana ba mikoku muanda mutekete, badi bamane kukumbaja tshidimu tshijima, bishile. Bimuna bionsu ebi kabikadi ne bulema pambidi to. Dipembu dimpe dia nyama eyi nedinsankishe.

³⁷ Ku tshimuna tshionsu nenusakidile mulambu wa bukula, ne wa maluvu a mvinyo bu tshibidilu.

³⁸ Pashishe nundambule kabidi mbuji wa mpumbu, bua mulambu wa kunukobolola nawu. Milambu eyi, nuyilambule pamue ne mulambu wa kuosha wa ku dituku dionsu, kabidi ne mulambu wa bukula, ne maluvu a mvinyo wa ku dituku ku dituku.

³⁹ “Ke milambu inudi mua kundambula meme Maweja-Nangila matuku a bibilu. Nenuyisakidile ku milambu ya kuosha, ku milambu ya bukula, ne ya maluvu a mvinyo, ku milambu ya bobumue, inudi nulambula ku budisuile buenu, nansha bua bualu bunuvua balaye.”