Dibadika 28 - MUKANDA WA MYIDI MUKULU

Milambu a. Ya ku dituku ku dituku

¹ Maweja-Nangila kuambila Moshe

² bua kumanyisha bena Izrayele ne: “Nulambule Maweja-Nangila milambu yenu pa diba, milambu ya kuosha bua dipembu diayi dimusankishe.

³ “Dituku dionsu nungoshile bana ba mikoku babidi ba tshidimu tshimue, kabayi ne bulema pambidi. Matuku onsu nenundambule milambu ya kuosha ayi mu bujima buayi.

⁴ Nungoshile mukoku umue dinda, mukuabu dilolu.

⁵ Nundambule kabidi kilo ya bukula isatu, busambakaja ne mafuta litre umue ne tshitupa.

⁶ Matuku onsu, nundambule mulambu wa kuosha mushindu umue ne mulambu unuvua bangoshile ku mukuna wa Sinayi, bua dipembu diawu dinsankishe.

⁷ Dinda nulambule muana wa mukoku muaba wa tshijila, pamue ne litre wa mvinyo umue ne tshitupa.

⁸ Muana wa mukoku udi mushale, uundambule dilolu, padi diba dibuela, pamue ne bintu binuvua basakidile dinda. Nanku dipembu dia mulambu wa kuosha awu nedinsankishe.

b. Ya Dituku dia Dikisha

⁹ “Dituku dia Dikisha, nundambule bana ba mikoku babidi, badi bamane kukumbaja tshidimu tshimue, kabayi bulema pambidi to. Nusakidile kabidi kilo isambombu ya bukula, busambakaja ne mafuta, kabidi ne maluvu a mvinyo.

¹⁰ Nanku dituku dia Dikisha dionsu nundambule mulambu wa kuosha ewu, pamue ne mulambu wa nyama ne wa mvinyo wa ku dituku ku dituku.

c. Ya dituku dia kumpala dia ngondu

¹¹ “Dituku dia kumpala dia ngondu yonsu, nungoshile meme Maweja-Nangila ngombe milume ibidi, mukoku wa tshimpanga, ne bana ba mikoku muanda mutekete, badi bamane kukumbaja tshidimu tshijima. Bimuna bionsu abi, kabikadi ne bulema pambidi to.

¹² Ku tshimuna tshionsu, nenusakidile mulambu wa bukula, busambakaja ne mafuta: ku ngombe yonsu, nenusakidile bukula kilo tshitema, ku mukoku wa tshimpanga, bukula kilo isambombu,

¹³ ku muana wa mukoku yonsu, bukula kilo isatu. Nanku dipembu dia milambu ya kuosha eyi, nedisankishe Maweja-Nangila.

¹⁴ Ku mulambu wa ngombe yonsu, nenusakidile mulambu wa maluvu a mvinyo litre isatu, ku mukoku wa tshimpanga, mvinyo litre ibidi, ku wa muana wa mukoku, mvinyo litre umue ne tshitupa. Ke milambu inudi ne bua kundambula mu ntuadijila wa ngondu yonsu.

¹⁵ Nuenu bamane kundambula mulambu wa kuosha wa ku dituku dionsu, ne wa maluvu a mvinyo, nenundambule kabidi mbuji wa mpumbu bua mulambu wa kunukobolola nawu.

d. Ya dituku dia Dipita dia Maweja-Nangila

¹⁶ “Matuku dikumi ne anayi a ngondu wa kumpala wa tshidimu tshionsu, nuenze tshibilu tshia Dipita dia Maweja-Nangila bua kumutumbisha.

¹⁷ Matuku dikumi ne atanu a ngondu awu, nutuadije tshibilu tshia matuku muanda mutekete, anudi nudia mampa adi kaayi mela buanga.

¹⁸ Dituku dia kumpala dia tshibilu atshi, kanuenji mudimu to. Nudisangishe bua kuntendelela meme Maweja-Nangila.

¹⁹ Nungoshile ngombe milume ibidi, mukoku wa tshimpanga umue, ne bana ba mikoku muanda mutekete, badi bamane kukumbaja tshidimu tshijima, nyama ayi ishile. Bimuna bionsu abi, kabikadi ne bulema pambidi to.

²⁰ Ku tshimuna tshionsu, nusakidile bukula busambakaja ne mafuta: ku ngombe yonsu, nusakidile bukula kilo tshitema, ku mukoku wa tshimpanga, bukula kilo isambombu,

²¹ ku muana wa mukoku yonsu, bukula kilo isatu.

²² Pashishe nundambule kabidi mbuji wa mpumbu, bua mulambu wa kunukobolola, bua mibi yenu ijimine.

²³ Ke milambu inudi nusakidila ku milambu ya kuosha inudi nundambula dituku dionsu.

²⁴ Panudi nuenza tshibilu tshia matuku muanda mutekete, dituku dionsu nungoshile nyama, pamue ne mulambu wa ku dituku ku dituku, ne mulambu wa mvinyo. Dipembu diayi nedinsankishe.

²⁵ Kadi dituku dia muanda mutekete kabidi, kanuenji mudimu to. Nudisangishe bua kuntendelela.

e. Ya dituku dia Tshibilu tshia kunowa bia tshianyi

²⁶ “Dituku dia tshibilu tshia kunowa Biatshianyi, panudi nundambula meme Maweja-Nangila biakudia bia tshianyi bia mu madimi enu, kanuenji mudimu to. Nudisangishe bua kuntendelela.

²⁷ Nundambule ngombe milume ibidi, mukoku wa tshimpanga umue, ne bana ba mikoku muanda mutekete, badi bamane kukumbaja tshidimu tshijima. Nanku nuoshe nyama ayi, ishile, bua dipembu diayi dinsankishe.

²⁸ Ku tshimuna tshionsu, nusakidile bukula busambakaja ne mafuta: ku ngombe yonsu, nusakidile bukula kilo tshitema, ku mukoku wa tshimpanga, bukula kilo isambombu,

²⁹ ku muana wa mukoku yonsu, bukula kilo isatu.

³⁰ Nusakidile kabidi mbuji wa mpumbu, bua mulambu wa kunukobolola nawu.

³¹ Nuenu bamane kundambula milambu ya kuosha ya ku dituku dionsu ne ya bia mu madimi enu, nenusakidile milambu yonsu eyi ya nyama, idi kayiyi ne bulema pambidi, pamue ne milambu ya maluvu a mvinyo, inudi ne bua kusakidila kabidi.