Dibadika 25 - MUKANDA WA MYIDI MUKULU

Bena Izrayele badi batendelela mvidie

¹ Bena Izrayele kusomba mu Shitime. Muaba awu kutuadijabu kuenda buendenda ne bakaji ba bena Mowabe.

² Bakaji abu kuibidija bena Izrayele bua kulambuila mvidie ya mu ditunga diabu. Bena Izrayele kudia nabu minyinyi milambuila mvidie, kukukuila ne mvidie yabu mene.

³ Kumvuanganabu nangananga bua kutendelela mvidie wa Baale, uvua ku mukuna wa Peyore. Maweja-Nangila kubafikila munda bikole.

⁴ Kuambilaye Moshe ne: — Owe kumpala kuanyi bamfumu ba bena Izrayele bonsu, batangile diba, bua kujikija tshiiji tshianyi. Bualu mvua munufikile munda.

⁵ Moshe kuambila bamfumu ba bena Izrayele ne: — Mfumu yonsu ashipe bantu bende badi batendelela mvidie wa Baale, udi ku mukuna wa Peyore!

⁶ Pavua Moshe ne bena Izrayele bonsu basangile, basengelela Mvidi Mukulu ku mushiku wa ntenta wa kusambakena, kumonabu muena Izrayele mukuabu ufika mu ntenta wa bana babu, ne mukaji wa bena Madiyane.

⁷ Mutuangaji Pinhase, muana wa Elazare, muikale kabidi muikulu wa Arone, kujuka munkatshi mua bena Izrayele ne difuma ku bianza.

⁸ Kulondakajaye muena Izrayele awu, ne mukaji uvuaye nende wa bena Madiyane, mu ntenta, kubashipa bonsu babidi, kubasompola ne difuma. Nanku tshipupu tshivua tshikuate bena Izrayele kujikatshi.

⁹ Bena Izrayele bakavua bafue ku tshipupu atshi binunu makumi abidi ne binayi.

¹⁰ Maweja-Nangila kuambila Moshe ne:

¹¹ — Tshiiji tshianyi tshiajiki. Mutuangaji Pinhase, muana wa Elazare, muikale kabidi muikulu wa Arone, mmumane kunyoka bena Izrayele ne tshiiji, mumvua mua kuenza meme. Tshianana, mvua mua kubabutula, bualu meme nkayanyi ndi Mvidi Mukulu wabu.

¹² Mpindiewu, ambila Pinhase ne: ndi ntua nende ndondu, udi umupetesha bupole.

¹³ Ndondu awu udi bualu buende ne bua ndelanganyi yende, udi ubenza batuangaji bua kashidi. Pinhase wandeji mudiye mundamate, meme Mvidi Mukulu wende, muende muonsu. Ke pandi mufuile bena Izrayele bonsu luse mu dina diende.

¹⁴ Muena Izrayele uvuabu bashipe pamue ne mukaji wa bena Madiyane awu, uvua Zimri, muana wa Salu, umue wa ku bakulu ba diku dia bena Shimeyone.

¹⁵ Kadi mukaji wa bena Madiyane awu, uvua Kozbi, muana wa Sure. Tatuende uvua mfumu wa meku mashilangane a bena Madiyane.

¹⁶ Maweja-Nangila kuambila Moshe ne:

¹⁷ — Ndaku, uluishe bena Madiyane, ubabutule bonsu.

¹⁸ Bavua banuenzela bibi ne muoyi wa lukinu, mu tshilumbu tshia ku Peyore ne mu tshia Kozbi, muana wa mfumu wa bena Madiyane, ufuile mu tshipupu tshivua tshienzeka bua ditendelela dia mvidie wa ku Peyore.

Badi babadika bena Izrayele musangu muibidi

¹⁹ Tshipupu atshi tshimane kupita,