Dibadika 22 - MUKANDA WA MYIDI MUKULU

BENA IZRAYELE MU MPATA YA MOWABE Balake udi ubikila Balaame

¹ Bena Izrayele kuya kuasa mitanda yabu mu mpata ya Mowabe, ku muelelu wa musulu wa Yardene, luseke luawu lua kudi diba dipatukila, muaba uvua mutangilangane ne Yeriko.

² Balake, muana wa Sipore, mukalenga wa bena Mowabe mu tshikondu atshi, kumvua bionsu bivua bena Izrayele benzele bena Amore.

³ Nanku Balake ne bantu bende kutshina bikole, bualu bavua bumvue ne: bena Izrayele mbafike muaba ewu bapite bungi.

⁴ Ke bena Mowabe kuambila bakulu ba bena Madiyane ne: — Bantu aba bungi nenku badi mua kutuvinga, bu mudi ngombe idia bisosa bionsu.

⁵ Ke mukalenga Balake kutuma bantu kudi Balaame, muana wa Beyore, uvua musombe ku Petore pabuipi ne musulu wa Perate, mu ditunga dia bena Amavi. Uvua umulomba ne: “Mudi bantu ba bungi bafike munemu, bafume ku Ejipitu. Badi batangalaka pa buloba bujima, base mitanda yabu pabuipi nanyi.

⁶ Ndi nkusengelela ne: ufike kuneku, ubatshipe. Bualu mbatupite bukole! Wewe mubatshipe, misangu mikuabu ndi mua kubatshimuna, kubipata mu ditunga. Meme ndi mujadike ne: wewe muele muntu lupemba, nansha mumutshipe, bidi bienzeka anu muudi muambe.”

⁷ Bakulu ba bena Mowabe ne ba bena Madiyane bavuabu batume, kuangata bintu bia kufuta nabi muambi. Kuyabu kumonangana ne Balaame, bamuambila mikenji ya kudi mukalenga Balake.

⁸ Balaame kubambila ne: — Lalayi munemu. Patshiabu dinda, nennuandamune malu onsu adi Maweja-Nangila mummanyishe. Bakulu ba bena Mowabe abu kulala kua Balaame.

⁹ Nanku Mvidi Mukulu kukonka Balaame ne: — Bantu baudi muladike kuebe mbanganyi?

¹⁰ Balaame kuandamuna ne: — Bantu aba mbafume kudi Balake, muana wa Sipore, mukalenga wa bena Mowabe. Balake udi umbikila, ungambila ne:

¹¹ “Ndi nkusengelela ne: ufike kuneku, utshipe bantu badi bumuke ku Ejipitu, batangalake pa buloba bujima. Wewe mubatshipe, misangu mikuabu ndi mua kubatshimuna, kubipata mu ditunga.”

¹² Mvidi Mukulu kubenga, wambila Balaame ne: — Kuyi nabu to! Kuena mua kutshipa bantu aba, bualu ndi mumane kubela lupemba.

¹³ Butshia dinda, Balaame kuambila bantu, bavua Balake mutume, ne: — Pinganayi kuenu, Maweja-Nangila kena musue bua meme kuya nenu to.

¹⁴ Bakulu ba bena Mowabe abu, kupingana kudi Balake, bamuambila ne: “Balaame wabengi.”

¹⁵ Balake kutuma bamfumu bakuabu ba bungi, ba lumu lupite lua ba kumpala.

¹⁶ Kuyabu kuambila Balaame ne: “Balake udi wamba ne: Meme Balake, muana wa Sipore, ndi nkubikila kuneku. Ndi nkusengelela ne: kubengi to.

¹⁷ Ufike kuneku, utshipe bantu aba. Nenkusankishe ne tshintu tshionsu tshiwalomba.”

¹⁸ Balaame kubenga wamba ne: — Balake nansha yeye muntumine tshiamu tshia mpawungi tshionsu, ne tshiamu tshitoke tshia mushinga mukole tshionsu, tshidiye natshi mu nzubu wende wa bukalenga, tshiena mua kubenga diyi dia Maweja-Nangila, Mvidi Mukulu wanyi, ku kalu nansha kamue to.

¹⁹ Kadi nuenu kabidi anji lalayi munemu, bua ngumvue tshidi Maweja-Nangila ungambila.

²⁰ Butuku, Mvidi Mukulu kuambila Balaame ne: — Bu mudi bantu aba bakubikila, mbimpe uye nabu. Kadi wenze anu tshindi meme nkuambila.

²¹ Butshia dinda, Balaame kuela tshiseba pa mpunde mukaji wende, kuya ne bamfumu ba bena Mowabe.

Mpunde wa Balaame

²² Mvidi Mukulu kufikila Balaame munda bua luendu alu. Mutumibue wende kuya kujika Balaame mu njila. Balaame uvua mubande pa nyama wa mpunde. Bena mudimu babidi bavua nende.

²³ Mpunde kumona mutumibue wa Mvidi Mukulu muimane munkatshi mu njila, mukuate muele ku bianza. Mpunde kulekela mu njila, kuyila mu budimi. Balaame kumutuuta bua kumupingaja mu njila.

²⁴ Mutumibue kuimana kabidi mutantshi mu njila mu madimi a mvinyo pankatshi pa bimana bibidi.

²⁵ Mpunde kumona mutumibue wa Maweja-Nangila, kudituuta ku tshimana. Dikasa dia Balaame kutapika. Nanku Balaame kutuuta mpunde tshiakabidi.

²⁶ Mutumibue wa Mvidi Mukulu kupita kabidi kumpala, kuimana muaba uvua mufimpakane bikole eku ne eku. Kamuvua mushindu wa kupita nansha ku dia balume nansha ku dia bakaji.

²⁷ Mpunde umona kabidi mutumibue wa Maweja-Nangila, kulalaye panshi ne mfumuende panyima. Balaame kufika munda bikole, kutuuta mpunde ne dikombu.

²⁸ Nanku Maweja-Nangila kuakuisha mpunde, webeja Balaame ne: — Tshimvua muenze bua wewe kuntuuta misangu isatu ntshinyi?

²⁹ Balaame kuandamuna ne: — Bualu udi untatshisha. Bu meme ne muele, mvua mua kukushipa!

³⁰ Mpunde kuambila Balaame ne: — Meme ndi mpunde webe. Ndi ngendakana nebe matuku onsu! Kadi nkadi mukuenzele nenku musangu mukuabu anyi? Balaame kuamba ne: — To!

³¹ Diba adi Maweja-Nangila kubulula mesu a Balaame, bua amone mutumibue uvua muimane munkatsshi mua njila, ne muele mukuate mu tshianza. Diakamue Balaame kudiela mpala panshi.

³² Mutumibue kuebeja Balaame ne: — Uvua mutuute mpunde webe misangu isatu bua tshinyi? Meme ke udi mujike njila, bualu ndi mumanye ne: luendu luebe elu ludi mua kukufikishisha ku kabutu.

³³ Mpunde uvua mummone. Kumukaye misangu isatu kundi. Bu yeye kayi muenze nanku, mvua mua kukushipa wewe, kumushiya yeye ne muoyi.

³⁴ Balaame kuandamuna mutumibue ne: — Ndi muenze tshilema. Tshivua mumanye ne: wewe ke uvua muimane mu njila kumpala kuanyi. Kadi bu mudi luendu alu kaluyi lukusankisha, ndi mua kupingana kuanyi.

³⁵ Mutumibue kubenga, wamba ne: — Kupinganyi to! Uye anu ne bantu aba. Kadi wambe amu bindi nkuleja. Ke Balaame kuya ne bantu bavua Balake mutume.

Balake udi wakidila Balaame

³⁶ Balake umvua ne: Balaame ukadi pabuipi, kuyaye kumuakidila mu tshimenga tshia Mowabe tshivua ku mikalu menemene ya ditunga adi, ku musulu wa Amone.

³⁷ Balake kukonka Balaame ne: — Meme kukubikila musangu wa kumpala. Uvua mubenge kufika bua tshinyi? Uvua wela meji ne: tshiena mua kukusankisha anyi?

³⁸ Balaame kuandamuna ne: — Mbafiki! Kadi tshiena ne tshia kuamba to! Nenkuambile amu bualu budi Mvidi Mukulu ummanyisha.

³⁹ Balaame ne Balake kuya ku Kiriyate-Ushote.

⁴⁰ Balake kushipa ngombe ne mikoku, kuyilambula. Kutuminaye Balaame ne bavuaye nabu munyinyi wa milambu ayi.

Balaame udi wela bena Izrayele lupemba

⁴¹ Butshia dinda, Balake kuya ne Balaame ku Bamote-Baale, bualu muaba awu uvua mua kudimuena tshitupa tshia bena Izrayele.