Dibadika 20 - MUKANDA WA MYIDI MUKULU

Mayi a Meriba

¹ Mu ngondu wa kumpala, bena Izrayele bonsu kufika mu tshipela tshia Tsine, kusomba mu Kadeshe. Miriyame kufuila muaba awu. Kumujikabu muine amu.

² Muaba awu kamuvua mayi a kunua to. Bena Izrayele kutombokela Moshe ne Arone.

³ Kutandishabu Moshe, bamba ne: — Bivua bimpe bua Maweja-Nangila kutubutula musangu umue ne bana betu.

⁴ Kadi tuetu, tshisamba tshia Maweja-Nangila, nuatufikishi mu tshipela emu bua tshinyi? Amu bua tuetu kufuilamu ne bimuna bietu anyi?

⁵ Nuvua batumushe mu Ejipitu bua tshinyi? Amu bua kutufikisha muaba ewu wa dikenga! Muaba ewu katuena mua kudima, kawena mitshi ya mfiku, nansha ya mvinyo, nansha ya grenade. Tuapangi ne mayi mene a kunua!

⁶ Moshe ne Arone kumuka muaba awu, kuya kudiela mpala panshi mu mushiku wa ntenta wa kusambakena. Butumbi bua Maweja-Nangila kubamuenekela.

⁷ Maweja-Nangila kuambila Moshe ne:

⁸ — Angata dikombu diebe. Pashishe, wewe ne Arone, nubikile bena Izrayele bonsu. Nutumine lubuebue alu diyi, bena Izrayele bonsu batangile. Nanku nelupatule mayi. Ke muudi mua kupatula mayi mu lubuebue, bua kunuisha bantu bonsu ne bimuna biabu.

⁹ Moshe kuangata dikombu diende, divua mu nzubu wa Maweja-Nangila, bu muvuabu bamuambile.

¹⁰ Yeye ne Arone kubikila bena Izrayele bonsu muaba uvua lubuebue awu. Kubambilabu ne: — Nuenu nudi ne mutu mukole! Netuikale ne mushindu wa kunupatuila mayi mu lubuebue emu anyi?

¹¹ Moshe kutuuta dikombu pa lubuebue misangu ibidi. Mayi kupatuka mapite bungi. Bena Izrayele kunua, ne bimuma biabu kabidi.

¹² Maweja-Nangila kuambila Moshe ne Arone ne: — Kanuena bitabe mumvua munuambile. Kanuvua basue bua ndeje bena Izrayele tshijila tshianyi. Nanku kanuakufikisha bena Izrayele mu ditunga dingabapesha to.

¹³ Kuinyikabu mayi a lubuebue alu ne: mayi a Meriba — mayi a matandu, — bualu bena Izrayele bavua batandangane ne Maweja-Nangila. Kadi Maweja-Nangila kubalejamu mudiye wa tshijila.

Bena Edome badi bajika njila

¹⁴ Patshivua Moshe mu Kadeshe, kutuminaye mukalenga wa bena Edome bantu, bamuambila ne: — Tuetu bana benu bena Izrayele, tudi bakenge bikole. Wewe mene udi mumanye!

¹⁵ Bankambua betu kale bavua baye mu Ejipitu. Tuetu kushalamu matuku a bungi. Kadi bena Ejipitu kutukengesha bikole, ne tuetu ne bankambua betu.

¹⁶ Pashishe tuetu kutendelela Maweja-Nangila. Kututelejaye, kututuminaye mutumibue wende bua kutupatula mu Ejipitu. Mpindiewu tudi mu Kadeshe, tshimenga tshidi ku mikalu ya ditunga diebe.

¹⁷ Nanku anyisha bua tupitshile muebe amu. Katuena tupitshila mu madimi enu, nansha a mvinyo. Katuena tunua mayi a mu ditunga dienu. Netupite buludi ne njila munene, katuyi tuapuka, too ne patuapita ditunga diebe dijima.

¹⁸ Mukalenga wa bena Edome kuandamuna ne: — Kanuena mua kupitshila mu ditunga dianyi to. Nuenu basue kuenza nanku, nennuluishe!

¹⁹ Bena Izrayele kunanukila bikole, bamba ne: — Nutulekele, tupite ne njila! Tuetu ne bimuna bietu, patuikala ne dikenga ne mayi a kunua, netuasumbe. Tudi tukulomba amu ne: wanyishe bua tupitshile mu ditunga diebe.

²⁰ Mukalenga wa bena Edome kubenga, wamba ne: — Kanuena mua kupita to! Pashishe kutumaye bena mvita ba bungi ne tshiluilu tshikole bua kuluisha bena Izrayele.

²¹ Bena Edome kukandika bena Izrayele, kubajikila njila. Nanku bena Izrayele kukeba njila mukuabu.

Lufu lua Arone

²² Bena Izrayele bonsu kumuka ku Kadeshe, kuya ku mukuna wa Ore.

²³ Pavuabu ku mukuna aku, ku mikalu ya bena Edome, Maweja-Nangila kuambila Moshe ne:

²⁴ — Arone kakufika mu ditunga dingapesha bena Izrayele nansha. Neafuile muaba ewu, bualu nuvua bantombokele ku mayi a Meriba.

²⁵ Nanku uye ne Arone, kabidi ne muanende Elazare, ku lusongu lua mukuna wa Ore.

²⁶ Uvule Arone bilamba biende bia mudimu wa butuangaji. Ubivuadike Elazare. Nanku Arone neafuile muaba awu.

²⁷ Moshe kukumbaja bivua Maweja-Nangila muambe. Moshe ne Arone ne Elazare kuya bonsu basatu ku mukuna wa Ore, bena Izrayele batangile.

²⁸ Moshe kuvula Arone bilamba, kubivuadika Elazare. Arone kufuila ku lusongu lua mukuna aku. Pashishe Moshe ne Elazare kupueka ku mukuna.

²⁹ Bena Izrayele bonsu bumvua bua lufu lua Arone, kutekabu bonsu madilu ende matuku makumi asatu.