Dibadika 2 - MUKANDA WA MYIDI MUKULU

Mushindu udi bisamba bia bena Izrayele ne bua kuasa mitanda

¹ Maweja-Nangila kuambila Moshe ne Arone ne:

² — Bena Izrayele bonsu base mitanda yabu muaba udi tshisumbu tshiabu tshia bena mvita, pa buipi ne dibendela dia tshisamba tshiabu. Mitanda yabu neyinyungulukile ntenta wa kusambakena, kadi mikale mutantshi ne ntenta awu.

^3-8 “Bantu badi ku diyi dia tshisamba tshia Yuda, nebase mitanda ku tshisumbu ku tshisumbu luseke ludi diba dipatukila, muaba udi dibendela diabu. Bantu badibu babadike bua benze mudimu mu bisumbu bia tshiluilu, nebabalombole kudi mfumu wa tshisamba tshiabu: Mfumu wa bena Yuda: ke Nashone, muana wa Aminadabe, ne bantu bende 74.600; Mfumu wa bena Isakare: ke Netaneyele, muana wa Shuware, ne bantu bende 54.400; Mfumu wa bena Zebulone: ke Eliyabe, muana wa Elone, ne bantu bende 57.400.

⁹ Bantu bonsu badi ku diyi dia tshisamba tshia Yuda badi 186.400. Bonsu abu, bisumbu bisatu, ke badi ne bua kubanga luendu, benza tshiluilu tshia kumpala.

^10-15 “Bantu badi ku diyi dia tshisamba tshia Rubene, nebase mitanda yabu ku tshisumbu ku tshisumbu, luseke lua kuinshi kua nzubu wa tshijila, muaba udi dibendela diabu. Bantu badibu babadike bua benze mudimu mu bisumbu bia tshiluilu, nebabalombole kudi mfumu wa tshisamba tshiabu: Mfumu wa bena Rubene: ke Elishure, muana wa Shedeyure, ne bantu bende 46.500; Mfumu wa bena Shimeyone: ke Shelumiyele, muana wa Surishadayi, ne bantu bende 59.300; Mfumu wa bena Ngade: ke Eliyasafe, muana wa Deyuwele ne bantu bende 45.650.

¹⁶ Bantu bonsu badi ku diyi dia tshisamba tshia Rubene badi: 151.450. Bonsu abu, bisumbu bisatu, ke badi ne bua kumuka pashishe, benza tshiluilu tshibidi.

¹⁷ “Pashishe bena Levi nebumuke, bambule ntenta wa kusambakena. Nebende pankatshi pa biluilu binayi, bibidi kumpala, bibidi kunyima kuabu. Nebalondangane muntu yonsu mu mulongu wende, ku tshisumbu ne ku tshisumbu, bilondeshile muaba uvuabu base mitanda yabu, balonda dibendela dia tshisamba tshiabu.

^18-23 “Bantu badi ku diyi dia tshisamba tshia Efrayime nebase mitanda yabu ku tshisumbu ku tshisumbu, luseke ludi diba dibuelela, muaba udi dibendela diabu. Bantu badibu babadike bua benze mudimu mu bisumbu bia tshiluilu, nebabalombole kudi mfumu wa tshisamba tshiabu: Mfumu wa bena Efrayime: ke Elishama, muana wa Amikude, ne bantu bende 40.500; Mfumu wa bena Menashe: ke Ngameliyele, muana wa Pedashure, ne bantu bende 32.200; Mfumu wa bena Binyamine: ke Abidane, muana wa Ngideyoni, ne bantu bende 35.400.

²⁴ Bantu bonsu badi ku diyi dia tshisamba tshia Efrayime badi 108.100. Nanku bonsu abu, bisumbu bisatu, nebatuadije luendu pashishe, benza tshiluilu tshisatu.

^25-30 “Bantu badi ku diyi dia tshisamba tshia Dane nebase mitanda yabu ku tshisumbu ku tshisumbu luseke lua ku mutu kua nzubu wa tshijila, muaba udi dibendela diabu. Bantu badibu babadike bua benze mudimu mu bisumbu bia tshiluilu, nebabalombole kudi mfumu wa tshisamba tshiabu: Mfumu wa bena Dane: ke Akiyezere, muana wa Amishadayi, ne bantu bende 62.700; Mfumu wa bena Ashere: ke Pagiyele, muana wa Okrane, ne bantu bende 41.500; Mfumu wa bena Naftali: ke Akira, muana wa Eyinane ne bantu bende 53.400.

³¹ Bantu bonsu badi ku diyi dia tshisamba tshia Dane badi 157.600. “Nanku bantu aba, bisumbu bisatu, nebatuadije luendu, benza tshiluilu tshinayi, tshia ndekelu.”

³² Bena Izrayele bonsu basanga bavuabu babadike ku tshisamba ne ku tshisumbu badi 603.550.

³³ Kadi bu muvua Maweja-Nangila muambile Moshe, kabavua babadike bena Levi pamue ne bena Izrayele bakuabu nansha.

³⁴ Nanku bena Izrayele kukumbaja bimpe bionsu bivua Maweja-Nangila muambile Moshe. Ke muvuabu base mitanda yabu ku tshisumbu ku tshisumbu, muaba uvua dibendela diabu. Ke muvuabu bumuke kabidi balondangane bimpe ku diku ne ku diku, ku tshisamba ne ku tshisamba.