Dibadika 17 - MUKANDA WA MYIDI MUKULU

Mbabula ya bena Kora

¹ Maweja-Nangila kuambila Moshe ne:

² — Ambila mutuangaji Elazare, muana wa Arone, ne: upatule mbabula idi mu kapia, utangalaje makala aye kule! Mbabula eyi nya tshijila.

³ Mbabula ayi, ivua ya bena tshibawu bamane kufua bua buenzavi buabu. Nanku bu mudibu bamane kundambula meme Maweja-Nangila mbabula ayi, nuyifule nuenze nayi bitata bia kubuikila ku tshilambuilu. Bitata abi nebishale tshivulukilu kudi bena Izrayele.

⁴ Mutuangaji Elazare kuangata mbabula ya tshiamu tshikunze ya bantu bavua Maweja-Nangila muoshe ne muoyi. Kuenzabu nayi bitata bia kubuikila ku tshilambuilu.

⁵ Bitata abi bivua bivuluija bena Izrayele ne: muntu udi kayi wa ku ndelanganyi ya Arone, kena mua kuoshila Maweja-Nangila musenga wa kamonya to. Maweja-Nangila ukavua mumane kuambila Moshe bua kumanyisha Arone ne: “Pikala muntu mukuabu muoshile Maweja-Nangila musenga wa kamonya, neapete dinyoka bu dia Kora ne bonsu bavuaye nabu.”

Bantu badi bajana Moshe ne Arone

⁶ Butshia dinda, bena Izrayele bonsu kujana Moshe ne Arone, bamba ne: — Nudi bafuishe bantu ba Maweja-Nangila.

⁷ Bena Izrayele kudikunguja muaba uvua Moshe ne Arone. Kadi pavuabu batangile ku ntenta wa kusambakena, kumonabu muvua divuba dileja butumbi bua Maweja-Nangila dibuikila ntenta.

⁸ Moshe ne Arone kuya kumpala kua ntenta wa kusambakena.

⁹ Maweja-Nangila kuambila Moshe ne:

¹⁰ — Umukayi muaba udi bantu aba bimane. Ndi musue kubabutula bonsu amu mpindiewu. Moshe ne Arone kudiela mpala panshi.

¹¹ Moshe kuambila Arone ne: — Ambula mbabula webe, welamu makala a ku tshilambuilu. Pashishe, wela musenga wa kamonya pa makala apu. Uye lukasa kudi bena Izrayele bua kubakobolola. Bualu bu mudi Maweja-Nangila mufike munda, kabutu nkamane kutuadija.

¹² Arone kuenza bivua Moshe mumuambile. Kuyaye kudi bantu, kuvua kabutu kamane kubanga. Kuoshaye musenga wa kamonya bua kubakobolola.

¹³ Kuimanaye pankatshi pa bantu bavua bamane kufua, ne batshivua ne muoyi. Nanku muntu kena mufue kabidi to.

¹⁴ Bantu bonsu bavua bafue mu tshipupu etshi bavua 14.700, katuyi babale Kora ne bantu bavuaye nabu badianjile kufua.

¹⁵ Kabutu kamane kujika, Arone kupingana mu mushiku wa mbelu wa ntenta wa kusambakena muvua Moshe.

Dikombu dia Arone

¹⁶ Maweja-Nangila kuambila Moshe ne:

¹⁷ — Ela mukenji bua mulombodi wa tshisamba tshionsu tshia bena Izrayele akupe dikombu. Nanku neusangishe makombu dikumi ne abidi. Ku dikombu dionsu neufundeku dina dia tshisamba tshiabu.

¹⁸ Kadi ku dikombu dia bena Levi ufundeku dina dia Arone. Nanku mfumu wa tshisamba tshionsu neikale ne dikombu diende.

¹⁹ Uteke makombu aa mu ntenta wa kusambakena, kumpala kua mushete wa ndondu, muaba undi ndileja kunudi.

²⁰ Nanku dikombu dia muntu undi musungule nedisase. Bijanu bidi bena Izrayele bakujana nabi nebijike. Tshiakubiumvua kabidi to.

²¹ Moshe kumanyisha bena Izrayele bionsu abi. Balombodi ba bisamba abi bionsu kumupesha makombu dikumi ne abidi. Dia Arone divua munkatshi mua makombu dikumi ne abidi aa.

²² Moshe kuateka onsu mu ntenta wa kusambakena, muaba udi Maweja-Nangila.

²³ Butshia dinda, Moshe uya mu ntenta wa kusambakena, kusangana dikombu dia Arone, muena diku dia Levi, dimane kusasa, diele bilongu, dikuame ne bimuma bimane kuboba.

²⁴ Moshe kupatula makombu onsu avua mu ntenta wa kusambakena. Kuyaye kualeja bena Izrayele. Bantu bonsu bavua ne bua kuamona. Mulombodi yonsu kuangata dikombu diende.

²⁵ Maweja-Nangila kuambila Moshe ne: — Pingaja dikombu dia Arone muaba udi mushete wa ndondu. Badilamemu bua divuluije bena Izrayele buenzavi buabu. Ke muudi mua kujikija bijanu bidibu banjana nabi. Nanku kabena mua kufua kabidi to.

²⁶ Moshe kukumbaja bimpe bionsu bivua Maweja-Nangila mumuambile.

Mudimu wa batuangaji ne wa bena Levi

²⁷ Bena Izrayele kuambila Moshe ne: — Mona, tudi tujimina, tudi tubutuka bonsu.

²⁸ Muntu yonsu udi usemena ku nzubu wa Maweja-Nangila, udi ufua. Neutulekele tufua bonsu, tubutuka nanku anyi?