Dibadika 16 - MUKANDA WA MYIDI MUKULU

Ditomboka dia Kora

¹ Muena Levi mukuabu, diende Kora, muana wa Ishare, wa mu diku dia bena Kekate, uvua muambile bena Rubene basatu, Datane ne Abirame, bana ba Eliyabe, ne One, muana wa Pelete,

² meji mabi a kutombokela Moshe. Bena Izrayele bakuabu, nkama ibidi ne makumi atanu, bamfumu ba meku ne bakulu, basombele babuela mu bisangilu, kuditua ku tshiabu.

³ Bantu aba bonsu, kutombokela Moshe ne Arone, kubambila ne: — Nudi nukolesha malu! Tuetu bena Izrayele bonsu tudi bantu ba tshijila. Maweja-Nangila udi munkathi muetu bonsu. Munudi nuditemba, nuditeka kumpala kua bantu bakuabu ba Maweja-Nangila mbishi?

⁴ Moshe umvua nanku, kudielaye mpala panshi.

⁵ Kuambilaye Kora ne bonsu bavuaye nabu ne: — Malaba dinda, Maweja-Nangila nkayende neatumanyishe muntu udi wa tshijila, udi mua kusemena pabuipi nende. Nanku, neanyishe bua muntu udiye musungule asemene pabuipi nende.

⁶ Wewe Kora ne bonsu banudi nabu, nuangate mbabula.

⁷ Malaba nuele makala a kapia ne musenga wa kamonya mu mbabula amu. Nuyiteke kumpala kua Maweja-Nangila. Nenku yeye nkayende neasungule muntu wende wa tshijila. Nuenu bena Levi ke badi bakolesha malu!

⁸ Pashishe Moshe kuambila kabidi Kora ne: — Nuenu bena Levi telejayi!

⁹ Padi Maweja-Nangila Mvidi Mukulu wa bena Izrayele munusungule munkatshi mua bena Izrayele bakuabu bua nuenu kusemena pabuipi nende, kuenza mudimu muaba wa tshijila, kuyukila nende mu dina dia bena Izrayele bonsu, ki mbualu bunene budiye munuenzele anyi?

¹⁰ Wewe Kora ne bana benu bena Levi, Maweja-Nangila mmunusungule bua nusemene pabuipi nende. Munudi nudilombela kabidi muanzu wa butuangaji mbishi?

¹¹ Nanku, wewe ne bantu bebe, nudi nutombokela Maweja-Nangila. Unudi nujana ki ngArone nansha!

¹² Pashishe, Moshe kubikidisha Datane ne Abirame, bana ba Eliyabe. Kadi bobu kumuandamuna ne: — Tuabengi!

¹³ Udi mumane kutupatula mu Ejipitu muvua biakudia bia bungi, mabele ne buitshi, bua kutufuishila mu tshipela emu! Mpindiewu ukadi uditeka kabidi mfumuetu!

¹⁴ Bushuwa, kuena mutufikishe mu ditunga didi ne biakudia bia bungi to. Katuena bapiane madimi a mvinyo, nansha madimi makuabu to. Udi wela meji ne: tudi bampofu anyi? Katuena basue kufika to!

¹⁵ Moshe kufika munda bikole bua diandamuna diabu adi. Kuambilaye Maweja-Nangila ne: — Kuitabi milambu yabu to. Katshia meme tshiena mubenzele bibi. Tshiena mubanyenge tshintu, nansha mpunde mene.

Badi banyoka Kora ne bantu bende

¹⁶ Moshe kuambila Kora ne: — Wewe Kora ne bonsu baudi nabu, nufike kudi Maweja-Nangila malaba. Arone pende neikale koku!

¹⁷ Muntu yonsu wa ku bantu nkama ibidi ne makumi atanu banudi nabu, ikale ne mbabula, elemu musenga wa kamonya, afike nende kudi Maweja-Nangila. Wewe mene ne Arone, nenuenze kabidi nanku.

¹⁸ Kora ne bonsu bavuaye nabu kuitababu. Muntu yonsu kuambula mbabula, kuelamu makala a kapia ne musenga wa kamonya. Kuyabu bonsu kuimana mu mushiku wa ntenta wa kusambakena. Moshe ne Arone kuya kuimana kabidi muaba awu.

¹⁹ Kora kubikila bena Izrayele bonsu muaba uvua Moshe ne Arone bimane, pabuipi ne mushiku wa ntenta wa kusambakena. Diba adi, bena Izrayele bonsu kumona butumbi bua Maweja-Nangila.

²⁰ Maweja-Nangila kuambila Moshe ne Arone ne:

²¹ — Umukayi muaba udi bantu aba, bualu ndi musue kubabutula bonsu amu mpindiewu.

²² Moshe ne Arone kudiela mpala panshi, bamba ne: — Kia! Mvidi Mukulu, wewe ke udi mufuke bintu bionsu, mubipeshe muoyi. Kuena mua kufikila bantu bonsu munda bua tshilema tshia muntu umue.

²³ Maweja-Nangila kuandamuna ne:

²⁴ — Nanku, umushe bantu bonsu muaba udi Kora, Datane ne Abirame basombe.

²⁵ Moshe ujuka, kusemenaye pabuipi ne Datane, Abirame, kabidi ne bakulu ba bena Izrayele.

²⁶ Kuambilaye bantu bonsu ne: — Umukayi ku ntenta ya bena buenzavi aba. Kanulengi tshintu tshiabu nansha tshimue to. Tshianana nudi mua kufua kabidi bua mibi yabu yonsu.

²⁷ Bena Izrayele kumuka muaba uvua Kora, Datane ne Abirame basombe. Datane ne Abirame bavua bapatuke mu ntenta yabu, bimane pambelu ne bakaji babu, bana babu ne bena meku abu bonsu.

²⁸ Moshe kuamba ne: — Nenujadike mundi tshiyi ndienzela malu nkayanyi to, kabidi mudi Maweja-Nangila nkayende muntume bua kukumbaja bionsu ebi.

²⁹ Pikala bantu aba bafue lufu lua patupu mudi bantu bonsu bafue, nanku nenujadike ne: Maweja-Nangila kena muntume to.

³⁰ Kadi, pikala Maweja-Nangila mubenzele bualu budi kabuyi buanji kuenzeka, pikala buloba bumine, bujibikile bantu abu ne bena meku abu, ne bintu biabu, baye mu kandondu ka bafue, batshikale ne muoyi, nanku nenujadike ne: mbasendeke Maweja-Nangila.

³¹ Anu Moshe ulekela diakula, buloba kupandikila muaba uvua Datane ne Abirame bimane.

³² Buloba kubajibikila bonsu ne bena meku abu, ne bantu bonsu bavua nabu Kora, ne bintu biabu.

³³ Bantu kukuluka ne muoyi mu kandondu ka bafue, pamue ne bintu biabu bionsu. Buloba kubajibikila bonsu. Kujiminabu munkatshi mua bena Izrayele.

³⁴ Bena Izrayele bakuabu bonsu bavua pabuipi nabu, bumvue mbila ya miadi yabu, kunyemabu ne bowa, bamba ne: “Buloba budi mua kutujibikila petu.”

³⁵ Pashishe Maweja-Nangila kutuma kapia. Kubutulaku bantu bonsu nkama ibidi ne makumi atanu, batshikale ne muoyi. Ke bavua balambula musenga wa kamonya.