Dibadika 14 - MUKANDA WA MYIDI MUKULU

Bena Izrayele badi babenga kuya mu Kenaane

¹ Bena Izrayele bonsu kutshisha butuku ne mbila ya miadi,

² badiwula Moshe ne Arone, bamba ne: — Bivua bimpe tuetu kufuila mu Ejipitu, nansha mu tshipela emu!

³ Maweja-Nangila mmusue kutubueja mu ditunga dia Kenaane bua kutubutula mu mvita anyi? Bakaji betu ne bana nebashale bapika. Mbimpe tupingane mu Ejipitu!

⁴ Kuambilanganabu ne: — Tusungulayi mfumu mukuabu, tupingane mu Ejipitu!

⁵ Moshe ne Arone kudiela panshi kumpala kua bena Izrayele bonsu.

⁶ Kadi batentekedi babidi, Yoshuwa, muana wa Nune, ne Kalebe, muana wa Yefune, kubungama, kudipanda bilamba.

⁷ Kuambilabu bena Izrayele bonsu ne: — Ditunga dituvua baye kutentekela didi dimpe ditambe.

⁸ Didi ne biakudia bia bungi, mabele ne buitshi bidimu. Pikala Maweja-Nangila mututabalele, neatubueje mu ditunga adi bua tuetu kudikuata.

⁹ Kadi, lekelayi kutombokela Maweja-Nangila. Kanutshinyi bena ditunga adi to. Netubabutule! Mvidie yabu ivuabu batekemene kayena kabidi ne bukole bua kubalama to! Kadi Maweja-Nangila udi netu. Nanku kanubatshinyi to.

¹⁰ Bena Izrayele bonsu kukeba mua kubasa mabue, kubashipa. Kadi diakamue butumbi bua Maweja-Nangila kumuenekela bena Izrayele kulu kua ntenta wa kusambakena.

Moshe udi usengelela Maweja-Nangila bua afuile bena Izrayele luse

¹¹ Maweja-Nangila kuambila Moshe ne: — Ndi muenzele bantu aba bishima bia bungi bua kubaleja bukole buanyi. Kadi nebambenge too ne ku diba kaayi? Nebabenge kashidi bua kungitaba anyi?

¹² Nanku nembatumine disama dia tshiambu, mbabutula. Pashishe nengenze nebe tshisamba tshikuabu, tshidi tshipite bena Izrayele ku bungi ne ku bukole.

¹³ Moshe kuandamuna Maweja-Nangila ne: — Bena Ejipitu mbamanye muudi mupatule bena Izrayele mu ditunga diabu ku bukole buebe.

¹⁴ Bena Ejipitu mbamane kulondela bena Kenaane malu aa. Nanku bena Kenaane mbamane kumvua muudi wewe Maweja-Nangila wenda ne tshisamba tshiebe tshia bena Izrayele, umonangana nabu mpala ne mpala. Badi bamanye muudi ubalama, bualu mu munya udi wenda kumpala kuabu mu divuba, butuku mu tshimunyi tshia kapia.

¹⁵ Kadi mpindiewu wewe mubutule bena Izrayele bonsu musangu umue, bisamba bikuabu bivua bimane kumvua lumu lua bukole buebe, nebiambe ne:

¹⁶ “Maweja-Nangila wapangi mua kufikisha bena Izrayele mu ditunga divuaye mubalaye. Ke padiye mubashipele mu tshipela.”

¹⁷ Nanku, Maweja-Nangila, ndi nkusengelela ne: leja bukole buebe. Bualu uvua mutuambile ne:

¹⁸ “Meme ndi Maweja-Nangila. Ndi ne luse lua bungi. Tshiena mfika munda lukasa. Ndi mfuila bantu luse bua mibi yabu, ne bua ditomboka diabu. Kadi tshiena mbingisha muntu udi mupile. Ndi nnyoka muana wa ku ndelanganyi misatu nansha minayi bua mibi ya baledi bende.”

¹⁹ Nanku, ndi nkusengelela ne: fuila bena Izrayele luse bu muuvua mubenzele pavuabu bapatuke mu Ejipitu.

²⁰ Maweja-Nangila kuandamuna ne: — Ndi mbafuila luse bu muudi ulomba.

²¹ Kadi ndi nditshipa ne: bu mundi ne muoyi, kabidi bu mudi buloba bujima buwule ne butumbi buanyi,

²² muntu nansha umue wa ku ndelanganyi eyi kakubuela mu Kenaane to. Bualu bantu aba mbamane kumona butumbi buanyi, ne malu a dikema andi mubenzele mu Ejipitu ne mu tshipela. Kadi nansha bobu bamone nanku, kabavua bangitaba to. Bavua bantete misangu ne misangu!

²³ Nanku, muntu wa kudibu nansha umue uvua muntombokele kena mua kufika mu ditunga dia Kenaane, dimvua mulaye bankambua babu to.

²⁴ Kadi, muntu wanyi Kalebe, uvua uleja muoyi muimpe. Yeye utshidi wanyi meme. Nemmufikishe mu ditunga edi divuaye muye kutentekela. Kabidi ndelanganyi yende neisombemu.

²⁵ (Bena Amaleke ne bena Kenaane ke badi basomba mpindiewu mu bibandabanda bia ditunga adi.) Nanku, nuenu bonsu, malaba nenupingane kunudi bafume. Nenupingane mu tshipela, batangile ku Mayi manene makunze.

Maweja-Nangila udi unyoka bantu bende

²⁶ Maweja-Nangila kuambila Moshe ne Arone ne:

²⁷ — Bantu babi aba nebangele mpata kashidi anyi? Ndi mumvue mudibu banjane.

²⁸ Kadi ndayi, nubambile ne: “Meme Maweja-Nangila, ndi ne muoyi. Nennunyoke bilondeshile bijanu bienu abi.

²⁹ Nuenu bonsu badi ne bidimu makumi abidi ne pa mutu, bavua banubadike, banufunde mena enu. Kadi, nenufuile bonsu mu tshipela emu, bualu nudi nunjana.

³⁰ Ndi nditshipa ne: kanuakufika mu ditunga dia Kenaane, dimvua munulaye to! Amu Kalebe, muana wa Yefune, ne Yoshuwa, muana wa Nune, nebabuelemu.

³¹ Kadi bana benu batekete banuvua nuelela meji ne: nebashale bapika, nembafikishe mu ditunga dia Kenaane, dinudi nubenga. Bobu nebadimanye.

³² Nanku, nuenu nenufuile bonsu amu mu tshipela emu.

³³ Kadi bana benu nebashale mu tshipela emu bidimu makumi anayi, badisha amu bimuna biabu. Nebashale pabu mu dikenga bua dintombokela dienu, too ne panuabutuka bonsu, nuenu baledi babu.

³⁴ Nuvua batentekele ditunga adi matuku makumi anayi. Nenku, bua bubi buenu, ndi nnunyoke bidimu makumi anayi. Mmumue ne: dituku dimue nedienze tshidimu tshijima tshia tshibawu. Nenujadike ne: ki mbimpe kuntombokela meme Maweja-Nangila to.

³⁵ Ke tshimvua meme Maweja-Nangila ne bua kunuambila. Ndi nnujadikila ne: nennukengeshe too ne panuabutukila bonsu mu tshipela emu, bualu nudi bantu babi badi bantombokela.”

³⁶ Bantu bavua Moshe mutume bua kutentekela ditunga dia Kenaane, kadi bavua bendeshila ditunga edi lumu lubi mu dipingana diabu, bua bena Izrayele bonsu batombokele Moshe,

³⁷ kufuabu bonsu. Maweja-Nangila kubabutula, bualu bavua bapepeje ditunga adi.

³⁸ Nanku, ku batentekedi bonsu bavua Moshe mutume, anu Yoshuwa ne Kalebe ke bavua bashale ne muoyi.

Bena Izrayele badi batombokela Maweja-Nangila tshiakabidi

³⁹ Moshe kumanyisha bena Izrayele malu onsu avua Maweja-Nangila mumuambile. Bobu kudila miadi bikole.

⁴⁰ Butshia dinda, kuyabu ku mukuna, bambilangane ne: — Tudi bamane kuenza bibi! Kadi mpindiewu tudi basue kuya muaba uvua Maweja-Nangila mutuleje.

⁴¹ Moshe kubebeja ne: — Tshinudi nuenza ntshinyi? Nudi nutupa ku diyi dia Maweja-Nangila! Nanku kanuakuikala ne diakalenga to!

⁴² Maweja-Nangila kena nenu to! Nanku kanuyi to! Baluishi benu nebanubutule!

⁴³ Bena Amaleke ne bena Kenaane badi kunuyaya aku. Nebanubutule bonsu mu mvita. Maweja-Nangila kakuikala nenu to, bualu nudi bamubenge.

⁴⁴ Kadi, bena Izrayele bavua basue kuya ku mukuna ku bukole. Moshe kushala ku mitanda, pamue ne mushete wa ndondu wa Maweja-Nangila.

⁴⁵ Bena Amaleke ne bena Kenaane kupueka ku mukuna uvuabu basombe. Kuluanganabu ne bena Izrayele, kubatshimuna, kubipata too ne ku Orma.