Dibadika 13 - MUKANDA WA MYIDI MUKULU

Moshe udi utuma batentekedi mu Kenaane

¹ Maweja-Nangila kuambila Moshe ne:

² — Usungule mukulu umue ku tshisamba tshionsu tshia bena Izrayele. Utume bakulu aba bua batentekele ditunga dia bena Kenaane, dindi mpesha bena Izrayele.

³ Moshe kuitaba diyi dia Maweja-Nangila. Kusungulaye bantu bavua bonsu bamfumu ba bena Izrayele, bua bumuke mu tshipela tshia Parane, baye mu Kenaane.

⁴ Mena a bamfumu abu adi nunku: Shamuwa, muana wa Zakure, wa mu tshisamba tshia Rubene.

⁵ Shafate, muana wa Ori, wa mu tshisamba tshia Shimeyone.

⁶ Kalebe, muana wa Yefune, wa mu tshisamba tshia Yuda.

⁷ Igale, muana wa Yozefe, wa mu tshisamba tshia Isakare.

⁸ Osheya, muana wa Nune, wa mu tshisamba tshia Efrayime.

⁹ Palti, muana wa Rafu, wa mu tshisamba tshia Binyamine.

¹⁰ Ngadiyele, muana wa Sodi, wa mu tshisamba tshia Zebulone.

¹¹ Ngadi, muana wa Sushi, wa mu tshisamba tshia Menashe, muana wa Yozefe.

¹² Amiyele, muana wa Ngemali, wa mu tshisamba tshia Dane.

¹³ Seture, muana wa Mikayele, wa mu tshisamba tshia Ashere.

¹⁴ Nabi, muana wa Wofsi, wa mu tshisamba tshia Naftali.

¹⁵ Nguwele, muana wa Maki, wa mu tshisamba tshia Ngade.

¹⁶ Bantu aba, ke bavua Moshe mutume bua kutentekela ditunga dia Kenaane. Nanku, Moshe kuinyika Osheya, muana wa Nune, dina dia Yoshuwa.

¹⁷ Bangabanga ne Moshe kutuma batentekedi aba, kubambilaye ne: — Nubuele mu ditunga dia Kenaane amu ku luseke lua kuinshi kua ditunga. Pashishe nuye too ne ku muaba udi mikuna.

¹⁸ Nujadike mudi ditunga adi. Nutangile mudi bena ditunga: badi ba bungi anyi mbakese? Badi ne bukole anyi mbafuba?

¹⁹ Nujadike mushindu udi ditunga: didi dimpe anyi ndibi? Mbakoleshe bimenga ne bimana anyi, peshi mudi mitanda patupu?

²⁰ Nubuele mu ditunga adi ne dikima. Nujadike ne: buloba ne budi ne bufuke, anyi budi buatuka? Mitshi ya bimuma idi itolokamu anyi? Nupingane kunu ne bimuma bia mu ditunga adi. Tshikondu atshi ke tshivua tumuma tua mvinyo tutuadija kukuama.

²¹ Nanku, batentekedi abu kumuka mu tshipela tshia Tsine, kuya kutentekela ditunga dia Kenaane, too ne ku Rekobe, pabuipi ne Lebo-Amate.

²² Kubuelabu mu ditunga luseke lua kuinshi. Kufikabu pabuipi ne Ebrone, muaba uvuabu base kudi bena Akimane, bena Sheshayi ne bena Talmayi. Bonsu aba ndelanganyi ya Anake, muntu wa mpolondu. (Bavua base tshimenga tshia Ebrone, bidimu muanda mutekete bangabanga ne kuasa tshimenga tshia Tanise mu Ejipitu.)

²³ Kupuekabu mu tshibanda tshia Eshekole. Kukosabu ditamba dia mutshi wa mvinyo dikale ne tumuma. Kupolabu kabidi bimuma bia grenade ne bia mfiku. Kubisuikabu kaba kamue. Bantu babidi kuambula bionsu abi ku mukolu.

²⁴ Kuinyikabu muaba awu dina ne: tshibanda tshia Eshekole, bualu bena Izrayele bavua bapolamu tumuma tua mvinyo.

Batentekedi badi bamanyisha Moshe bivuabu bamone

²⁵ Matuku makumi anayi mamane kupita, batentekedi kujikija mudimu wabu. Kupinganabu

²⁶ ku Kadeshe, mu tshipela tshia Parane, muaba uvua Moshe, Arone ne bena Izrayele bonsu. Kubalondelabu bionsu bivuabu bamone mu Kenaane. Kubalejabu kabidi bimuma bia mu ditunga adi.

²⁷ Kuambilabu Moshe ne: — Tuafiki mu ditunga diuvua mututume. Didi ne biakudia bia bungi, mabele ne buitshi. Bimuma bia mu ditunga adi mbiebi.

²⁸ Kadi bantu badimu mbilobu bia mvita. Bimenga biabu bidi bialabale. Bavua babikoleshe ne bimana bile. Tuasanganyimu bantu ba ku ndelanganyi ya Anake, muntu wa mpolondu.

²⁹ Bena Amaleke mbase kuinshi kua ditunga. Bena Iti, bena Yebusa ne bena Amore mbase pa mikuna. Bena Kenaane mbase ku muelelu wa Mayi manene a pankatshi pa matunga, ne wa musulu wa Yardene.

³⁰ Batentekedi bakuabu kudiwula Moshe. Kadi Kalebe kubapuwisha, wamba ne: — Tuyayi mu ditunga adi! Netutshimune bantu bonsu abu. Netubanyenge ditunga.

³¹ Kadi batentekedi bavua baye ne Kalebe mu luendu alu kubenga, bamba ne: — Katuena mua kuluangana ne bantu aba to. Mbatupite bukole!

³² Nanku batentekedi abu kubipisha ditunga dia Kenaane, bamba ne: — Mu Kenaane bantu benyi kabena mua kusombamu to. Nebafue amu kufua. Kabidi bantu bonsu badimu mbantu bale!

³³ Tuvua bamonemu ne bantu ba mpolondu, ndelanganyi ya Anake. Ku mesu kuabu tuetu tuvua badimone anu bu tunkenene. Bobu kabidi bavua mua kutumona nanku.