Danyele 9 - MUKANDA WA MYIDI MUKULU

Daniyele udi utendelela Mvidi Mukulu

^1-2 “Mu tshidimu tshia kumpala tshivua Daryaveshe, muana wa Ahashaveroshe, wa mu diku dia bukalenga bua bena Madayi, mudie bukalenga mu ditunga dia Babilone, meme, Daniyele, mvua mutangile mu mikanda ya tshijila. Meme kujingulula bualu buvua Maweja-Nangila muambile muambi Yirmeya ne: bidimu makumi muanda mutekete, Yerushalayime neashale dikolu.

³ Meme kujila biakudia, kuvuala bilamba bikayapale, kudilaba butu. Meme kutangila kudi Maweja-Nangila Mvidi Mukulu, bua kumutendelela ne kumusengelela.

⁴ Meme kutendelela Maweja-Nangila, Mvidi Mukulu wanyi, mmutondela mibi yanyi: “Eyi, Maweja-Nangila Mvidi Mukulu munene, udi ukuatshisha bantu bowa, udi ulama ndondu yebe ne bonsu badi batumikila mikenji yebe, udi ne diyi dimue kudi bonsu badi bakunanga.

⁵ Tuvua babenge kuitaba diyi diebe. Tuvua benze malu mabi. Tudi bena tshibawu. Tuvua bakutombokele. Tuvua babenge mikenji yebe.

⁶ Katuvua bateleje bivua bambi bena mudimu bebe, bambile bakalenga betu, bamfumu betu, batatuetu, ne bantu bakuabu bonsu, pavuabu babamanyishe malu mu dina diebe.

⁷ Wewe Maweja-Nangila, kuena ne tshilema! Tuetu tudi ne bua kudipuekesha, bu mutudi tuenza lelu. Tuetu bonsu tudi ne bua kuenza nanku, ne badi mu Yerushalayime ne mu Yuda, ne bena Izrayele bakuabu bonsu badi pabuipi ne badi kule, ne badi batangalake mu matunga auvua mubatume bua dikutombokela diabu.

⁸ Eyo, Maweja-Nangila wetu, tuetu, bakalenga betu, bamfumu betu, ne batatuetu, tudi tufua bundu, bualu tuvua babenge diyi diebe!

⁹ Kadi wewe Maweja-Nangila, Mvidi Mukulu wetu, bu muudi utunanga, udi utufuila luse, nansha tuetu bakutombokele.

¹⁰ Katuvua bakuteleje, pauvua ututumina diyi kudi bambi, bena mudimu bebe, ulomba bua tutumikile mikenji yebe.

¹¹ Tshisamba tshijima tshia bena Izrayele tshiwa tshishipe mikenji yebe, tshisesuke ku malongesha ebe. Nanku milawu idi mifunda mu mikenji ya muena mudimu webe Moshe, yatukuatshi bua buntomboji buetu ebu.

¹² Wewe udi muenze tshiuvua muambe bualu buetu ne bua bamfumu badi batuludika: udi mututumine mu Yerushalayime makenga makole adi kaayi manji kukuata bantu bakuabu pa buloba.

¹³ Maweja-Nangila Mvidi Mukulu wetu, makenga aa mmatukuate, bilondeshile mudibu bafunde mu mikenji ya Moshe. Kadi tuetu katuvua bakusengelele, bua utufuile luse. Katuena balekele mibi yetu. Katuena bangate meyi ebe ne mushinga.

¹⁴ Ke paudi mututumine amu makenga aa. Bualu wewe Maweja-Nangila, Mvidi Mukulu wetu, udi ne diyi dimue mu malu onsu audi wenza. Kadi tuetu katuvua batumikile meyi ebe!

¹⁵ “Maweja-Nangila Mvidi Mukulu wetu, pauvua mupatule bantu bebe mu ditunga dia Ejipitu ku bukole buebe, uvua mupete lumu lunene, luutshidi nalu too ne lelu. Kadi tuetu tuvua babenge diyi diebe. Nanku tudi bena tshibawu.

¹⁶ Maweja-Nangila, utuenzele tshiakabidi malu mempe. Lekela tshiji tshiudi mukuatshile Yerushalayime, tshimenga tshiebe, mukuna webe wa tshijila. Bua bilema bietu ne bua mibi ya batatuetu, matunga onsu adi netu mutumba adi amu apenda Yerushalayime ne tshisamba tshiebe.

¹⁷ Maweja-Nangila, Mvidi Mukulu wetu, teleja ditendelela ne dikusengelela dianyi. Bua banemeke dina diebe, utangile ne kalolu muaba webe wa tshijila udibu banyanga.

¹⁸ Mvidi Mukulu wanyi, teleja, tangila ne ntema. Umone mudi tshimenga tshietu tshibutuke, tshimenga tshidi tshikujidila. Katuena tukusengelela bualu tudi bantu bimpe to, kadi bualu wewe udi ne dinanga dia kashidi.

¹⁹ Maweja-Nangila, diteleja! Maweja-Nangila, utufuile luse! Maweja-Nangila, teya matshi! Mvidi Mukulu wanyi, bua dina diebe, kujangaluki bua kusungidila tshimenga etshi ne tshisamba etshi bidi bikujidila.

Bidimu makumi muanda mutekete

²⁰ “Mwa ntendelela amu kutendelela, ntonda mibi yanyi, ne ya bena Izrayele, tshisamba tshianyi. Mwa nsengelela Mvidi Mukulu wanyi bua mukuna wende wa tshijila.

²¹ Pantshiwa ntendelela nanku, Ngabriyele, mutumibue wa Mvidi Mukulu, umvua mumone kumpala, diba diwa Mvidi Mukulu mundeje malu, kusemena pabuipi nanyi ne lukasa luonsu, diba didibu balambula mulambu wa dilolu.

²² Kungambilaye ne: ‘Daniyele, ndi mufike mpindiewu bua kutokesha lungenyi luebe.

²³ Pauvua mutuadije kutendelela Mvidi Mukulu, Mvidi Mukulu mmuambe bualu. Ndi mufike bua kukuambilabu, bualu Mvidi Mukulu udi mukunange. Udibambe bua kumvua ne kujingulula bualu budi Mvidi Mukulu ukuleja.

²⁴ Mbapeshe tshisamba tshiebe ne tshimenga tshia tshijila tshiudi musombe bidimu makumi muanda mutekete, bua bajikije ditomboka diabu, balekele malu mabi, bafuilangane luse, bakose nsambu pa yoyi kashidi. Nanku malu adi Mvidi Mukulu uleja, adi bambi bambe, neakumbane. Nebajidile tshiakabidi nzubu wa Mvidi Mukulu wa tshijila.

²⁵ Umanye bimpe, ujingulule ne: kudi bidimu muanda mutekete misangu muanda mutekete, kubangila ku diba divuabu bamanyishe mukenji wa dipingana dia bena tshimuangi, ne wa dibakulula dia Yerushalayime, too ne ku diba didi mfumu wa tshijila upatuka kuudi. Pashishe bidimu muanda mutekete misangu makumi asambombu ne ibidi nebibakulule tshimenga ne bimana biatshi. Kadi matuku awu neikale a ntatu.

²⁶ Ku nshikidilu kua bidimu muanda mutekete bivudija misangu makumi asambombu ne ibidi ebi, nebashipe muntu wa tshijila, kakuyi udi umusungidila. Pashishe mfumu mukuabu neafike ne tshiluilu tshiende. Neabutule tshimenga ne muaba wa tshijila. Kadi mfumu ewu neajimine ku tshiji tshia Mvidi Mukulu. Kadi too ne ku lufu luende, nealuangane mvita ya tshinyangu bu muvuabu babijadike.

²⁷ Mu bidimu muanda mutekete bia ku nshikidilu, mfumu ewu neakengeshe tshisumbu tshinene tshia bantu bikole. Kunyima kua bidimu bisatu ne tshitupa, nealekeshe difila dia milambu ya kuosha, ne dia bintu bia pa madimi. Muena tshinyangu ewu neenze malu mabi ne lukasa luonsu, too ne diba didiye ufua lufu luvua Mvidi Mukulu mujadike.’ ”