Danyele 6 - MUKANDA WA MYIDI MUKULU

¹ Ke Daryaveshe, mukalenga wa ditunga dia Madayi, kumupingana mu bukalenga. Uwa ne bidimu makumi asatu ne bibidi.

Baluishi ba Daniyele badi bamuelela tshitungu

² Daryaveshe kupangadika bua kuteka bantu lukama ne makumi abidi mu bukalenga buende, badi mua kuleja mpala wende mu tshitupa tshionsu tshia buloba buende.

³ Ku mutu kua balombodi aba lukama ne makumi abidi ba bitupa bia buloba, Daryaveshe kuteka bamfumu basatu, bua kubatangila, bua muntu nansha umue kanyangi bumfumu bua mukalenga wa bakalenga. Daniyele uvua umue wa ku bamfumu aba.

⁴ Uwa mupite bamfumu babidi bakuabu, ne balombodi bonsu ba bitupa bia buloba, ku lungenyi lua pa bualu luvuaye nalu. Mukalenga wa bakalenga uvua musue kumupesha muanzu wa kutangila malu a mu bukalenga buende bonsu.

⁵ Nanku bamfumu bakuabu, ne balombodi ba ditunga, kubanga kukeba tshilema tshiwa Daniyele mua kuikala muenze mu bulombodi buende bua ditunga. Kadi kabawa bamupete ne tshilema nansha tshimue, dipanga nansha dimue, bualu uvua muntu muakane tshishiki. Kabakumusangana ne bualu bua kumupishila.

⁶ Nanku bantu aba kuamba ne: “Katuena mua kupeta bualu bua kufunda nabu Daniyele, anu tuetu bakeba mu mikenji ya Mvidi Mukulu wende.”

⁷ Nanshabu kujingakana. Bamfumu babidi ne balombodi ba ditunga kuya kudi mukalenga wa bakalenga, kumuambila ne: — Mukalenga wa bakalenga Daryaveshe, kuata ku mundundu!

⁸ Bamfumu ba mu bukalenga buebe, balumbuluishi, balombodi ba bitupa bia buloba, ne balombodi ba ditunga, bavua babuele mu tshipangu, bafile meji a ne: utume diyi, wele mukenji mukole, wambe ne: Matuku makumi asatu, muntu udi kayi untendelela meme mukalenga wa bakalenga, kadi utendelela mvidie mikuabu, nansha munga muntu, bamuele mu buina bua nyama ya ntambue.

⁹ Mukalenga, ela mukenji awu. Funda ne dina diebe pa mukanda udibu bafunda mukenji, bua muntu kayi mua kushintulula, bualu mmikenji ya bena Madayi ne bena Persa idibu kabayi mua kushintulula.

¹⁰ Ke mukalenga wa bakalenga Daryaveshe kufunda dina diende pa mukanda, uvua ne mukenji awu.

Badi bela Daniyele mu buina bua nyama ya ntambue

¹¹ Pakamanya Daniyele ne: Mukalenga wa bakalenga mmufunde dina diende pa mukanda uvua ne mukenji awu, kubuelaye mu nzubu muende. Kubandaye ku nzubu wa kulu, kunzulula madidishi awa matangile ku Yerushalayime. Uvua utua binu panshi, utendelela, utumbisha Mvidi Mukulu wende misangu isatu ku dituku, muvuaye wenza pa tshibidilu.

¹² Baluishi bende kufika lukasa, kumusangana utendelela, sengelela Mvidi Mukulu wende.

¹³ Kuyabu kudi mukalenga wa bakalenga, bamuambila ne: — Mukalenga wa bakalenga, wewe kuela mukenji wa ne: matuku makumi asatu, muntu yonsu watendelela mvidi mukuabu, anyi muntu mukuabu, kayi untendelela meme nkayanyi, nebamuele mu buina bua nyama ya ntambue. Ki mmomu anyi? — Bulelela, ke dipangadika dituvua bangate, bilondeshile meyi a bena Madayi ne a bena Persa, adi muntu kayi mua kushintulula.

Mukalenga munene kuandamuna ne:

¹⁴ Pashishe bantu abu kuambila mukalenga munene ne: — Mukalenga, Daniyele, umue wa mu bapika ba mu ditunga dia Yuda, kena ukunemeka nansha wewe, nansha mukenji uudi muele. Udi utendelela Mvidi Mukulu wende misangu isatu ku dituku.

¹⁵ Mukalenga wa bakalenga umvua miaku ayi, kubungamaye bikole. Kuelaye meji, ukeba muvuaye mua kupandisha Daniyele. Too ne pakabuela diba uvua anu ukeba mushindu wa kumusungidila.

¹⁶ Kadi baluishi ba Daniyele kupingana lukasa kudi mukalenga wa bakalenga, kumuambila ne: — Mukalenga wa bakalenga, udi mumanye bimpe ne: bilondeshile meyi a bena Madayi ne a bena Persa, mukenji muela kudi mukalenga munene kabena mua kushintulula to.

¹⁷ Nanku mukalenga wa bakalenga kutuma diyi, bua bafike ne Daniyele. Kumuelabu mu buina bua nyama ya ntambue. Mukalenga wa bakalenga kuambila Daniyele ne: — Amu Mvidi Mukulu webe uudi utendelela ku dituku ku dituku, ke udi mua kukusungidila.

¹⁸ Kutualabu dibue bua kudijibika ku mushiku wa buina. Mukalenga wa bakalenga kutua tshitampi tshiende pa dibue, ne tshia bantu banene ba mu bukalenga buende, bua muntu nansha umue kashintuludi bualu bua Daniyele.

¹⁹ Pashishe mukalenga wa bakalenga kupingana ku nzubu wende wa bukalenga bua kulala. Kubengaye biakudia. Nansha yeye ne tshitabela, kubengaye ne manaya onsu avua mua kumumbusha lutetuku.

Daniyele udi upatuka ne bukole bua mubidi mu buina bua nyama ya ntambue

²⁰ Patshiatshia, pakavua panshi patoke, mukalenga wa bakalenga kujuka, kuya lukasa ku buina bua nyama ya ntambue.

²¹ Pakafikaye pabuipi ne buina, kubikilaye Daniyele ne diyi dia dibungama, umukonka ne: — Daniyele, muntu wa Mvidi Mukulu udi ne muoyi, Mvidi Mukulu webe uudi utendelela ku dituku ku dituku, wakusungididi ku nzadi ya nyama ya ntambue anyi?

²² Daniyele kumuandamuna ne: — Mukalenga, kuata ku mundundu!

²³ Eyowa, Mvidi Mukulu wanyi uvua mutume mutumibue wende bua kukanga mbanga ya nyama ya ntambue. Kayena mingenzele bibi. Bualu tshiena muenze tshibawu ku mesu a Mvidi Mukulu. Kabidi tshiena mukuenzele tshilema nansha tshimue, mukalenga!

²⁴ Mukalenga wa bakalenga muwule tente ne disanka, kutuma diyi bua bapatule Daniyele mu buina. Pakamupatulabu, bakamusangana kayi ne mputa nansha umue pambidi, bualu uvua mutekemene kudi Mvidi Mukulu wende.

²⁵ Pashishe mukalenga wa bakalenga kutuma diyi bua bakuate bantu bonsu bavua basonguela Daniyele. Bavua babela mu buina bua nyama ya ntambue, ne bakaji babu ne bana. Kabayi banji kufika panshi pa tshiina, nyama ya ntambue kubakuata, kubatshibula mifuba.

²⁶ Matuku apita, mukalenga wa bakalenga kutumina bantu ba matunga onsu, ba bisamba bionsu, ba miakulu yonsu, badi basomba pa buloba bujima, mukanda ubambila ne: “Ndi nnujingila ditalala dijima!

²⁷ “Ndi ngela mukenji ewu ne: Mu buloba buonsu budi ku bumfumu buanyi, muntu yonsu udi ne bua kuleja mudiye unemeka muende muonsu Mvidi Mukulu wa Daniyele. Yeye ke Mvidi Mukulu wa muoyi, udi ushala tshiendelele. Bukalenga buende budi bushala kashidi. Bumfumu buende kabuena bujika.

²⁸ Udi upandisha, usungidila. Udi wenza bishima ne malu a kukema mu diulu ne pa buloba. Yeye ke uvua musungidile Daniyele, ku nzadi ya nyama ya ntambue.”

²⁹ Ke Daniyele kupeta muanzu munene mu bukalenga bua Daryaveshe, pashishe ne bua Koreshe, mukalenga wa bakalenga wa bena Persa.