Danyele 5 - MUKANDA WA MYIDI MUKULU

Mukalenga Baltazare udi ulongolola didia dinene

¹ Dituku dikuabu, mukalenga Baltazare kulongoluela bantu banene tshinunu ba mu bukalenga buende didia dinene. Kunuaye nabumaluvu.

² Pakavuamaluvu mamukuate, kutumaye diyi, bua bafike ne makopu a tshiamu tshia mpawungi ne a tshiamu tshitoke tshia mushinga mukole, avua tatuende Nebukadnesare mupawule mu nzubu wa Mvidi Mukulu wa mu Yerushalayime. Uvua musue kunuinamu maluvu, yeye, ne bantu banene ba mu bukalenga buende, ne bakaji bende ba biuma, ne bakaji bavuaye mubanjije.

³ Kufikabu ne makopu a tshiamu tshia mpawungi avua muaba wa tshijila mu Yerushalayime. Mukalenga kunuinamu maluvu, ne bonsu bavuaye mubikile.

⁴ Bonsu bamane kunua maluvu a bungi, kutumbishabu mvidie idibu batula ne tshiamu tshia mpawungi, ne tshiamu tshitoke tshia mushinga mukole, tshikunze, tshifiike, ne mvidie idibu basonge ne mabaya, kabidi ne mabue.

⁵ Diba adi, tshianza tshia muntu kumuenekela pabuipi ne tshitekelu tshia miendu. Tshianza kufunda bualu ku tshimana tshia nzubu wa bukalenga tshivuabu balaba lupemba. Mukalenga pakumonaye tshianza etshi tshifunda,

⁶ mpala wende kutokoloka, meji kulubakana, bowa kumukuata, luzakalu kumupangisha luendu.

⁷ Mukalenga kuela diyi dikole ne: bafike ne bena meji ba mu Babilone, benji ba majimbu, bena bilengulengu ne bamanyi ba malu a mitotu. Kubambilaye ne: — Muntu yonsu wabala tshidibu bafunda etshi, watshinjinguluila, nebamuvuadike bilamba bia lumu. Nebamuele mabue a tshiamu tshia mpawungi mu nshingu. Neikale umue wa ku balombodi banene ba mu ditunga.

⁸ Bena meji bonsu ba mukalenga kusemena pabuipi. Kadi kakuvua nansha umue wa kudibu uvua mua kubala, nansha kumvuija tshidibu bafunde.

⁹ Baltazare kukuatshika bowa, mpala kutokoloka bipite. Bantu banene ba mu bukalenga buende kupampakana.

Daniyele udi umvuija bualu busokome buvuabu bafunde ku tshimana

¹⁰ Mukalenga mukaji, mamuende wa mukalenga, kumvua mbila ivua mukalenga ne bantu banene ba mu bukalenga buende bela. Yeye kubuela mu nzubu muvuabu badie, kuambaye ne: — Mukalenga, kuata ku mundundu! Kupampakanyi nansha! Mpala webe katokoloki to!

¹¹ Kudi muntu mu bukalenga buebe udi ne mueyelu wa mvidie ya tshijila. Mu tshikondu tshia tatuebe, bakasangana muntu awu muikale udianza kumona malu, muikale ne lungenyi ne meji bu bidi mvidie nabi. Ke pavua tatuebe, mukalenga Nebukadnesare, mumuteke mfumu wa babuki ba mbuku, wa benji ba majimbu, wa bena bilengulengu ne bajinguludi ba malu a mitotu.

¹² Muntu awu udi ne lungenyi, ne meji a pa buawu a kujingulula nawu bilota, kujandula nshinga, ne kumvuija malu masokome. Babikile muntu awu. Ke Daniyele uvua mukalenga muinyike dina ne Beltashare. Yeye neajingulule mukalenga tshidibu bafunde etshi.

¹³ Kufikabu ne Daniyele kua mukalenga. Awu kumukonka ne: — Wewe ke Daniyele, muena Yuda, wa mu bapika bavua mukalenga, tatu wanyi, mukuate mu Yuda, anyi?

¹⁴ Mvua mumvue lumu luebe, bamba ne: Wewe udi ne mueyelu wa mvidie, udi udianza kumona malu ne lungenyi ne meji a pa buawu.

¹⁵ Bavua bantuadile bena meji ne benji ba majimbu, bua babale bualu budibu bafunde ebu, babumvuija. Kadi mbapange bualu.

¹⁶ Kadi mvua mumvue lumu luebe ne: wewe udi ne lungenyi lua kujingulula nshinga ne kumvuija malu masokome. Wewe mubale bualu budibu bafunde ebu, mubumvuije kabidi, nebakuvuadike bilamba bia lumu, bakuele mabue a tshiamu tshia mpawungi mu nshingu. Newikale umue wa ku balombodi banene ba mu ditunga.

¹⁷ Daniyele kuandamuna mukalenga ne: — Mukalenga, lama bintu biebe bia masanka, ne bia kalumbandi, nansha ubipeshe bantu bakuabu. Kadi nenkubadile bualu budibu bafunde, kabidi nenkumvuijebu.

¹⁸ Mvidi Mukulu, Muena kulu, uvua muenze tatuebe Nebukadnesare mukalenga munene, wa lumu ne bubanji.

¹⁹ Bantu ba matunga onsu, ba bisamba bionsu, ne ba miakulu yonsu, bavua bazakala kumpala kuende, bamutshina bua bunene buvua Mvidi Mukulu mumupeshe. Uvua ushipa bavuaye musue kushipa. Uvua ushiya ne muoyi bavuaye musue kushiya nawu. Uvua ubandisha anyi ufuisha bundu, bavuaye musue kubandisha anyi kufuisha bundu.

²⁰ Kadi tatuebe kuditambisha, kuwula tente ne kapetu. Nanku bakamumbusha mu nkuasa wende wa bukalenga, kumunyenga ne lumu luvuaye nalu.

²¹ Bakamuipata munkatshi mua bantu, bamupuekesha milongu ya nyama. Kusombaye ne nyama ya mpunde ya mu tshisuku. Kudiaye bisosa bu ngombe. Mubidi wende kubola ne lumuma, too ne pakamanyaye ne: Mvidi Mukulu, Muena kulu, ke udi mfumu wa makalenga a bantu, ke udi upesha muntu udiye musue bukalenga.

²² Wewe muanende, Baltazare, uvua mumanye malu onsu aa bimpe. Kadi kuvua mudipuekeshe nansha.

²³ Wakupetula Mvidi Mukulu wa mu diulu, pauvua muele diyi bua bakutuadile makopu a tshijila a mu nzubu wa Mvidi Mukulu. Nuakunuinamu maluvu, wewe, bantu banene ba mu bukalenga buebe, bakaji bebe ba biuma, ne baudi mubanjije. Kabidi udi mutumbishe mvidie idibu bafula ne tshiamu tshitoke tshia mushinga mukole, tshia mpawungi, tshiamu tshikunze ne tshifiike, ne mvidie idibu basonga ne mabaya, kabidi ne mabue. Ke mvidie idi kayiyi imona, kayiyi yumvua, kayiyi mimanye tshintu. Uvua mubenge kutumbisha Mvidi Mukulu, udi mukulame, mumanye malu ebe onsu.

²⁴ Nanku Mvidi Mukulu wakutuma tshianza bua kufundatshi bualu ebu.

²⁵ Bualu budibu bafunde budi ne: MENE, MENE, TEKELE ne PARSINE.

²⁶ Diumvuija didi nenku: MENE, mmomumue ne: bakubala! Mbuena kuamba ne: Mvidi Mukulu mmubale matuku a bukalenga buebe, mmusue kuajikija.

²⁷ TEKELE, mmomumue ne: bakupima. Mbuena kuamba ne: bakupimi ne tshipimu. Bakusanganyi kuyi ne bujitu;

²⁸ PERESE, mmomumue ne: bakuabanyi. Mbuena kuamba ne: mbatapulule bukalenga buebe, bua kubupesha bena Madayi ne bena Persa.

²⁹ Diakamue Baltazare kutuma diyi bua bavuadike Daniyele bilamba bia lumu, bamuele mabue a tshiamu tshia mpawungi mu nshingu. Kumuvuijabu umue wa ku balombodi banene ba mu ditunga.

³⁰ Butuku buvua bulonda, kushipabu Baltazare, mukalenga wa ditunga dia Babilone.