Danyele 3 - MUKANDA WA MYIDI MUKULU

Nebukadnesare udi utuma diyi bua bakukuile lupingu lua tshiamu tshia mpawungi

¹ Mukalenga Nebukadnesare kuenzeja lupingu lua tshiamu tshia mpawungi, lua metre makumi asatu mu bule, ne metre asatu mu butshiama. Kuluimanyikaye mu mpata wa Dura, mu buloba bua Babilone.

² Mukalenga Nebukadnesare kutuma diyi bua basangishe balombodi ba maloba, balombodi ba midimu, balombodi ba bimenga, bafidi ba ngenyi, balami ba bibutshilu, bandumbulula ne balombodi bakuabu ba mu bukalenga. Bavua ne bua kufika bonsu ku tshibilu tshia dibanjija dia lupingu luvua mukalenga Nebukadnesare muenzeje.

³ Balombodi bonsu ba mu bukalenga abu kutuilangana ku tshibilu, kuimana kumpala kua lupingu bua kulubanjija.

⁴ Mulombodi wa tshibilu kuela diyi dikole, wamba ne: — Nuenu bantu ba mu matunga onsu, ba bisamba bionsu, ba miakulu yonsu, telejayi tshindi ngamba:

⁵ “Diba dinudi numvua muadi wa mpungi, nshiba, nzenze, lunkombe, nansha wa biombelu bikuabu bionsu, nuiname panshi, nukukuile lupingu lua tshiamu tshia mpawungi ludi mukalenga Nebukadnesare muenzeje.

⁶ Muntu yonsu udi ubenga kuinama panshi, kabidi ubenga kukukuila lupingu alu, badi bamuela diakamue mu tshikutu tshidi ne kapia kakole.”

⁷ Nanku bantu ba matunga onsu, ba bisamba bionsu, ne ba miakulu yonsu, pasuabu bumvua muadi wa mpungi, nshiba, lunzenze, lunkombe, ne wa biombelu bikuabu bionsu, bavua binama panshi, bakukuila lupingu lua tshiamu tshia mpawungi luvua mukalenga Nebukadnesare muenzeje.

Balunda ba Daniyele badi amu balamata Mvidi Mukulu

⁸ Tshitupa tshipi, bena Babilone bakuabu kufika, bua kusonguela bena Yuda.

⁹ Kuambilabu mukalenga Nebukadnesare ne: — Mukalenga, kuata ku mundundu!

¹⁰ Mukalenga, wewe nkayebe, ke uvua mutume diyi ne: “Muntu yonsu udi umvua muadi wa mpungi, nshiba, lunzenze, lunkombe, ne wa biombelu bikuabu bionsu, iname panshi bua kukukuila lupingu lua tshiamu tshia mpawungi.

¹¹ Muntu yonsu udi ubenga kuinama panshi, ubenga kukukuila lupingu, nebamuele diakamue mu tshikutu tshidi ne kapia kakole.”

¹² Kadi kudi bena Yuda bakuabu, baudi muteke ku mutu kua malu a bulongolodi bua ditunga dia Babilone, mena abu adi: Shadrake, Meshake ne Abede-Nego. Mukalenga, bantu aba kabena banemeka diyi diebe diudi muele, kabena benzela mvidie yebe mudimu, kabena bakukuila lupingu lua tshiamu tshia mpawungi luudi muenzeje.

¹³ Nebukadnesare kufika munda bikole, kutumaye diyi bua bafike ne Shadrake, Meshake ne Abede-Nego. Kufikabu nabu kudi mukalenga.

¹⁴ Mukalenga kubakonka ne: — Nuenu Shadrake, Meshake ne Abede-Nego, kanuena nuenzela mvidie yanyi mudimu, kanuena nukukuila lupingu lua tshiamu tshia mpawungi lundi muenzeje, bua tshinyi?

¹⁵ Nenumvue kabidi mpindiewu bela mpungi, nshiba, nzenze, lunkombe, ne biombelu bikuabu bionsu. Nanku mpindiewu nenuiname panshi, nukukuile lupingu lundi muenzeje anyi? Kadi binuabenga kulukukuila, diakamue badi banuela mu tshikutu tshidi ne kapia kakole. Diba adi, mvidie kaayi udi mua kunusungidila kundi?

¹⁶ Shadrake, Meshake ne Abede-Nego kuandamuna mukalenga Nebukadnesare ne: — Mukalenga, katuena basue kudibingisha kumpala kuebe to.

¹⁷ Kadi umanye ne: Mvidi Mukulu wetu, Mvidi Mukulu utudi tukuatshila mudimu, udi mua kutusungidila. Eyowa, udi ne bukole bua kumpatula mu tshikutu tshia kapia, kutunyenga mu bianza biebe.

¹⁸ Nansha yeye kayi musue kutusungidila, Mukalenga, umanye ne: katuena mua kukuatshila mvidie yebe mudimu, nansha kutendelela lupingu lua tshiamu tshia mpawungi luudi muenzeje to.

¹⁹ Mukalenga Nebukadnesare kumvua tshiji tshikole, kufikilaye Shadrake, Meshake ne Abede-Nego munda. Ke kutumaye diyi bua batemeshe kapia mu tshikutu kapite ka tshibidilu misangu muanda mutekete.

²⁰ Kutumaye diyi bua bamue bena bukitu ba mu bena mvita bende basuike Shadrake, Meshake ne Abede-Nego, bahele mu tshikutu atshi tshivua ne kapia kakole.

²¹ Diakamue kusuikabu bantu abu, bavuale bilamba biabu bimpe, mipanu, mintumpu, tuzaku tuabu, bifulu biabu ne bilamba bikuabu. Kubelabu mu tshikutu tshia kapia.

²² Bilondeshile diyi dikole divua mukalenga mutume, bavua batemeshe kapia kapite bukole mu tshikutu. Nenku ndimi ya kapia aka kushipa bantu bavua baye kuela Shadrake, Meshake ne Abede-Nego mu tshikutu.

²³ Bantu aba basatu, Shadrake, Meshake ne Abede-Nego, kuya kupona mu tshikutu tshia kapia basuika.

Balunda basatu mu tshikutu tshia kapia

²⁴ Diakamue mukalenga Nebukadnesare kumvua bowa, kujuka kulu lukasa, kukonka balombodi ba mu bukalenga buende ne: — Katuvua beela bantu balume basatu basuika mu kapia emu anyi? Kuandamunabu ne: — Eyowa, mukalenga, tuvua babeela.

²⁵ Ke mukalenga kuamba ne: — Kadi ndi mmona bantu banayi kabayi basuike, bendakana mu kapia, kabayi ne bualu, muntu nansha umue kayi ne mputa. Mpala wa muntu muinayi udi mufuanangane ne mpala wa mvidie.

²⁶ Nebukadnesare kusemena pabuipi ne mushiku wa tshikutu tshia kapia kuela lubila lukole ne: — Shadrake, Meshake, Abede-Nego, batendeledi ba Mvidi Mukulu wa mu diulu, patukayi, luayi! Diakamue kupatukabu bonsu basatu mu kapia.

²⁷ Balombodi ba maloba, ba matunga, ba bimenga, ne balombodi ba mu bukalenga kukungila bua kukenketa bantu abu. Kumonabu ne: kapia kakavua kabenzela bualu nansha bumue. Nsuki yabu kayivua mipie to. Bilamba biabu kabivua bipia. Nansha mupuya wa kapia kauvua ubanunka pambidi to.

²⁸ Ke Nebukadnesare kuela lubila ne: — Mvidi Mukulu wa Shadrake, Meshake ne Abede-Nego atumbe! Udi mutume mutumibue wende bua asungidile bantu bende bavua bamueyemena, babenga kutumikila diyi dianyi dia bukalenga. Bavua basue bua babakengeshe pa mutu pa kutendelela ne kukukuila mvidie mikuabu pa muaba wa Mvidi Mukulu wabu.

²⁹ Nenku ndi ntuma diyi ne: “Muntu ne wa mu tshisamba kaayi, wa ditunga kaayi, nansha wa muakulu kaayi, udi udiwula Mvidi Mukulu wa Shadrake, Meshake ne Abede-Nego, nebamukose bitupa bitupa, nebupule nzubu wende, neashale dikolu. Bualu kakuena mvidie mukuabu udi mua kusungidila bantu bu mudi ewu muenze.”

³⁰ Pashishe mukalenga kupesha Shadrake, Meshake ne Abede-Nego mianzu minene mipite ya kumpala mu buloba bua Babilone.

Mukalenga udi ulota tshilota tshibidi: mutshi munene

³¹ Mukalenga Nebukadnesare kutumina bantu ba bisamba bionsu diyi, ba matunga onsu, ne ba miakulu yonsu, bavua basombe pa buloba buonsu, wamba ne: “Ndi nnujingila bupole buvule!

³² “Ndi ne disanka bua kunumanyisha bishima ne malu a kukema bisua Mvidi Mukulu, Muena kulu, mungenzele.

³³ Bishima biende bidi bipite bunene! Malu ende a kukema adi mapite bukole! Mvidi Mukulu ewu neadie bukalenga kashidi, bumfumu buende kabuena bujika!