Danyele 12 - MUKANDA WA MYIDI MUKULU

Diba dia dikenga ne dibika dia ku lufu

¹ “Mutumibue wa Mvidi Mukulu kungambila kabidi ne: ‘Tshikondu atshi nebafike kudi Mikayele, mfumu wa batumibue ba Mvidi Mukulu, mulami wa bantu bebe. Dituku adi nedikale dia dikenga, didi kadiyi dianji kumueka katshia bafuka bantu, too ne ku diba adi. Pashishe bana benu badi ne mena abu mafunda mu mukanda wa muoyi nebapande.

² Bantu ba bungi badi mu kandondu nebabike ku lufu, bamue bua kuikalabu ne muoyi wa tshiendelele, bakuabu bua kuikala ne bundu, bashala ne bowa tshiendelele.

³ Bantu ba lungenyi nebakenke bu bintu bia mu diulu. Bantu bavua bambuluisha bakuabu bua batendelele Mvidi Mukulu ne muoyi umue, nebakenke bu mitotu tshiendelele.

⁴ “ ‘Wewe Daniyele, ulame malu aa munda. Kuambidi muntu malu a mu mukanda ewu padi diba dia ku nshikidilu kadiyi dianji kufika. Pashishe bantu ba bungi nebaubale. Lungenyi luabu ne luvulangane.’

Dituku dia nshikidilu kabena badimanye

⁵ “Diba dimvua meme Daniyele ntangila bualu buvua Mvidi Mukulu undeja, bantu bakuabu babidi kumueneka bimane ku musulu, ewu dia muamua, mukuabu dia munemu.

⁶ Umue wabu kukonka muntu uvua muvuale bilamba bia buanda bua ndanda, muimane pa mutu pa mayi a musulu ne: ‘Malu aa a kukema neajike diba kaayi?’

⁷ Muntu uvua muvuale bilamba bia buanda bua ndanda kuela bianza bibidi mulu. Meme kumvua wamba ne: ‘Ndi nditshipa mu dina dia Mvidi Mukulu udi ne muoyi wa tshiendelele ne: malu aa neajike papita bidimu bisatu ne tshitupa. Neajike patekeshabu bukole buonsu bua tshisamba tshia Mvidi Mukulu.’

⁸ “Meme Daniyele, kumvua miaku ayi, kadi tshiyi nyijingulula. Ke pamvua nkonka ne: ‘Maweja-Nangila wanyi, malu aa neajike munyi?’

⁹ Kungandamunaye ne: ‘Daniyele, kupampakanyi nansha. Ulame miaku eyi bimpe too ne diba dia nshikidilu.

¹⁰ Nebumbushe bantu ba bungi mikiya. Nebabatokeshe. Makenga neabalengeje. Bantu babi, badi kabayi mua kujingulula malu, nebatungunuke ne dienza dia malu abu mabi. Kadi bantu ba lungenyi nebajingulule malu adi enzeka.

¹¹ Kubangila ku diba didibu bumbusha mulambu wa buatshia buatshia wa kuoshela Mvidi Mukulu, ne ku diba didibu bateka “Bualu bubi butambe” pa tshioshelu, matuku neapite tshinunu ne nkama ibidi ne makumi tshitema.

¹² Bantu badi bindila, bashindame mu ditaba, matuku tshinunu nkama isatu ne makumi atanu, badi bena diakalenga.

¹³ Kadi wewe Daniyele, unanukile too ne ku nshikidilu. Nenku newikishe pashishe. Neujuke bua kuangata difutu diebe ku nshikidilu kua bidimu.’ ”