Bienzedi 3 - MUKANDA WA MYIDI MUKULU

Bapostolu badi bajikija muntu disama dia tshibombu

¹ Dituku dikuabu Petro ne Yowanane bavua babuela mu nzubu wa Mvidi Mukulu diba dia kutendelela dia isatu wa dilolu.

² Ku tshiibi tshia nzubu tshivuabu binyika ne: “Tshilengele,” kuvua muntu mulela tshibombu. Dituku dionsu bavua baya kumuteka muaba awu, bua amone mua kulomba tshia pa luse kudi bantu bavua babuela mu nzubu.

³ Muntu awu umona Petro ne Yowanane babuela mu nzubu wa Mvidi Mukulu amu, kulombaye tshia pa luse.

⁴ Petro ne Yowanane kumutangila talalaa. Ke Petro kumuamba ne: — Banduluka tumone, ututangile!

⁵ Muntu awu kubatangila ne ntema yonsu, utekemena kupeta kantu kudibu.

⁶ Ke Petro kumuamba ne: — Tshiena ne lukanu lua tshiamu tshitoke tshia mushinga mukole, nansha lua tshiamu tshia mpawungi. Kadi tshindi natshi, ndi nkupeshatshi: mu dina dia Yezu Kristu wa mu Nazarete, ndi nkuamba ne: juka, enda!

⁷ Pashishe Petro kumukuata ku tshianza tshia balume, kumujula. Diakamue makasa ende ne tupombu kukolabi.

⁸ Muntu awu kutua makasa panshi, kuimana bimpe, kutuadija kuenda. Kubuelaye ne bapostolu pamue mu nzubu wa Mvidi Mukulu, wenda utupika, utumbisha Mvidi Mukulu.

⁹ Bantu bonsu kumona muvuaye wenda, utumbisha Mvidi Mukulu.

¹⁰ Bakuabu kumumanyabu ne: nyeye uvua musombe ku Tshiibi Tshilengele tshia nzubu wa Mvidi Mukulu, ulomba tshia pa luse. Nanku bavua ne bowa, bakatshila bivua bimuenzekela ebi.

Petro udi ulongesha bantu mu nzubu wa Mvidi Mukulu

¹¹ Bu muvua muntu awu kayi musue kushiya Petro ne Yowanane, bantu bonsu bavua bakema bikole, bunguila mu Lutanda luvuabu binyika ne “lua Shelomu,” muvua Petro ne Yowanane.

¹² Petro umona nanku, kuambilaye bantu ne: — Nuenu bena Izrayele, nudi nukema padi muntu ewu wenda bimpe bua tshinyi? Tshinudi nututangidila ntshinyi? Bienza bu tuetu badi bendesha muntu ewu ku bukole buetu tuetu, nansha bualu tudi bantu badi bitaba Mvidi Mukulu!

¹³ Kabiena nanku to! Mvidi Mukulu wa Abrahame, wa Izake, ne wa Yakobe, Mvidi Mukulu wa bankambua betu, mmuleje patoke butumbi budi muntu wende Yezu nabu. Nuenu kumufila kudi bamfumu, kumubenga kumpala kua Pilate. Kadi Pilate uvua musue kumulekela.

¹⁴ Nuenu kubenga muntu wa tshijila, muitabi wa Mvidi Mukulu, kulomba Pilate, bua anulekele mushipianganyi.

¹⁵ Nanku nuenu kushipesha mfumu wa muoyi. Kadi Mvidi Mukulu mmumubishe ku lufu. Tuetu tudi bajadiki ba bualu ebu.

¹⁶ Muntu ewu unudi bamona, kabidi bamanye, udi wenda ku bukole bua dina dia Yezu, ne bua ditaba divuaye nadi pa dina adi. Bu muvuaye muitabe Yezu, ke padiye wenda bimpe kashidi, bu munudi bamumona mujukilamu.

¹⁷ Kadi, bana betu, ndi mumanye se: nuenu ne bamfumu benu, nudi benze bualu ebu, bualu kanuvua bamanye Yezu.

¹⁸ Mvidi Mukulu mmukumbaje bivuaye mudianze kumanyisha ku kale kudi bambi bonsu ne: Kristu wende uvua ne bua kukenga.

¹⁹ Nanku nudilengeje, nupingane kudi Mvidi Mukulu, bua anujimijile mibi yenu.

²⁰ Diba adi Mvidi Mukulu neasemeje pabuipi matuku a lupandu. Neanutumine Kristu uvuaye mudianze kunusunguila, ke Yezu mene.

²¹ Mpindiewu Yezu udi ne bua kushala mu diulu, too ne ku tshikondu tshidi Mvidi Mukulu ne bua kuakajilula bionsu, bu muvuaye muambe kale kudi bambi bende ba tshijila.

²² Moshe uvua muambe ne: “Munkatshi mua bana benu, Maweja-Nangila Mvidi Mukulu wenu neanupatuile muambi bu meme. Nenumuteleje, nuitabe bionsu bianuambilaye.

²³ Muntu yonsu wabenga kuitaba muambi awu, nebamuipate mu tshisamba tshia bantu ba Mvidi Mukulu, bamushipe.”

²⁴ Bituadija ku Samuwele, bambi bonsu ku muntu ku muntu bavua badianjile kumanyisha bantu malu adi menzeke matuku aa.

²⁵ Nuenu nudi bantu bavua Mvidi Mukulu mulaye kudi bambi. Nudi bantu bavua Mvidi Mukulu mutuile ndondu ne bankambua babu, pavuaye muambile Abrahame ne: “Bisamba bionsu bia pa buloba nebipetele diakalenga ku ndelanganyi yebe.”

²⁶ Mvidi Mukulu mmusungule muntu wende; mmudianze kumutuma kunudi, bua nulekele kulonda njila yenu mibi, nupete diakalenga.