Bienzedi 25 - MUKANDA WA MYIDI MUKULU

Polu udi musue kuya kua Kezare

¹ Bamane kubanjija Festuse mu bulombodi bua ditunga, kupita matuku asatu, kumbukaye mu Kezareya, bua kuya ku Yerushalayime.

² Kuine aku bamfumu ba batuangaji, ne bakulu ba bena Yuda, kuya kudiye bua kufunda Polu. Bavua balomba Festuse ne:

³ “Anyisha, utupingajile Polu mu Yerushalayime.” Bualu bakavua bamuelele tshitungu, bua kumushipela mu njila.

⁴ Kadi Festuse kubandamuna ne: — Polu udi mu lukanu mu Kezareya. Meme kabidi nkadi pa kupinganamu.

⁵ Nanku tuye pamue ne bamfumu benu mu Kezareya. Pikala muntu ewu muenze bualu bubi, bamufundile kuine aku.

⁶ Festuse kushala mu Yerushalayime amu matuku bu dikumi. Pashishe kupinganaye ku Kezareya. Butshia kuyaye kusomba mu nzubu wa bilumbu, kubikidisha Polu.

⁷ Polu ufika, bena Yuda bavua bafuma mu Yerushalayime kumuela munkatshi. Bavua bamufunda ne malu mabi a bungi, avuabu kabayi mua kujadika.

⁸ Kadi Polu uvua ndilumbuluila, wamba ne: — Tshiena muenze bualu nansha bumue budi bubengangana ne mikenji ya Moshe. Tshiena munyange nzubu wa Mvidi Mukulu. Tshiena mubenge Kezare.

⁹ Bua kusankisha bena Yuda, Festuse kuebeja Polu ne: — Udi musue tuye kukulumbuluisha mu Yerushalayime anyi?

¹⁰ Polu kuandamuna ne: — Ndi ku tshilumbuluilu kua Kezare. Ke kudibu ne bua kundumbuluisha. Wewe mene udi mumanye bimpe ne: tshiena muenzele bena Yuda bibi nansha kakese.

¹¹ Kadi pangikala ne tshibawu, mubunde bualu buakanyine lufu, tshiena mbenga kufua to. Kadi pikala bidi bantu aba bamba kabiyi bilelela, muntu nansha umue kena mua kumfila kudibu to. Ndi ndomba bua nutume tshilumbu tshianyi kua Kezare.

¹² Festuse mumane kuakidilangana ne bena tshipangu tshiende, kuandamunaye Polu ne: — Bu mundi mulombe bua kuya ne tshilumbu tshiebe kua Kezare, neuye kudi Kezare.

Agripa ne Berenike badi bamonangana ne Polu

¹³ Kupita matuku, mukalenga Agripa, ne muanabu wa bakaji Berenike, kufikabu mu Kezareya, bua kuela Festuse muoyi.

¹⁴ Bu muvuabu bashale amue matuku mu Kezareya, ke Festuse kukuatshila mukalenga Agripa tshilumbu tshia Polu, umuambila ne: — Muaba ewu kudi muntu uvua Felikse mushiye mu lukanu.

¹⁵ Pamvua muye ku Yerushalayime, bamfumu ba batuangaji, ne bakulu ba Tshipangu, bavua bamufunda kundi, bandomba, bua mmufundile tshibawu.

¹⁶ Mvua mubandamune ne: bena Rome kabena ne tshibidilu tshia kubindila muntu tshibawu, kayi muanji kutuilangana ne badi bamufunde, kayi mupete pa kudilumbuluila.

¹⁷ Nanku tudi balue nabu munu. Kadi tshivua muindile to. Butshia meme kubuela mu nzubu wa bilumbu, kubikidisha Polu.

¹⁸ Bavua bamufunde kufika. Kadi ki mbatele tshilema nansha tshimue, ku bimvua muelele meji.

¹⁹ Bavua belangana nende mpata, amu pa malu abu a kutendelela Mvidi Mukulu, ne pa tshilumbu tshia muntu kampanda, mumane kufua, diende Yezu. Bualu Polu udi ujadika ne: udi ne muoyi.

²⁰ Meme tshivua mumanye mua kupita ne tshilumbu etshi to. Ke pamvua muebeje Polu ne: udi musue tuye kukulumbuluisha ku Yerushalayime anyi?

²¹ Kadi Polu kulomba bua tutume tshilumbu tshiende kua Kezare. Nanku udi musue kushala mu lukanu, too ne diba didi Kezare ukosa tshilumbu tshiende. Nanku meme kutuma diyi, bua bamulame mu lukanu, too ne pangamutuma kua Kezare.

²² Mukalenga Agripa kuambila Festuse ne: — Ndi musue kudiumvuila mudi muntu awu wakula. Festuse kuandamuna ne: — Neudiumvuile maloba mudiye wakula.

²³ Butshia Agripa ne Berenike kufika, bavuale biabu bia bukalenga. Kubuelabu mu nzubu wa bilumbu, pamue ne balombodi ba basolayi, ne bantu banene ba mu tshimenga. Festuse kubikidisha Polu.

²⁴ Pashishe kuambaye ne: — Mukalenga Agripa, nuenu bonsu badi bafika muaba ewu, muoyi wenu! Tangilayi muntu ewu. Bena Yuda bonsu, ne ba mu Yerushalayime ne ba munemu, mbafike kundi bua tshilumbu tshiende, bela mbila ne: numushipe!

²⁵ Kadi meme tshiena musangane bualu bubi nansha bumue budiye mua kutuila. Bu mutataye ulomba bua tutume tshilumbu tshiende kua Kezare, ndi musue kumutuma ku Rome.

²⁶ Kadi tshiena ne bualu busunguluke bundi mua kufundila mukalenga wa bakalenga pa tshilumbu tshiende. Ke pandi mumupatule kumpala kuenu, nangananga kumpala kuebe wewe, mukalenga Agripa. Tumuele nkonku, mpete tshia kufunda.

²⁷ Bualu ndi mumone ne: mbibi kutuma muena lukanu kua Kezare, tshiyi muleje malu adibu bamusonguela nawu.