Bienzedi 23 - MUKANDA WA MYIDI MUKULU

¹ Ke Polu kutangila bena Tshipangu, wamba ne: — Bana betu, too ne lelu mvua mukumbaje bimpe bidi Mvidi Mukulu musue. Nanku kondu ka munda kakena kantuuta.

² Kadi mutuangaji munene Ananiyase kutumina bantu bavua pabuipi ne Polu diyi, bua bamutuute mapi mu mbanga.

³ Ke Polu kumuamba ne: — Wewe muena mpala ibidi, Mvidi Mukulu neakutuute! Udi apa bua kundumbuluisha bilondeshile mikenji. Kadi wewe mene udi ushipa mikenji, wamba bua kuntuutabu!

⁴ Kadi bantu bavua pabuipi ne Polu, kumuambila ne: — Udi upenda mutuangaji munene wa Mvidi Mukulu!

⁵ Polu kuandamuna ne: — Bana betu, tshivua mumanye ne: mmutuangaji munene to. Bualu mu Mukanda wa tshijila mbafunde ne: “Kanuedi mfumu wa tshisamba tshienu milawu.”

⁶ Bu muvua Polu mumanye ne: mu Tshipangu mudi Basaduke ne Baparushe, ke kuelaye diyi dikole, wamba ne: — Bana betu, meme ndi Muparushe, muana wa Baparushe. mBamfunde ku tshilumbu, bualu ndi ngitaba, ntekemena ne: bafue nebabike!

⁷ Wamba nanku, bena tshipangu kuabulukangana, bualu Basaduke ne Baparushe bakavua batandangana.

⁸ (Bualu Basaduke kabena bitaba ne: bafue nebabiike; nansha ne: batumibue ba Mvidi Mukulu ne mikishi bidiku. Kadi Baparushe badi bitaba bionsu abi).

⁹ Ke bantu kuela mbila mikole. Bamue balongeshi ba mikenji ba luseke lua Baparushe kujuka, babenga tshilumbu, bamba ne: — Katuena bamona ne: muntu ewu mmupile to! Misangu mikuabu mutumibue wa Mvidi Mukulu, nansha mukishi, mmumuambile malu!

¹⁰ Matandu kukola kupita. Ke mulombodi wa basolayi kutshina ne: kabavu kusunsula Polu. Kutuminaye basolayi diyi ne: buelayi mu tshipangu, numbushe Polu, nupingane nende mu lupangu luenu.

¹¹ Butuku, Mfumu kumuenekela Polu, umuambila ne: — Kolesha muoyi. Mu Yerushalayime emu, udi muleje bantu muudi ungitaba. Ke muwaya kuenza kabidi ne mu Rome!

Tshitungu tshia bena Yuda

¹² Butshia dinda, bamue bena Yuda kuya kuela tshitungu, baditshipa, bamba ne: “Katuena tudia, katuena tunua, amu tuetu bashipe Polu!”

¹³ Bena tshitungu etshi bavua bapite pa makumi anayi.

¹⁴ Kuyabu kumonangana ne bamfumu ba batuangaji, kabidi ne bakulu, babamanyisha ne: — Tudi baditshipe ne: katuena tudia, amu tuetu bashipe Polu.

¹⁵ Nenku nuenu, ne bena Tshipangu tshikulu bonsu, lombayi mulombodi wa basolayi, bua anutumine Polu. Numudingidije ne: tudi basue kutangila tshilumbu tshiende bimpe. Tuetu netumuadile mu njila, bua kumushipa, kayi muanji kufika kunudi.

¹⁶ Kadi muana wa balume mansebende wa Polu kumvua muvuabu bela tshitungu atshi. Kuyaye mu lupangu lua basolayi. Kubuelayemu bua kumanyisha Polu bualu ebu.

¹⁷ Nenku Polu kubikila tshindonda tshia mulombodi wa basolayi, umuambila ne: — Nuye ne nsongalume ewu kudi mulombodi. Udi ne bualu bunene bua kumuambila.

¹⁸ Musolayi kuya ne nsongalume kudi mulombodi, umuambila ne: — Polu udi mu lukanu awu, mmumbikile, mungambile ne: nuye ne nsongalume ewu kudi mulombodi. Udi ne bualu bunene bua kumuambila.

¹⁹ Ke mulombodi kukuata nsongalume ku tshianza, kuya nende ku luseke, umuebeja ne: — Buudi musue kungambila mbunganyi?

²⁰ Nsongalume kuandamuna ne: — Bena Yuda mbumvuangane bua kukulomba ne: utume Polu maloba mu Tshipangu tshikulu. Pine apu mbadingidije ne: tudi basue kutangila tshilumbu tshiende bimpe.

²¹ Kadi kubitabi to! Bualu bantu bapite pa makumi anayi bayaya kuadila Polu mu njila bua kumukuata. mBaditshipe ne: katuena tudia, katuena tunua, amu tuetu bamushipe. Mpindiewu mbamane kudilongolola, bindile amu bua umutume mu Tshipangu.

²² Mulombodi kulayangana ne nsongalume, kumukandika ne: — Kuambidi muntu bualu buudi mutumanyishe.

Polu kua Felikse

²³ Ke mulombodi kubikila bindonda biende bibidi, ubiambila ne: — Sangishayi basolayi, nkama ibidi badi ne bia mvita biabu bionsu, bakuabu makumi muanda mutekete babandi ba pa tubalu, banga nkama ibidi badi bambula amu mafuma. Nudilongolole bua kuya ku Kezareya bufuku, diba dia tshitema.

²⁴ Nuangate kabidi ne tubalu, bua nuambule Polu, nufike nende bimpe kudi Felikse, mulombodi wa ditunga.

²⁵ Kufundaye kabidi mukanda ne:

²⁶ “Wakunemekibua mulombodi wa ditunga, mukalenga Felikse, muoyi awu! Meme Klode Liziyase, ndi nkumanyisha ne:

²⁷ Bena Yuda bavua bakuate muntu ewu, bakeba kumushipa. Pangumvu ne: mmuena Rome, meme kufika ne basolayi banyi, kumunyenga.

²⁸ Meme kumufikisha mu Tshipangu tshikulu, bua kumanya tshivua bena Yuda bamufundile.

²⁹ Meme kujadika ne: kavua muenze bualu bubi budi mua kumuelesha mu lukanu, nansha kumushipesha. Muvua amu mpata ya pa mikenji yabu.

³⁰ Pashishe pavuabu bammanyisha ne: bena Yuda mbamuelele tshitungu, ke pandi mupangadike diakamue bua kukutuminaye. Ndi mulombe kabidi badi bamufunde, bua bafike ne tshilumbu tshiende kuudi.”

³¹ Basolayi kuenza muvuabu babafundile. Kuyabu ne Polu butuku abu, too ne ku Antipatrise.

³² Butshia basolayi bavua ku makasa kupingana kuabu, bena tubalu kutungunuka luendu ne Polu.

³³ Bafika mu Kezareya, diakamue bena tubalu kupa mulombodi wa ditunga mukanda, kumushila kabidi ne Polu.

³⁴ Mulombodi wa ditunga mumane kubala mukanda, kukonkaye Polu ne: “Udi wa mu ditunga kaayi?” Yeye mumvue ne: Polu ngwa mu Silisiya,

³⁵ kumuambilaye ne: — Nenkukonkoloje amu pafika badi bakufunde. Kutumaye diyi bua balame Polu mu nzubu wende wa bukalenga, uvuabu base kudi Erode.