Bienzedi 18 - MUKANDA WA MYIDI MUKULU

Polu mu Korente

¹ Pashishe Polu kumuka mu Atene, kuya mu Korente.

² Kusanganaye mu Korente muena Yuda, dina diende Akuila, wa mu buloba bua Pontuse. Utshivua ufumina ku Italiya ne mukajende Priskila. Bualu mukalenga wa bakalenga Klode uvua mutume diyi, bua bena Yuda bonsu bumuke mu Rome. Ke Polu kuya kumonangana ne Akuila ne mukajende.

³ Bu muvuabu bamanye mudimu wa momumue (bavua benji ba nzubu ya ntenta), Polu kuya kusomba kuabu, bua bakuate mudimu pamue.

⁴ Dituku dionsu dia Dikisha, Polu uvua ulongesha mu nzubu wa kutendelela, usonsola bena Yuda ne bena Ngreke, bua bitabe Mvidi Mukulu.

⁵ Silase ne Timote kumuka ku Masedoniya, kuya ku Korente. Bobu bamane kufika, ke Polu kudifila muende muonsu ku mudimu wa kulongesha muaku. Uvua ujadikila bena Yuda ne: Yezu udi Kristu.

⁶ Kadi bena Yuda bavua bamuluisha, bamupenda. Nanku Polu kubanyukuila bilamba biende, ubamba ne: — Panuikala bajimine, nuambe ne: tudi badijimije nkayetu. Meme tshiena ne bualu. Bituadija ku lelu, nenye kudi bantu ba bisamba bikuabu.

⁷ Umuka ku nzubu wa kutendelela, kuyaye kua Titiyuse Yustuse, muena Ngreke uvua mubuele mu tshisumbu tshia bena ditaba ba bena Yuda. Nzubu wa muntu awu uvua mutumba ne nzubu wa kutendelela.

⁸ Krispuse, mulombodi wa nzubu wa kutendelela, ne bena nzubu wende bonsu, kuitaba Mfumu. Bena Korente ba bungi bumvua bivua Polu ulongesha, kuitababu. Kubatuabu mu mayi.

⁹ Butuku kampanda, Mfumu kuleja Polu malu, umuambila ne: — Kutshinyi. Kadi akula amu kuakula. Kupuwu to.

¹⁰ Bualu ndi nebe. Muntu kakukulenga bua kukuenzela bibi to. Bualu mu tshimenga etshi bantu ba bungi mbanyi!

¹¹ Polu kushala mu Korente tshidimu tshijima ne ngondu isambombu, ulongesha bantu muaku wa Mvidi Mukulu.

¹² Pavua Ngaliyone muena Rome mupete muanzu wa mulombodi wa buloba bua Akaya, bena Yuda kumyuangana bua kuluisha Polu. Kumukuatabu, kuya nende ku tshilumbuluilu,

¹³ bamba ne: — Muntu ewu udi witabijija bantu, bua batendelele Mvidi Mukulu mushindu udi mikenji mikandike.

¹⁴ Pavua Polu ukeba kuakula, Ngaliyone kuambila bena Yuda ne: — Bena Yuda, nuenu bamvuile ne bualu bubi buenza kudi muntu ewu, nansha ne tshilema tshinene, mvua mua kunuteleja.

¹⁵ Kadi bu munudi amu nuelangana mpata bua miaku, bua mena, ne bua mikenji yenu, abi bidi binutangila amu nuenu nkayenu. Tshiena musue kukosa bilumbu bia nenku to!

¹⁶ Ke kubipataye mu tshilumbuluilu.

¹⁷ Nenku bonsu kukuata Sostene, mulombodi wa nzubu wa kutendelela, kumutuutshila kumpala kua tshilumbuluilu aku. Kadi Ngaliyone kavua muelemu diyi to.

Polu udi upingana mu Antiyokiya

¹⁸ Polu kushala kabidi matuku makumbane mu Korente. Pashishe kulayanganaye ne bena ditaba. Yeye, Priskila ne Akuila, kubuela mu majuwa, kuya ku Siriya. Bangabanga ne kubuela mu majuwa mu Kenkreya, Polu uvua mukunguishe mu mutu, bualu uvua muenze dilaya.

^19-21 Kufikabu mu Efeze. Polu kubuela mu nzubu wa kutendelela, kuyukidilangana ne bena Yuda. Bena Yuda kulomba Polu, bua ashale nabu matuku makuabu. Kadi Polu kavua musue to. Uvua ulayangana nabu, wamba ne: — Nempingane kuenu kunu, pikala Mvidi Mukulu musue. Kushiyaye Priskila ne Akuila muaba awu. Kumukaye mu Efeze ne majuwa.

²² Utuluka mu Kezareya, kuyaye mu Yerushalayime, bua kumonangana ne Tshisumbu tshia bena ditaba. Pashishe kuyaye ku Antiyokiya.

²³ Usombamu amue matuku, kumukaye tshiakabidi. Kupitshilaye mu buloba bua Ngalate ne bua Frijiya, wenda ukolesha balongi bonsu mu ditaba.

Apolose mu Efeze ne mu Korente

²⁴ Muena Yuda mukuabu, mulelela mu Aleksandriya, dina diende Apolose, kufikaye mu Efeze. Uvua ngamba malu, mumanye Mikanda ya tshijila bilenga.

²⁵ Bavua bamulongesha njila wa Mfumu. Uvua ulongesha pende ne disuminyina, umanyisha bantu malu a Yezu bijalame, kayi utupakana. Kadi uvua mumanye amu muvuabu batua bantu mu mayi mushindu uvua Yowanane muenze.

²⁶ Kulongeshaye ne dikima mu nzubu wa kutendelela. Pavua Priskila ne Akuila bamumvua ulongesha, kuyabu nende kuabu. Kumumvuijabu malu a njila wa Mvidi Mukulu avuaye kayi muanji kumanya.

²⁷ Pashishe Apolose uvua musue kuya mu Akaya. Bena ditaba kumukolesha ku muoyi bua ayemu. Kufundilabu bena ditaba ba mu buloba abu, bua bamuakidile bimpe. Yeye mumane kufika mu Akaya, kuambuluishaye bikole bantu bakavua bamane kuitaba ku luse lua Mvidi Mukulu.

²⁸ Bualu uvua ufuisha bena Yuda bikole ku mesu a bantu bonsu, ubumvuija Mikanda ya tshijila, ubaleja nayi ne: Yezu udi Kristu, Musungidi wetu.