Bienzedi 10 - MUKANDA WA MYIDI MUKULU

Korneliyuse udi ubuela mu Tshisumbu tshia bena ditaba

¹ Mu Kezareya muvua muntu, dina diende Korneliyuse. Uvua mulombodi wa tshisumbu tshia basolayi ba bena Rome, tshivuabu binyika ne: “Ntshia bena Italiya.”

² Uvua muntu wa Mvidi Mukulu, umutendelela pamue ne nzubu wende mujima. Uvua wambuluisha bakengi ba bena Yuda ne bintu bivule, utendelela Mvidi Mukulu misangu ne misangu.

³ Dituku kampanda, ku diba dia isatu wa dilolu, Mvidi Mukulu kumuleja malu. Kumonaye patoke mutumibue wa Mvidi Mukulu, ubuela mu nzubu muende, umubikila ne: — Korneliyuse!

⁴ Korneliyuse kutangila mutumibue wa Mvidi Mukulu ne bowa, kumuebeja ne: — Mukalenga, udi wamba bishi? Mutumibue kuandamuna ne: — Mvidi Mukulu udi ukuvuluka, ukuanyisha bua dimutendelela diebe, kabidi ne bua bintu biudi upesha bapele.

⁵ Nanku tuma bantu mu Yope, ubikidishe Simone, udi dina dikuabu ne Petro.

⁶ Udi usomba kua munga Simone, muena mudimu wa biseba, muena nzubu udi ku muelelu wa mayi manene.

⁷ Mutumibue mumane kumuka, ke Korneliyuse kubikila bena mudimu bende babidi, ne musolayi umue wa ku bavua bamulama, uvua pende muntu wa Mvidi Mukulu.

⁸ Kubalondelaye bionsu bivua bipita. Pashishe kubatumaye ku Yope.

⁹ Butshia, patshivuabu mu njila, basemena pabuipi ne Yope, Petro kubanda ku tshibambalu tshia kulu kua nzubu, diba dia munda munya, bua kutendelela Mvidi Mukulu.

¹⁰ Nzala kumusuma. Kujingaye kudia. Patshivuabu bamulongoluela biakudia, Mvidi Mukulu kumuleja malu.

¹¹ Kumonaye diulu diunzuluka, kabidi tshintu bu tshilamba tshinene tshia pa mesa, batshikuata ku nsongu inayi, tshienda tshipueka panshi.

¹² Munda muatshi muvua nyama ya mishindu yonsu: ya mikonu inayi, bilandadi, ne nyunyi ya kulu.

¹³ Petro kumvua diyi, dimuamba ne: — Petro, juka, ushipe, udie!

¹⁴ Ke Petro kuandamuna ne: — Mfumu, tshiena mua kuenza nanku to! Bualu katshia tshiena muanji kudia tshintu tshidi Mvidi Mukulu mukandike, nansha tshia mikiya.

¹⁵ Kumvuaye tshiakabidi diyi, dimuandamuna ne: — Tshidi Mvidi Mukulu muambe ne: katshiena ne mikiya, wewe kuena mua kutshiamba ne: tshidi ne mikiya!

¹⁶ Kuenzekabi nanku misangu isatu. Pashishe kupingajabu tshintu atshi mu diulu.

¹⁷ Petro uvua ulubakana, ukeba kujingulula malu avuabu bamuleje. Diba adi bantu bavua Korneliyuse mutume, bakavua bamane kuebeja, bua babaleje ku nzubu kua Simone. Mpindiewu bakavua mene ku tshiibi tshia nzubu.

¹⁸ Kubikilabu bena nzubu, babakonka ne: — Eku ke kudi Simone, udibu binyika kabidi Petro, usomba anyi?

¹⁹ Petro utshivua amu ukeba kumvua malu avua Mvidi Mukulu mumuleje. Ke Mueyelu wa Mvidi Mukulu kumuambila ne: — Kudi bantu basatu badi bakukeba.

²⁰ Juka, tuluka panshi. Kuelakanyi to. Uye nabu. Meme ngudi mubatume.

²¹ Nanku Petro kutuluka, kuya kuvua bantu abu, kubambila ne: — Ke meme unudi nukeba ewu. Tshinudi bavuile ntshinyi?

²² Bantu kuandamuna ne: — Korneliyuse, mulombodi wa tshisumbu tshia basolayi, mmututume. Udi muntu muimpe, muitabi wa Mvidi Mukulu. Bena Yuda bonsu badi bamuanyisha. Mutumibue wa Mvidi Mukulu mmumulombe, bua akubikidishe kuende, umvue malu audi mua kumuambila.

²³ Ke Petro kubabueja mu nzubu, kubapa ne pa kulala. Butshia, Petro kumuka nabu. Bamue bena ditaba ba mu Yope kuya nende.

²⁴ Petro kufika mu Kezareya dituku divua dilonda. Korneliyuse uvua mumuindile, pamue ne bena diku diende, kabidi ne balunda bende ba pa muoyi, bavuaye mubikile.

²⁵ Amu Petro ubuela mu nzubu, Korneliyuse kumuakidila, kudiela ku makasa ende, kumuela muoyi ne kanemu ka bungi.

²⁶ Kadi Petro kumujula, kumuamba ne: — Juka, bualu ndi amu muntu mudi bantu bonsu.

²⁷ Ke Petro ne Korneliyuse kubuela mu nzubu, benda bayukila. Petro kusangana bantu ba bungi badikungijamu.

²⁸ Kubambilaye ne: — Nudi bamanye mudi meyi ne mikandu bietu bikandike bikole bua muena Yuda kumvuangana ne bantu ba bisamba bikuabu, nansha kubuela mu nzubu yabu. Kadi Mvidi Mukulu mmundeje mundi tshiyi mua kutangila muntu nansha umue ne: udi ne mikiya, nansha kubenga kubuela kuende.

²⁹ Ke pandi mufike, paudi mumbikile, tshiyi mbenga. Nanku ndi nnuebeja ne: tshinudi bambikidile ntshinyi?

³⁰ Korneliyuse kuandamuna ne: — Kukadi matuku asatu, mvua ntendelela ku nzubu kuanyi, pa diba edi dia isatu wa dilolu. Meme kumona muntu umueneka diakamue kumpala kuanyi, muvuale tshilamba tshibalakana.

³¹ Kungambilaye ne: “Korneliyuse, Mvidi Mukulu mmumvue muudi umutendelela, kabidi mmuvuluke muudi wambuluisha bapele.

³² Nanku tuma bantu mu Yope, babikile Simone udi kabidi dina ne Petro. Udi usomba ku nzubu kua munga Simone, muena mudimu wa biseba, muena nzubu udi ku muelelu wa mayi manene.”

³³ Ke meme kukubikidisha diakamue. Wewe pebe udi muenze bimpe, bu muudi mufike. Mpindiewu tudi bonsu kumpala kua Mvidi Mukulu, bua kumvua tshidi Mfumu mukuambile bua kutumanyisha.

Petro udi ulongesha bantu mu nzubu mua Korneliyuse

³⁴ Ke Petro kuambila bantu ne: — Mpindiewu ndi njadika ne: Mvidi Mukulu kena ne kansungasunga.

³⁵ Muntu nansha wa mu tshisamba kaayi, udi umutshina, wenza tshidiye musue, Mvidi Mukulu udi mumuanyishe.

³⁶ Nudi bamanye Lumu lua Disanka ludi Mvidi Mukulu mumanyishe bena Izrayele. mMubambile ne: nenupete bupole kudi Yezu Kristu, Mfumu wa bantu bonsu.

³⁷ Nudi bamanye bivua bienzeka bangabanga mu Ngalileya, pashishe mu Yudeya mujima, Yowanane mumane kulongesha bantu, mubatue mu mayi.

³⁸ Nudi bamanye Yezu wa muNazarete, uvua Mvidi Mukulu musungule. Uvua mumuwuje ne Mueyelu wende wa Tshijila, kabidi ne bukole buende. Nanku Yezu kuendakana mu ditunga dijima, wenza bilenga, ujikija masama a bantu bonsu, bavuabu bakuate kudi mukishi mubi. Bualu Mvidi Mukulu uvua nende.

³⁹ Tuetu tudi bajadiki ba bionsu bivuaye muenze mu ditunga dijima dia bena Yuda, ne mu Yerushalayime. Bavua bamushipeshe, bamupopele pa mutshi mutshiamakane.

⁴⁰ Kadi Mvidi Mukulu uvua mumubishe ku lufu dituku disatu, muanyishe bua amuenekele bantu,

⁴¹ ki mbantu bonsu to, kadi amu tuetu bajadiki bavua Mvidi Mukulu mudianze kusungula. Mvidi Mukulu mumane kumubisha ku bafue, tuvua badie, banue nende.

⁴² Yezu kututumina diyi dia kulongesha bantu, kubajadikila ne: Mvidi Mukulu mmumuteke bua kulumbuluisha badi ne muoyi, ne bafue.

⁴³ Bambi bonsu badi bajadika bualu buende ne: muntu yonsu udi witaba Kristu, bukole bua dina diende nebumujimijile mibi yende.

Bantu ba bisamba bikuabu badi bapeta Mueyelu wa Tshijila

⁴⁴ Patshivua Petro wakula nanku, Mueyelu wa Tshijila kupuekela bantu bonsu bavua bamuteleja.

⁴⁵ Bena ditaba ba mu tshisamba tshia bena Yuda, bavua bafika ne Petro, kukema bikole pa kumona muvua Mvidi Mukulu mupuekeshile ne bantu ba mu bisamba bikuabu Mueyelu wa Tshijila.

⁴⁶ Bualu bavua bumvua bantu abu bakula miakulu ivuabu kabayi bamanye, batumbisha bunene bua Mvidi Mukulu. Ke Petro kuamba ne:

⁴⁷ — Bu mudi bantu abu bamane kupeta Mueyelu wa Tshijila mumue netu, udi mua kukandika bua babatue mu mayi nnganyi?

⁴⁸ Kutumaye diyi bua babatue mu mayi mu dina dia Yezu Kristu. Bantu abu kulomba Petro bua ashaleku nabu amue matuku.