Abakuke 1 - MUKANDA WA MYIDI MUKULU

¹ Telejayi bidi Mvidi Mukulu mumanyishe muambi Abakuke.

Mvidi Mukulu, kuena umona bena tshinyangu anyi?

² Maweja-Nangila, matuku bungiwu andi nkubikila, Wewe nansha kunteleja! Ndi nkumanyisha tshinyangu tshitudi natshi, kadi Wewe nansha kutusungidila!

³ Udi ummuenesha mabika ne mala nanku bua tshinyi? Bantu badi bakengeshangana bibi. Muudi ubatangila, kuyi wenza bualu mbishi? Ndi munkatshi mua tshinyangu ne tshimbambila, miaba yonsu ngumvua amu bilumbu ne matandu.

⁴ Bu muudi kuyi wenza bualu, mikenji yebe mmifue, bena buenzayi badi babinga, bantu babi badi bapisha badi kabayi ne bualu, nsambu yonsu badi bayikosa amu bibi.

Mvidi Mukulu udi wandamuna: bena Babilone nebafike

⁵ Maweja-Nangila udi wandamuna ne: Tangilayi malu adi enzekela mu matunga adi nenu mutumba. Nenukeme bikole, nukatshila! Bualu bunene nebuenzeke; nenubumone. Muntu munuambilebu amu mukana, kanuvua mua kumuitaba to.

⁶ Ndi mbikila bena Babilone, tshisamba tshia bantu ba lonji, kabayi luse. Badi bendakana pa buloba bujima, bakeba kudia bumfumu mu matunga a bende.

⁷ Badi batshinyisha bantu, babakuatshisha bowa. Badi badienzela mudibu basue, bajadika nkayabu bidi bimpe kuenza.

⁸ Nyama yabu ya tubalu mmipite ya nkashama ku lubilu. Idi ne lonji lupite lua nyama ya bimungu idi yenda ne nzala. Babandi babu ba pa tubalu, badi bafumina kule, benda batupika. Badi ne lubilu bu lua nyunyu ya mikanku, idi imona nyama wa kudia, yikila ne lukuka pambidi pende.

⁹ Badi bafika ne tshinyangu bu mvunde, batangila kumpala ne lukuka, baboya bena lukanu bungi bu lusenga.

¹⁰ Badi baseka bakalenga ba matunga, banaya nabu, batshimbakaja bakulu ba mu bukalenga buabu. Bimana bivua bantu bakoleshe nabi bimenga, badi babimona bu bintu bia tshianana, benza anu kabumba ka buloba, babandapu, bakuata tshimenga.

¹¹ Badi bafika lubilu bu mvunde, bakudimuka, baya. Bukole buabu ke nwidie wabu!

Muambi udi udidila Mvidi Mukulu, bua tshinyangu tshia bena Babilone

¹² Wewe udi Maweja-Nangila wa kale ne kale. Udi Mvidi Mukulu wanyi wa tshijila, wa kashidi ne kashidi. Maweja-Nangila, muena bukole utudi tutekemena, Wewe kusungula bena Babilone, kukolesha baluishi betu, bua bamfuishe, batunyoke.

¹³ Kadi mesu ebe adi mimpe be. Kuena mua kuanyisha bua amone malu mabi. Bantu badi bakengesha bakuabu, kuena mua kubatangila, kuyi wenza bualu. Kadi muudi umona bidi bena tshinyangu abu benza, kuyi wamba bualu, mbishi? Bantu babi aba badi babutula matunga a bantu ba nsongu badi babapita bobu. Kadi udi umona nanku, upuwa bua tshinyi?

¹⁴ Paudi kuyi uludika bantu, badi bu mishipa, nansha bu bishishi, bidi kabiyi ne mulombodi wabi.

¹⁵ Ke mudi bena Babilone bakuata bantu, mudibu baloba mishipa ne ndobu. Badi bu balobi badi bakuata mishipa mu makondu abu, bayipatula mu mayi, basanka, batshionkomoka.

¹⁶ Badi balambula makondu abu milambu, bawoshila musenga wa kamonya, mudibu benzela mvidie. Bualu ke adi abadisha, abanemesha.

¹⁷ Bena Babilone nebatule amu kutula miele yabu ya nwita anyi? Nebabutule amu kubutula bantu ba matunga makuabu, kabayi bumvue luse anyi?