2 Tesalonike 2 - MUKANDA WA MYIDI MUKULU

Muena bubi

¹ Bana hetu, nudi batekemene ne: Mfumu wetu Yezu Kristu neafike; netudisange nende. Kadi tudi Umulomba ne;

² kanulubakanyi ne lungenyi, kanupampakanyi padi bantu bamba ne: dituku dia Mfumu ndimane kufika. Kanuitabi muntu udi muambila ne: ke bivua Mvidi Mukulu muleje Polu; ke bivua Polu mulongeshe; ke bivuaye mufunde mu mukanda.

³ Muntu nansha umue kanudingi. Bualu dituku adi kadiakufika, bantu kabayi banji kutombokela Mvidi Mukulu musangu wa ndekelu, Muena bubi, mufundila dibutuka, kayi muanji kumueneka.

⁴ Muena bubi awu neabenge bionsu bidi bantu bakukuila, ne mvidie yonsu idibu batendelela. Neaditeke ku mutu kua bionsu abi. Neabuele ne mu nzubu wa Mvidi Mukulu. Neatekemu nkuasa wende, udiamba ne: ndi Mvidi Mukulu.

⁵ Kanuena bavuluke mumvua munuambile bionsu abi, pantshivua nenu anyi?

⁶ Kadi nudi bamanye tshidi tshikandika, bua bionsu ebi kabienzeki mpindiewu. Nanku Muena bubi udi mua kumueneka amu tshikondu tshidibu bamufundile.

⁷ Bubi budi amu bukuata mudimu mu musokoku. Kadi bidi ne bua kuenzeka, nebienzeke amu, padi utshidi ukuata Muena bubi umushila muaba.

⁸ Diba adi Muena bubi neamueneke. Kadi Mfumu Yezu neamushipe ku mueyelu wa mukana muende. Neamubutule amu ku bukenke bua difika diende.

⁹ Muena bubi neafike ne bukole bua diabolu. Neenze bishima bia mishindu yonsu, ne malu a kukema, bua kudinga nabi bantu.

¹⁰ Neakuate mudimu ne malu mabi a mishindu yonsu, bua kushima nawu bantu badi ne bua kujimina. Nebajimine, bualu kabavua bitabe, kabavua banange bulelela buvua mua kubasungidila.

¹¹ Ke padi Mvidi Mukulu utshipaja mioyi yabu, bua bitabe malu a dishima.

¹² Nenku bonsu bavua kabayi bitaba bulelela, bananga malu mabi, nebabanyoke.

Bavua banusungule bua nupande

¹³ Bana hetu, tudi ne bua kuela Mvidi Mukulu tuasakidila, katuyi tupungila, bualu buenu nuenu, badi Mfumu munange. Bualu Mvidi Mukulu mmunusungule, bua nuikale ba kumpala, badi Mueyelu wa Tshijila usungidila. Bualu Mueyelu udi unuenza bantu ba Mvidi Mukulu. Nuenu kabidi nudi nuitaba bulelela.

¹⁴ Bualu bua Lumu lua Disanka lutuvua banumanyishe, Mvidi Mukulu mmunubikile, bua nupete penu butumbi bua Mfumu wetu Yezu Kristu.

¹⁵ Nanku, bana hetu, ikalayi bantu bashindame. Nuvuluke malongesha atuvua banuambile mukana, nansha atuvua banufundile mu mukanda.

¹⁶ Mvidi Mukulu Tatu wetu mmutunange, mmutupe kabidi ditekemena dishindame ku luse luende, bua tuindile ne muoyi mukole matuku adi kumpala. Tudi tumulomba, tulomba ne Mfumu wetu Yezu Kristu,

¹⁷ bua buwuje mioyi yenu ne dikima, banupe bukole bua kuenza, ne bua kuakula bionsu bidi bimpe.