2 Samuele 9 - MUKANDA WA MYIDI MUKULU

Davide udi wakidila Mefibaale kuende

¹ Dituku dikuabu, Davide kukonka ne: — Mu nzubu mua Shawule, kamuena muntu nansha umue udi mushale ne muoyi anyi? Ndi musue kumuenzela bimpe mu dina dia Yonatane.

² Mu nzubu mua Shawule muvua muena mudimu mukuabu, dina diende Siba. Kuyabu nende kudi mukalenga Davide. Davide kumukonka ne: — Wewe ke Siba anyi? Siba kuitaba ne: — Eyowa, mukalenga, mmeme.

³ Mukalenga Davide kumukonka kabidi ne: — Mu nzubu mua Shawule, kamuena mushalaku muntu nansha umue bua meme kumuenzela bimpe mu dina dia Maweja-Nangila anyi? Siba kuandamuna ne: — Muana wa Yonatane mmushale, kadi mmutshibuke mikolu.

⁴ Mukalenga Davide kumuebeja ne: — Muana awu udi penyi? Siba kuandamuna ne: — Udi ku Lodabare, ku nzubu kua Makire, muana wa Amiyele.

⁵ Davide kutuma muntu ku Lodabare, bua kukeba muana awu.

⁶ Mefibaale, muana wa Yonatane, muikale muikulu wa Shawule, mumane kufika kua Davide, kudielaye mpala panshi kumpala kua mukalenga Davide. Davide kumukonka ne: — Wewe ke Mefibaale anyi? Mefibaale kuitaba ne: — Eyowa, mukalenga, mmeme.

⁷ Davide kumuambila ne: — Kutshinyi to. Ndi nkuenzela bimpe mu dina dia tatuebe Yonatane. Ndi kupingajila maloba onsu avua a kakuebe Shawule. Newikale udia nanyi ku mesa matuku onsu.

⁸ Mefibaale, kuinyika mutu, wamba ne: — Mukalenga, udi utata bua kungenzela bionsu abi bua tshinyi? Meme, ndi bu mbua mumane kufua.

⁹ Ke mukalenga Davide kubikidishaye Siba, muena mudimu wa Shawule, umuambila ne: — Bintu bionsu bivua bia Shawule mfumuebe, ne bia bena nzubu wende, ndi mbipesha muikuluende Mefibaale.

¹⁰ Wewe Siba, bana bebe ne bena mudimu bebe, nudimine Mefibaale madimi, bua kupetaye biakudia. Kadi netuikale tudia ne Mefibaale ku mesa anyi matuku onsu. Siba uvua ne bana ba balume dikumi ne batanu. Uvua ne bena mudimu makumi abidi.

¹¹ Kuambilaye Davide ne: — Mukalenga, nenkumbaje bionsu biudi mungambile. Kadi misangu yonsu Mefibaale neikale ne tshibidilu tshia kudia nanyi ku mesa, bualu mmuana wa ku ndelanganyi ya Shawule.

¹² Mefibaale uvua ne muana wa balume, dina diende Mika. Bantu bonsu bavua mu nzubu wa Siba bavua anu bakuatshila Mefibaale mudimu.

¹³ Bu muvua Mefibaale mutshibuke mikolu yonsu ibidi, kusombelaye mu Yerushalayime, bua amone mua kudia ne mukalenga Davide ku mesa matuku onsu.