2 Samuele 8 - MUKANDA WA MYIDI MUKULU

Davide udi utshimuna bisamba bivuaye nabi mutumba

¹ Pashishe Davide kutshimuna bena Peleshete. Kushalabu ne bundu, kabatshiyi ne bumfumu mu buloba abu.

² Davide kutshimuna kabidi bena Mowabe. Kubaladikaye panshi. Ku bantu basatu, uvua ushipa babidi ba kudibu, ushiya amu muntu umue ne muoyi. Biangatshile musangu awu, bena Mowabe, kushala ku bumfumu bua Davide. Kubalambuishaye bitadi.

³ Pavua Adadezere, muana wa Rekobe, mukalenga wa Soba, mu ditunga dia bena Siriya, mu luendu, ukeba mua kukuata tshiakabidi buloba bua ku musulu wa Perate, Davide kumutshimuna.

⁴ Kukuataye bantu tshinunu ne nkama muanda mutekete mu lukanu, bavua babanda pa nyama ya tubalu, ne bantu bavua benda ku makasa binunu makumi abidi. Davide kusungula nyama ya tubalu mikumbane bua matempu ende lukama. Kadi nyama ya tubalu yonsu ivua mishale, kuyikosaye mijilu ya ku bikonu.

⁵ Pashishe bena Siriya ba mu Damase, kufika bua kuambuluisha Adadezere mu mvita. Kadi Davide kubatshimunaye kabidi. Kushipaye bantu ba kudibu binunu makumi abidi ne bibidi.

⁶ Davide kuteka balombodi ba bukalenga buende mu Siriya. Bena Siriya kushala ku bumfumu bua Davide. Kubalambuishaye bitadi. Ke mushindu uvua Maweja-Nangila mupeshe Davide bukole bua kutshimuna mvita yonsu nanku.

⁷ Davide kunyenga ngabu ya tshiamu tshia mpawungi ivuabu nayi kudi bena mvita bavua balame Adadezere, kuyaye nabi mu Yerushalayime.

⁸ Kuangataye kabidi tshiamu tshikunze tshipite bungi, tshivua mu Beta ne mu Berotayi, bimenga bibidi bivua mu bukalenga bua Adadezere.

⁹ Towu, mukalenga wa Amate kumvua ne: Davide mmutshimune bena mvita bonsu ba Adadezere.

¹⁰ Kutumaye muanende Yorame kudi mukalenga Davide bua kumuela muoyi ne tuasakidila, bualu uvua mutshimune Adadezere. Bualu Adadezere uvua muluishi wa Towu. Yorame kutuadila Davide bintu bienza ne tshiamu tshia mpawungi, ne tshiamu tshitoke tshia mushinga mukole, kabidi ne tshiamu tshikunze.

¹¹ Mukalenga Davide kujidila bintu abi mu dina dia Maweja-Nangila, bu nuwuaye mujidila tshiamu tshitoke tshia mushinga mukole, ne tshia mpawungi, bivuabu bamutumine kudi bantu ba bisamba bivuaye mumane kukuata:

¹² (Bena Siriya, bena Mowabe, bena Amone, bena Peleshete ne bena Amaleke). Ke nuwuaye mujidila kabidi bintu bionsu bivuaye munyenga Adadezere.

¹³ Ke muvua Davide mupete lumu nanku. Davide mumane kutshimuna bena Siriya, kupinganaye. Kuyaye kutshimuna kabidi bena Edome bavua mu tshibandabanda tshia luepu, kushipa bantu binunu dikumi ne muanda mukulu.

¹⁴ Davide kuteka balombodi ba bukalenga buende mu Edome. Bena Edome kushala ku bumfumu bua Davide. Ke mushindu uvua Maweja-Nangila mupeshe Davide bukole bua kutshimuna mvita yonsu nanku.

Mena a bena mudimu ba Davide

¹⁵ Davide kudia bukalenga mu Izrayele mujima. Uvua ubalumbuluisha amu bimpe, kayi ne kansungansunga.

¹⁶ Yowabe, muana wa Seruya, uvua mfumu mulombodi wa bena mvita ba Davide. Yosafate, muana wa Akilude, uvua umanyisha bantu malu a mu bukalenga.

¹⁷ Sadoke, muana wa Akitube, pamue ne Akimeleke, muana wa Abiyatare, ke bavua batuangaji. Seraya uvua mufundi.

¹⁸ Benaya, muana wa Yoyada, uvua mulombodi wa bena Kireti, ne bena Peleti, bena mvita bavua balame mukalenga Davide. Bana ba Davide bavua batuangaji kabidi.