2 Samuele 7 - MUKANDA WA MYIDI MUKULU

Mvidi Mukulu udi ulaya Davide ne ndelanganyi yende

¹ Mukalenga Davide kuya kusomba mu nzubu wende wa bukalenga. Maweja-Nangila kumulama bimpe kudi baluishi bonsu, bavua banyungulula bukalenga buende.

² Dituku dikuabu, mukalenga Davide kuambila muambi Natane ne: — Meme Davide ndi musombe mu nzubu muasa ne mitshi ya sedre, kadi mushete wa Maweja-Nangila wa tshijila udi anu mu ntenta wa bilamba. Udi wela meji kaayi?

³ Muambi Natane kuandamuna ne: — Ukadi mumane kuela meji pa bualu ebu. Mbimpe ukumbaje biudi musue kuenza. Maweja-Nangila neakuambuluishe.

⁴ Kadi butuku abu, Maweja-Nangila kuambila muambi Natane ne:

⁵ — Ndaku kudi Davide, muntu wanyi. Umuambile ne: teleja tshidi Maweja-Nangila wamba ne: “Wewe Davide kuena mua kungashila nzubu undi mua kusomba to.”

^6-7 Bualu biangatshile dituku dimvua mupatule bena Izrayele mu Ejipitu too ne mpindiewu, katshia tshiena muanji kusomba mu nzubu to. Kadi, mvua anu musombe mu ntenta, muaba wa tshijila, ngendakana ne bena Izrayele mu njila. Matuku awu onsu, mvua muteke balombodi bashilangane bua baludike bantu banyi bena Izrayele bimpe. Kadi tshivua mujane mulombodi nansha umue ne: kena mungashile nzubu wa mitshi ya sedre bua tshinyi?

⁸ “Wambile Davide kabidi ne: ‘Maweja-Nangila wa bena Izrayele udi wamba ne: Pauvua mulami wa mikoku, meme kukumusha ku mudimu awu, bua wewe kuikala mukalenga wa bantu banyi bena Izrayele.

⁹ Meme kukuambuluisha mu midimu yebe yonsu. Meme kubutula baluishi bebe bonsu bavua kumpala kuebe. Nenkupeteshe lumu lunene. Newikale mumanyike bu mudi bakalenga banene bonsu badi bamanyike bikole pa buloba.

¹⁰ Nensunguile bantu banyi bena Izrayele muaba undi musue bua kusombabu, kabayi batshina kabidi bualu nansha bumue to. Tshisamba tshikuabu katshiena mua kubakengesha kabidi, bu muvuabu babakengesha bangabanga,

¹¹ tshikondu tshimvua muteke balombodi bua baludike bantu banyi bena Izrayele. Wewe Davide, nenkusungile ku baluishi bebe bonsu. Nanku ndi nkumanyisha ne: meme Maweja-Nangila nenkushile nzubu.

¹² Pakumbana diba dia lufu luebe, nensungule umue wa ku bana bebe menemene, bua kukupinganaye mu bukalenga. Nemmuambuluishe bua kushindamaye mu bukalenga.

¹³ Muanebe awu, neangibakile nzubu. Nemmujadike mu bukalenga kashidi.

¹⁴ Nengikale tatuende, yeye neikale muananyi. Pikalaye muenza bibi, nemmunyoke bu mudi tatu unyoka muanende.

¹⁵ Kadi tshiena mua kumubenga, bu mumvua mulekele Shawule bua wewe kumupingana mu bukalenga.

¹⁶ Misangu yonsu, muana wa ku ndelanganyi yebe neakupingane mu bukalenga, bualu bukalenga nebushale mu nzubu muebe kashidi.’ ”

¹⁷ Muambi Natane, kuambila Davide bionsu bivua Maweja-Nangila mumuleje.

Davide udi utendelela Maweja-Nangila

¹⁸ Ke mukalenga Davide kuya mu ntenta wa tshijila, kumpala kua Maweja-Nangila, umulomba ne: — Maweja-Nangila Mvidi Mukulu wanyi, ndi mumanye ne: meme ne bena nzubu wanyi, katuvua bakanyine kupeta bionsu biudi mutuenzele ebi to.

¹⁹ Kadi wewe Maweja-Nangila, udi mumone ne: bionsu biudi mutuenzele kabiena bianji kukumbana. Nanku, utshidi anu ulaya bena nzubu wanyi, bua kubenzela bimpe. Kabidi udi ummanyisha bionsu ebi, meme muntu patupu.

²⁰ Maweja-Nangila, tshiena kabidi ne tshindi mua kuamba. Bualu wewe, udi mummanye meme muntu webe.

²¹ Bu muuvua mumane kulaya, kabidi bu muudi munnange, wewe kukumbaja bionsu biuvua muambe. Wewe kubingambila!

²² Maweja-Nangila Mvidi Mukulu wanyi, wewe udi muena bukole buonsu! Kakuena mukuabu udi bu wewe. Ke mutudi bumvue bantu bonsu bamba nanku.

²³ Kakuena tshisamba tshikuabu pa buloba tshidi tshifuanangane ne tshia bena Izrayele. Wewe Maweja-Nangila uvua mufike bua kupikula amu bena Izrayele ku bupika bua bena Ejipitu, ne mu bianza bia mvidie yabu, bua bikale tshisamba tshiebe wewe. Nanku udi mupeteshe bena Izrayele lumu, bualu udi mubenzele malu a dikema, nansha adi akuatshisha bowa mu ditunga diebe.

²⁴ Wewe kuangata bena Izrayele, bua bashale tshisamba tshiebe kashidi. Maweja-Nangila wewe kushala Mvidi Mukulu wa bena Izrayele.

²⁵ Nanku Maweja-Nangila Mvidi Mukulu wanyi, ukumbaje biuvua muambe. Bionsu biuvua mumane kundaya meme Davide ne ndelanganyi yanyi, ubikumbaje kashidi.

²⁶ Nanku newikale ne lumu kashidi. Bantu nebambe ne: “Mvidi Mukulu wa bena Izrayele, ke Maweja-Nangila wa bukole buonsu!” Ujadike ndelanganyi yanyi mu bukalenga.

²⁷ Bualu wewe Maweja-Nangila, muena bukole buonsu, ne Mvidi Mukulu wa bena Izrayele, ke udi mummanyishe meji ebe, a kumpesha ndelanganyi idi mua kumpingana mu bukalenga. Ke pandi mupete dikima dia kukulomba mushindu ewu.

²⁸ Maweja-Nangila Mvidi Mukulu, wewe ke Mvidi Mukulu. Bionsu biudi wamba bidi bikumbana! Mpindiewu udi undaya diakalenga edi!

²⁹ Nanku, ela bena diku dianyi lupemba, bua ndelanganyi yanyi ishale mu bukalenga kashidi kumpala kuebe. Maweja-Nangila Mvidi Mukulu wanyi, bu muuvua mumane kulaya, ela bena nzubu wanyi lupemba kashidi!