2 Samuele 6 - MUKANDA WA MYIDI MUKULU

Davide mmusue kufikisha mushete wa ndondu mu Yerushalayime

¹ Davide kusangisha bena mvita bonsu ba bena Izrayele, bavua bamanye mvita bikole. Bavua binunu makumi asatu.

² Kuyaye nabu ku Baala, mu Yuda, bua kuangata mushete wa tshijila wa Mvidi Mukulu. Mushete awu udi ne dina dia Maweja-Nangila, Mvidi Mukulu wa bena mvita ba bena Izrayele, udi usomba pa mutu pa bakerubine.

³ Mushete awu uvua pa kakuna, mu nzubu mua Abinadabe. Kuutekabu mu ditempu ditshivua dipiadipia, kuyabu nawu. Uza ne Akiyo, bana ba balume ba Abinadabe, bavua baludika ditempu adi,

⁴ divua ne musheta. Akiyo ke uvua wenda kumpala.

⁵ Davide ne bena Izrayele bonsu bavua basanka kumpala kua Maweja-Nangila, bimba biombelu bia mishindu mishilangane, bienza ne mabaya a mitshi ya pin, bu bisanji, nzenze, ngoma, makasa, ne biamu bia kututakaja.

⁶ Bafika pabuipi ne tshishipuilu tshia ku Nakone ngombe ivua ikeba kudishinda ne mushete wa tshijila. Uza kukuata mushete bua kaukuluki.

⁷ Nanku Maweja-Nangila kufikila Uza munda bikole. Kumushipaye, anu muaba awu, bua bualu buvuaye muenze, kayi muanji kuela meji. Uza kufuila muaba awu, pabuipi ne mushete wa tshijila.

⁸ Davide umona ne: Maweja-Nangila mmushipe Uza, kufikaye munda. Kuinyikaye muaba awu dina ne: Perese-Uza. Dina edi ditshidiku too ne mpindiewu.

⁹ Dituku adi, Davide kutshina Maweja-Nangila, wamba ne: — Tshiena mua kuya ku nzubu kuanyi ne mushete wa Maweja-Nangila to!

¹⁰ Nanku, Davide kubenga bua kuyabu ne mushete awu ku nzubu kuende mu Tshimenga tshia Davide. Kutekeshaye mushete awu mu nzubu mua Obede-Edome, muena Ngate.

¹¹ Mushete kushala mu nzubu amu ngondu isatu. Maweja-Nangila kuela Obede-Edome ne bena diende bonsu lupemba.

Mushete wa tshijila udi ufika mu Yerushalayime

¹² Kuambilabu Davide ne: Maweja-Nangila mmuela Obede-Edome lupemba mu bionsu bidiye wenza, bualu bua mushete wa tshijila. Nanku Davide ne tshisumbu tshia bantu tshivuaye natshi, kuya kua Obede-Edome bua kuangata mushete, kuya nawu mu Tshimenga tshia Davide ne luendu lua disanka.

¹³ Bantu bavua bambula mushete bamane kuenda mutantshi wa makasa asambombu, Davide kulambula ngombe mulume ne muana wa ngombe wa manyi.

¹⁴ Pashishe Davide kutuadija kuja maja ne bukole buende buonsu bua kutumbisha Maweja-Nangila. Uvua muvuale anu tshilamba tshia ndanda tshia batuangaji.

¹⁵ Davide ne bena Izrayele, kufika ne mushete wa Maweja-Nangila mu Yerushalayime, benda bela mbila ya disanka ne mpungi.

¹⁶ Musangu uvua mushete mufike mu Tshimenga tshia Davide, Mikale, muana wa Shawule, uvua mutangile pa dididishi. Kumonaye mukalenga Davide uja maja, unyunguluka kumpala kua mushete. Ke Mikale kudiula mukalenga Davide bikole.

¹⁷ Kuyabu kuteka mushete muaba uvuabu bamane kulongolola, mu ntenta uvua Davide muashile mushete awu. Ke Davide kulambula Maweja-Nangila milambu ya kuosha ne ya bobumue.

¹⁸ Davide mumane kujikija kulambula milambu, kuelaye bantu bonsu lupemba mu dina dia Maweja-Nangila wa bena Izrayele.

¹⁹ Pashishe Davide kuabanyina bena Izrayele bonsu, balume ne bakaji, biakudia. Muntu yonsu kupeta diampa dipepela, mukata muenza ne bimuma bia date, mukuabu muenza ne tumuma tua mvinyo tumane kuuma. Ke muntu yonsu kupingana ku nzubu kuende.

²⁰ Davide kupingana ku nzubu kuende bua kuela bena diende muoyi. Kadi Mikale, muana wa Shawule, kupatuka bua kusambakena nende. Kumuambilaye ne: — Lelu, mukalenga wa bena Izrayele kavua kabidi ne lumu to. Uvua uja maja bu muntu mutshimbakane, bakaji bapika ba bena mudimu bende bamutangile!

²¹ Davide kuandamuna ne: — Mvua ngenza bionsu abi, anu bua kutumbisha Maweja-Nangila, uvua munsungule bua meme kuikala mukalenga wa bantu bende bena Izrayele. Maweja-Nangila uvua mubenge tatuebe Shawule ne bena nzubu wende bonsu. Nanku meme Davide, nensanke anu kusanka bua kutumbisha Maweja-Nangila.

²² Neudipuekeshe, ndifuisha bundu bikole, kadi nansha bakaji bena mudimu baudi wamba aba, nebannemeke, bampetesha lumu.

²³ Mikale, muana wa Shawule, kavua mulele muana too ne ku lufu luende!