2 Samuele 4 - MUKANDA WA MYIDI MUKULU

Baana ne Rekabe badi bashipa Ishebaale

¹ Ishebaale, muana wa Shawule, kupeta lumu lua lufu lua Abnere ku Ebrone. Kumvuaye bowa. Bena Izrayele bonsu kuzakala bikole.

² Ishebaale uvua ne bantu bende babidi, bikale balombodi ba bena mvita. Mena abu avua: Baana ne Rekabe. Bavua bana ba Rimone, muena Binyamine, wa mu musoku wa Beyerote, (Musoku wa Beyerote uvua mubuele mu buloba bua Binyamine,

³ biangatshile tshikondu tshivua bantu, bavua basombe kale mu musoku ewu banyemene mu musoku wa Ngitayime, muaba utshidi ndelanganyi yabu too ne mpindiewu.)

⁴ Yonatane, muana wa Shawule, uvua mushiye kabidi muana wa balume, dina diende Mefibaale Muana awu uvua mutshibuke mikolu yonsu ibidi. Pavua lumu lua lufu lua Shawule ne Yonatane lufume mu tshimenga tshia Yizreyele, Mefibaale uvua ne bidimu bitanu. Nanku, ndeji wa muana ewu, kumuela ku lubesa bua kunyema nende. Kadi pavuaye unyema, muana kufinuka kudishinda, kutshibuka.

⁵ Baana ne Rekabe, bana ba Rimone, muena mu musoku wa Beyerote, kuya kua Ishebaale. Kufikabu kumbelu munda munya. Kusanganabu Ishebaale mulale bua kuikisha.

⁶ Kubuelabu mu nzubu, bu badi bamutuadila ntete ya kuenza bukula. Kusanganabu Ishebaale mu nzubu wende wa bulalu, mulale. Kumutuabu muela mu difu. Baana ne muanabu Rekabe, bamane kushipa Ishebaale kumukosa mutu kunyema nawu.

⁷ Kuendabu butuku bujima, balonda njila wa mu tshibandabanda tshia Yardene.

⁸ Kufikabu ne mutu wa Ishebaale kudi mukalenga Davide ku Ebrone, bamuambila ne: — Mukalenga, tangila mutu wa Ishebaale, muana wa muluishi webe Shawule, uvua ukeba mua kukushipa. Lelu Maweja-Nangila mmusombuele Shawule ne ndelanganyi yende bualu buebe.

⁹ Davide kuela mbila ne: — Bu mudi Maweja-Nangila ne muoyi, udi unsungidila ku makenga onsu,

¹⁰ ndi nditshipa ne: muntu uvua mungambile bua lufu lua Shawule, uvua wela meji ne: mmungambile bualu bua disanka. Kadi mvua mumukuatshishe bua kumushipesha ku Siklaje. Kupetaye dinyoka dia bualu buvuaye muambe.

¹¹ Kadi nuenu bantu bena buenzayi, badi bashipa muntu kayi ne bualu, muikale mu nzubu wende, mulale pa bulalu buende, meme ndi mua kunuenzela tshinyi? Ndi nnunyoka bua dishipangana dienu. Ndi nnumusha pa buloba kashidi.

¹² Davide kutuma diyi kudi bansongalume bende bena mvita. Kushipabu Rekabe ne Baana. Pashishe kubakosabu bianza ne makasa. Kubilembelejabu pabuipi ne tshiina tshia mayi tshia mu Ebrone. Kadi mutu wa Ishebaale, kuujikabu mu lukita lua Abnere mu Ebrone.