2 Samuele 23 - MUKANDA WA MYIDI MUKULU

Meyi a Davide a ndekelu

¹ Ke meyi a Davide a ndekelu aa: Telejayi meyi a Davide, muana wa Ishayi, meyi a muntu uvua Mvidi Mukulu muteke muaba wa butumbi, uvua Mvidi Mukulu wa Yakobe musungule bua kuikalaye mukalenga, uvua bena Izrayele bimbila misambu, basamba.

² Mueyelu wa Mvidi Mukulu udi ungakuisha, uteka diyi diende pa ludimi luanyi.

³ Mvidi Mukulu wa Izrayele kuakula, mulami wa bena Izrayele kungambila ne: “Mukalenga udi ulombola bantu bimpe, uludika bantu, ukumbaja bidi Mvidi Mukulu musue,

⁴ udi bu diba didi dipatuka, dikenka mu dinda, kamuyi mavuba. Mvula mumane kukamuka, munya mutema, bintu kutoloka pa buloba.”

⁵ Ke malu adi Mvidi Mukulu muenzele bena nzubu wanyi. Uvua mutue nanyi ndondu wa kashidi, mujadike ndondu awu ne mikenji idi bantu kabayi mua kubenga. Bionsu bidi binsankisha, udi ubikumbaja.

⁶ Kadi bonsu badi bapepeja Mvidi Mukulu, badi bu matamba a mitshi ya meba adibu bimansha, kabayi mua kuambula mu tshianza patupu.

⁷ Udi musue kualenga, udi utuika ndami wa tshiamu, nansha musongolu wa mutshi, wosha bionsu muaba awu.

Bena mvita ba Davide

⁸ Mena a bena mvita ba Davide bavua ne bukitu avua nenku: Ishebale, muena Akmoni, mfumu wa tshisumbu tshia bilobu bisatu. Bavua bamubikila kabidi ne: Adino, muena Esni. Yeye ke uvua mushipe bantu nkama muanda mukulu musangu umue.

⁹ Kumulondabu kudi Elazare, muana wa Dodo, ne muikulu wa Akowa. Elazare uvua a bena mvita basatu bavua ne mukalenga Davide, pavuaye ufunyina bena Peleshete, bavua badisanga bua kuluangana mvita. Bena Izrayele bamane kunyema,

¹⁰ Elazare kujuka, kushipa bena Peleshete too ne pavua tshianza tshiende tshishikile, tshibengela amu ku tshilabi tshia muela. Dituku adi, Maweja-Nangila kuambuluisha bena Izrayele, kutshimunabu. Bena mvita bavua bapingana muaba uvua Elazare, anu bua kupawula bintu bia bantu bafue mu mvita.

¹¹ Pashishe kudi Shama, muana wa Age, wa mu Arare. Pavua bena Peleshete badisangisha ku Leki, muaba uvua budimi bua nkunde, bena mvita ba bena Izrayele kunyema bena Peleshete.

¹² Kadi, Shama kuimana munkatshi mua budimi, kuipata bena Peleshete bavua mu budimi amu, kubatshimuna. Ke muwa Maweja-Nangila muambuluishe bena Izrayele, bua batshimune.

¹³ Dituku dikuabu, tshikondu tshia kunowa, bantu basatu ba mu “Tshisumbu tshia bena mvita Makumi asatu” kufika kudi Davide mu lubuebue lua Adulame, bualu bena mvita ba bena Peleshete bavua base mitanda mu tshibandabanda tshia bena Refayime.

¹⁴ Davide uvua pa mukuna uvuabu bakolesha ne bimana. Bena mvita ba bena Peleshete bavua bamane kukuata tshimenga tshia Betleyeme.

¹⁵ Ke Davide kumvuaye nyota, kulomba ne: — Udi mua kumpesha mayi a kunua adi mu tshiina tshia mayi tshidi ku tshiibi tshia mu Betleyeme nnganyi?

¹⁶ Nanku bena mvita basatu, kupita munkatshi mua mitanda ya bena Peleshete. Kusunabu mayi, mu tshiina atshi. Kuyabu nawu kudi mukalenga Davide. Kadi mukalenga Davide kubenga mua kunua mayi awu, kuitshikija panshi bua kualambula Maweja-Nangila,

¹⁷ wamba ne: — Maweja-Nangila, meme tshiena mua kunua mayi aa to! Bualu meme munue, ndi anu bu udi unua mashi a bantu bavua baye kusuna mayi, babuele mu njiwu ya lufu! Nanku Davide kena munue mayi awu to. Ke muvua bena mvita basatu abu baleje bukitu buabu.

¹⁸ Abishayi, muanabu ne Yowabe, ne mansebende wa Davide, uvua mfumu wa “Tshisumbu tshia bena mvita Makumi asatu.” Dituku dikuabu, kushipaye ne musongolu baluishi nkama isatu. Kupetaye lumu lunene mu “Tshisumbu tshia bena mvita Makumi asatu.”

¹⁹ Uvua mumanyike bikole munkatshi muabu. Kushalaye mene mfumu wa bena tshisumbu atshi. Kadi kavua mupite “Tshisumbu tshia bena mvita basatu to.”

²⁰ Benaya, muena Kabseyele, muana wa Yoyada, ne muikulu wa muena mvita wa bukitu, uvua muenze malu manene a bungi. Benaya uvua mushipe ba Ariyele babidi ba bena Mowabe. Dituku dikuabu tshikondu tshia mvula wa neje, Benaya kupueka mu tshiina tshia mayi bua kushipa nyama wa ntambue.

²¹ Benaya kabidi uvua mushipe muena Ejipitu, muntu wa mukitshi, uvua ne musongolu. Benaya kumuluisha ne dikombu, kumunyenga musongolu wende ku bianza, kumushipa nawu.

²² Ke malu awa Benaya muenze. Kupetaye lumu lunene mu tshisumbu tshia bena mvita makumi asatu.

²³ Benaya uvua mumanyike bikole munkatshi mua tshisumbu tshia bena mvita makumi asatu. Kadi, kavua mupite “Tshisumbu tshia bena mvita basatu to.” Mukalenga Davide kumuteka mulombodi wa bena mvita bavua bamulame.

²⁴ Mu “tshisumbu tshia bena mvita Makumi asatu” muvua kabidi Ashayele, muanabu ne Yowabe; Elanane, muana wa Dodo, wa mu musoku wa Betleyeme;

²⁵ Shama ne Elika, ba mu musoku wa Arode; 1

²⁶ Elese wa mu tshimenga tshia Pelete; Ira, muana wa Ikeshe, wa mu tshimenga tshia Tekowa;

²⁷ Abiyezere, wa mu tshimenga tshia Anatote, Mebunayi, wa mu tshimenga tshia Usha;

²⁸ Salmone, muena Alkowa, Marayi wa mu musoku wa Netofa;

²⁹ Elebe, muana wa Baana, wa mu Netofa; Itayi, muana wa Ribayi, wa mu tshimenga tshia Ngibeya mu buloba bua bena Binyamine;

³⁰ Benaya, wa mu tshimenga tshia Piratone; Idayi wa ku misulu ya mu Ngashe;

³¹ Abiyalbone wa mu tshimenga tshia Betaraba; Azmavete, wa mu musoku wa Bakurime,

³² Eliyaba, wa mu tshimenga tshia Shalbone, umue wa ku bana ba balume ba Yashene. Yonatane,

³³ Shama, ba mu Arare. Akiyame, muana wa Sharare, wa mu Arare;

³⁴ Elifelete, muana wa Akasbayi ne muikulu wa muntu wa Maaka; Eliyame, muana wa Akitofele, wa mu tshimenga tshia Ngilo;

³⁵ Esrayi, wa mu Karmele, Parayi, wa mu musoku wa Arabe;

³⁶ Igale, muana wa Natane, wa mu Soba; Bani, muena tshisamba tshia Ngade;

³⁷ Seleke, muena Amone, Narayi, wa mu Beyerote, uvua wambula bia mvita bia Yowabe, mansebende wa Davide;

³⁸ Ira ne Ngarebe bonsu babidi ba mu diku dia Yetere,

³⁹ Uriya, muena Iti. Bonsu basanga bavua makumi asatu ne muanda mutekete.