2 Samuele 22 - MUKANDA WA MYIDI MUKULU

Mukulu tuasakidila

¹ Mukalenga Davide kuimbilaye Maweja-Nangila musambu ewu. Bualu Maweja-Nangila uvua mumusungidile kudi baluishi bende bonsu, nangananga kudi Shawule.

² Maweja-Nangila udi lubuebue luanyi, muaba undi nyemena, undi nsomba bimpe.

³ Mvidi Mukulu wanyi udi lubuebue luanyi, muaba undi musokome tshiyi mua kupeta njiwu. Udi ngabu udi mundame, muaba mukole undi nyemena bua kupanda. Ndi nkeba mua kusokoma pabuipi nende, bua ansungidile ku malu makole onsu.

⁴ Maweja-Nangila atumbe! Meme kumubikila bua angambuluishe, diakamue udi unsungidila mu bianza bia baluishi banyi.

⁵ Mavuala a lufu avua ampitshila pa mutu, avua ankuatshisha bowa, bu musulu udi ukeba kumbutala.

⁶ Lufu luvua lunsuika ne mionji yalu, bu muntu udibu bela mu lukanu. Nkavua ndishinda mu buteyi bua lufu.

⁷ Mu dikenga dianyi, meme kubikila Maweja-Nangila. Mvua ngela mbila kudi Mvidi Mukulu wanyi. Mu nzubu muende, kumvuaye diyi dianyi, kumvuaye muadi wanyi.

⁸ Ke buloba kuzakala. Bitaku bia diulu kunyunga. Diulu ne buloba kutenkakana, bualu Maweja-Nangila uvua ne tshiji.

⁹ Muinshi kupatuka mu mimpempe yende. Kapia kavua kapataka mukana muende, kakeba kubutula binta, kela tuntolentole, kakenka.

¹⁰ Maweja-Nangila kuinyika diulu, kutuluka panshi, divuba difike muinshi mua makasa ende.

¹¹ Kubandaye pa kerubine, kubuka mulu. Kudilejaye pa mapuapua a lupepele.

¹² Kudibuikilaye midima, musokome mu mavuba makuatakane, mu mavuba muwule tente ne mayi.

¹³ Kumpala kuende tshimunyi tshia kapia katoke too, Mu tshimunyi mupatuka tuntolentole tua kapia.

¹⁴ Mu diulu, Maweja-Nangila kudidisha makubakuba. Mvidi Mukulu wa bukole buonsu kuela diyi diende.

¹⁵ Kupenyaye nseke yonsu. Kuelaye miketa ku miaba yonsu.

¹⁶ Pavua Maweja-Nangila utanda, pavuaye ne tshiji tshikole, muinshi mua mayi kumueneka, bitaku bia buloba kudileja patoke.

¹⁷ Diba adi, mu diulu mudiye, kololaye tshianza, kunkuata. Kumpatalaye mu njiwu mumvua mudine ne kasuki.

¹⁸ Kunsungidilaye mu bianza bia baluishi banyi bavua ne bukole, bia bena lukuna banyi, bavua bampite dikanda.

¹⁹ Dituku dia tshiyole kunduishabu. Kadi Maweja-Nangila kungambuluisha.

²⁰ Maweja-Nangila kunsungidila, kumpikula. Udi munnange, ke padiye munsungidile.

²¹ Maweja-Nangila udi ungenzela nunku bualu ndi mmuitaba muanyi muonsu. Udi unsankisha, bualu ndi ngenza bimpe matuku onsu.

²² Ndi nkumbaja mikenji ya Maweja-Nangila. Tshiena ngenzela Mvidi Mukulu wanyi bibi to.

²³ Eyowa, ndi nkumbaja mikenji idiye mutufundile. Tshiena mbenga tshidiye ulomba to.

²⁴ Ndi musue bua kamonyi mua kubandisha. Ndi mudilame bua tshienji bibi.

²⁵ Ke Maweja-Nangila kunsankisha, bualu ndi mmuitaba muanyi muonsu, ndi ngenza anu mudiye musue.

²⁶ Maweja-Nangila udi unanga udi umunanga. Udi kayi ne bualu, Maweja-Nangila kena umupisha.

²⁷ Udi udileja patoke kudi muntu wa muoyi munonoke. Kadi udi useka wa muoyi mubi.

²⁸ Udi wambuluisha tshisamba tshidibu bafuisha bundu, upepeja badi baditambisha.

²⁹ Maweja-Nangila, udi muendu wanyi, Eyowa, Maweja-Nangila, udi ushintulula midima yanyi, uyenza butoke.

³⁰ Patudi nebe ndi ntupika, mbanda pa bimana. Mvidi Mukulu wanyi, paudi ungambuluisha, ndi mua kutupika bimana bikole.

³¹ Bidi Mvidi Mukulu wenza bidi amu bimpe! Meji adiye ufila ke atudi mua kulonda. Udi bu ngabu, udi ulama badi banyemena kudiye.

³² Mvidi Mukulu udi anu umue, ke Maweja-Nangila. Lubuebue luetu ludi anu lumue, ke Mvidi Mukulu wetu!

³³ Yeye ke mulami wanyi wa bukole, Mpanda njila wanyi.

³⁴ Udi upepeja makasa anyi, nnyema bu kabuluku, ngimana pa mikuna mitumbuke.

³⁵ Udi undongesha mua kuluangana mvita, ungambuluisha mua kunana buta, nansha bobu bukole butambe.

³⁶ Maweja-Nangila, udi bu ngabu udi mundame, munsungidile. Udi witaba pandi ndila, umpe bukole buebe.

³⁷ Paudi ungambuluisha, ndi nnyema lubilu, tshiyi mua kudishinda.

³⁸ Ndi ndondakaja bena lukuna banyi, mbabutula. Tshiena mpingana panyima, tshiyi muanji kubashipesha bonsu.

³⁹ Ndi mbashipa, mbasaya. Kabena bajuka kabidi to. Badi anu panshi, mbadiata mu makasa.

⁴⁰ Udi umpesha bukole bua kuluangana, utekesha baluishi banyi, bakadi ku makasa anyi!

⁴¹ Udi unyemesha baluishi kumpala kuanyi. Ndi mua kubenzela mundi musue.

⁴² Nansha bobu bakenzakane udi mua kubambuluisha, badi batangila bapanga. Badi basengelela Maweja-Nangila, kadi kena wandamuna.

⁴³ Ndi mbavingutula, mbashiya bu lupuishi. Ndi mbadiata bu bitotshi bia mu misesu.

⁴⁴ Udi mumpikule kudi bantu banyi, badi bantombokela. Udi mundame, nshala mukalenga wa bisamba. Bantu bandi tshiyi mumanye, badi bangenzela mudimu.

⁴⁵ Bantu benyi badi badionga kundi. Pandi ngamba bualu badi bantumikila.

⁴⁶ Kabatshiena bantuila nkanana. Badi bapatuka miaba idibu basokome, bazakala.

⁴⁷ Maweja-Nangila atumbe! Wewe lubuebue luanyi, tuasakidila! Bantu batumbishe lumu lua Mvidi Mukulu, Lubuebue luanyi ne musungidi wanyi.

⁴⁸ Mvidi Mukulu udi usombuela baluishi banyi, untekeshila bisamba bia bantu.

⁴⁹ Maweja-Nangila, udi umpikula kudi baluishi banyi, ungambuluisha bua ntshimune badi bankeba mvita, umpandisha mu bianza bia bena buenzayi.

⁵⁰ Nanku ndi nkutumbisha munkatshi mua bisamba, nkusamuna ne misambu yanyi.

⁵¹ Maweja-Nangila udi wenza malu manene, bua kuambuluisha mukalenga uvuaye musungule. Muntu uvuaye mujidile udi umufuila luse kashidi, ke Davide, ne ndelanganyi yende yonsu.