2 Samuele 20 - MUKANDA WA MYIDI MUKULU

Sheba udi utombokela Davide

¹ Mu Ngilgale, muvua muntu mukuabu mutshimbakane, muena Binyamine, dina diende Sheba, muana wa Bikri. Sheba uvua wela mpungi, wamba ne: — Davide katuena nende bualu to, katuena basue kulonda muana wa Ishayi to! Bena Izrayele, pinganayi ku nzubu yenu!

² Nanku bena Izrayele kumuka kudi Davide, kuya kudi Sheba. Anu bena Yuda nkayabu kushala kudi mukalenga wabu bua kumuka nende ku Yardene, kuya ku Yerushalayime.

³ Anu mukalenga Davide ufika ku nzubu wende wa bukalenga, kubikidishaye bakaji bende bakuabu dikumi, bavuaye mushiye bua kulama nzubu awu. Kubatekaye mu nzubu umue, kulamabu nzubu awu bikole kudi bena mvita. Davide uvua ubadisha bimpe, kadi katshivua ubabuelela mu nzubu to. Biangatshile tshikondu atshi, kutekaye bakaji abu pa nkayabu too ne ku lufu luabu. Kushalabu bu bakaji bakamba, bayabu mutshikale ne muoyi.

Yowabe udi ushipa Amasha

⁴ Pashishe mukalenga Davide kuambila Amasha ne: — Bikidisha bena mvita ba bena Yuda! Ndi nkupesha matuku asatu, bua ufike nabu apa.

⁵ Amasha kuya kuenza tshivua mukalenga muambe. Kadi kupitshishaye matuku awa mukalenga Davide mumuambile.

⁶ Nanku, mukalenga Davide kuambila Abishayi ne: — Mpindiewu, Sheba udi ne lonji lua kutuenzela bibi mupite Absalome. Nanku uye ne bena mvita badi bandame meme. Ulondakaje nabu muntu ewu Sheba, kayi muanji kuya kusokoma mu bimenga bidi ne bimana bikole, bua kutunyemaye.

⁷ Nanku bena mvita bavua Yowabe ulombola, ne bena Kereti ne bena Peleti, bavua balama mukalenga Davide, mmumue ne: bena mvita bonsu bavua bamanye mvita bikole, kuyabu ne Abishayi mu mvita, kumukabu mu Yerushalayime, benda balondakaja Sheba.

⁸ Bobu bamane kufika pabuipi ne dibue dinene dia mu Ngibone, Amasha kubapeta. Yowabe uvua muvuale bia mvita. Uvua ne mukaba wa nkonka. Ku mukaba aku, uvua muaseku muela muikale mu tshibubu. Pavua Yowabe wenda usemena, muela kupatuka, kumata panshi.

⁹ Yowabe kuebeja Amasha ne: — Muanetu udi munyi? Kukuataye Amasha ku muedi ne tshianza tshia balume bua kumupukila.

¹⁰ Amasha kavua mudimuke bua muela uvua Yowabe muangule, mukuate ku tshianza tshia bakaji. Yowabe kutua Amasha muela mu difu. Mala a Amasha kupatuka, kupongoloka panshi, kufuaye. Yowabe kavua ne bua kumutua muela tshiakabidi to. Pashishe, Yowabe ne muanabu Abishayi kutungunuka, kulondakaja Sheba.

Buntomboji bua Sheba budi bujika

¹¹ Muena mvita mukuabu wa Yowabe kushala muaba uvua tshitalu tshia Amasha, wela mbila ne: “Nuenu bonsu, balunda ba Yowabe ne bantu badi ku luseke lua Davide, nulonde Yowabe!”

¹² Kadi Amasha uvua anu panshi munkatshi mua njila, mudibonde mu mashi. Muena mvita mukuabu kumona ne: bantu bonsu bavua anu bimane muaba uvua tshitalu awu. Nanku, kumushaye tshitalu tshia Amasha mu njila, kuya natshi mu budimi buvua pabuipi.

¹³ Kutshibuikilaye tshinkutu. Yeye mumane kumusha tshitalu, bena mvita bavua anu bapita buludi, balonda Yowabe bua kulondakaja Sheba.

¹⁴ Yowabe kupitshila mu bisamba bionsu bia bena Izrayele. Kufikaye mu tshimenga tshia Abele-Bete-Maka. Bena Beri bonsu kudisangisha kudi Yowabe.

¹⁵ Yowabe ne bena mvita bende kutshintshimikila Sheba uvua mu tshimenga atshi tshia Abele-Bete-Maka. Kuimanyikabu mushiki wa buloba, bule bumue ne tshimana tshia kumpala tshia tshimenga. Pashishe kumbulabu kabidi kuinshi kua bimana abi bua kubishimbula.

¹⁶ Mukaji mutalame uvua mu tshimenga amu, kuelaye lubila ne: — Telejayi, telejayi! Ambilayi Yowabe asemene muaba ewu. Ndi ne bualu bua kumuambila.

¹⁷ Yowabe kusemena. Mukaji kumukonka ne: — Wewe udi Yowabe menemene anyi? Yowabe kuandamuna ne: — Eyowa, mmeme. Mukaji kumuambila ne: — Mukalenga, teleja bualu bundi musue kukuambila. Yowabe kuandamuna ne: — Ndi muteleje.

¹⁸ Mukaji kumuambila ne: — Bakulumpe bambila ne: “Kebeji wakapambuka. Mbimpe konka lungenyi ku Abele-Bete-Maka. Nanku bualu nebujike!”

¹⁹ Tshimenga tshietu, ntshimenga tshia ku bimenga bidi ne ditalala ne bidi bitaba meyi a bukalenga. Kadi wewe udi musue kunyanga etshi tshimue tshia ku bimenga binene bia bena Izrayele! Udi musue kunyanga tshintu tshidi tshia Maweja-Nangila bua tshinyi?

²⁰ Yowabe kuandamuna ne: — Kabiena mua kuenzeka to! Meme tshiena ne dijinga dia kunyanga bintu, nansha kunyanga tshimenga to.

²¹ Tshiena ne dijinga dia kuenza nanku to. Kadi ndi nkeba anu muntu mukuabu wa mu buloba bua mikuna bua Efrayime, Sheba, muana wa Bikri, udi mutombokele mukalenga Davide. Mpeshayi anu Sheba nkayende. Nanku nengumuke muaba ewu. Mukaji kuandamuna ne: — Eyowa, mbimpe. Tudi tukuimanshila mutu wa Sheba pa mutu pa tshimana munudi amu.

²² Mukaji kuya kudi bana babu, kubabela bimpe. Nanku kukosabu mutu wa Sheba, kuwimanshilabu Yowabe. Yowabe kuelesha mpungi. Diakamue bena mvita bonsu kumukabu. Kupinganabu kuabu. Yowabe kupingana kudi mukalenga Davide mu Yerushalayime.

Mena a bena mudimu ba Davide

²³ Yowabe uvua mfumu wa bena mvita bonsu ba bena Izrayele. Benaya, muana wa Yoyada, uvua ulombola bena Kreti ne bena Peleti, bavua balame mukalenga Davide.

²⁴ Adorame uvua mfumu mulombodi wa midimu mishilangane. Yosafate, muana wa Akilude, uvua mumanyishi wa malu a mukalenga.

²⁵ Sheva uvua mufundi, Sadoke ne Abiyatare bavua batuangaji.

²⁶ Ira, muana wa ku ndelanganyi ya Yayire, uvua kabidi mutuangaji, wenzela mukalenga Davide mudimu.