2 Samuele 2 - MUKANDA WA MYIDI MUKULU

Badi bajidila Davide mu Ebrone bu mukalenga wa bena Yuda

¹ Bionsu ebi bimane kupita, Davide kukonka Maweja-Nangila ne: — Ndi mua kuya kusomba mu tshimenga tshikuabu tshia ku bimenga bia Yuda anyi? Maweja-Nangila ne: — Eyowa. Davide kumukonka kabidi ne: — Ndi mua kuya mu tshimenga kaayi? Maweja-Nangila kuandamuna ne: — Udi mua kuya mu Ebrone.

² Davide kuya mu tshimenga atshi, ne bakaji bende babidi, Akinowame, muena Yizreyele, ne Abigayile, muena Karmele, mukaji mukamba uvua Nabale mushiye.

³ Davide uvua muye kabidi ne bantu bavuaye nabu ne bena nzubu yabu. Kusombelabu mu misoku ivua mutumba ne Ebrone.

⁴ Ke bena Yuda kufika mu Ebrone bua kujidila Davide bua ikala mukalenga wa bena Yuda. Bantu bamane kuambila Davide ne: Bena mu tshimenga tshia Yabeshe mu Ngilaade mbajike Shawule,

⁵ kutumaye bantu bua bambila bena mu Yabeshe ne: “Maweja-Nangila anuele lupemba, bualu nudi bajike mfumuenu Shawule, baleje munuvua bamunange.

⁶ Maweja-Nangila anuenzele bimpe, anunange. Meme nennuenzele kabidi bimpe, munuvua benza nanku.

⁷ Mpindiewu, nuikale ne dikima, nudileje bantu ba bukitu. Mfumuenu Shawule mmumane kufua. Meme Davide ke udi bena Yuda bajidile bua nshale mukalenga wenu.”

Badi basungula Ishebaale bua kuikalaye mukalenga wa bena Izrayele

⁸ Abnere, muana wa Nere, mfumu munene mulombodi wa bena mvita ba Shawule, uvua munyeme ne Ishebaale, muana wa Shawule, ku Makanayime.

⁹ Muaba awu, Abnere uvua mujadike Ishebaale mu bukalenga, bua ikale mukalenga wa buloba bua Ngilaade, bua Ashere, bua Yizreyele, bua Efrayime ne bua Binyamine, nanku bua maloba onsu a bena Izrayele.

¹⁰ Tshikondu atshi, Ishebaale uvua ne bidimu makumi anayi. Kushalaye mu bukalenga bidimu bibidi. Anu bena Yuda nkayabu ke bavua banyishe bukalenga bua Davide.

¹¹ Davide kushala mukalenga wa bena Yuda mu Ebrone, bidimu muanda mutekete ne tshitupa.

Bena Yuda ne bena Izrayele badi baluangana ku Ngibone

¹² Abnere, muana wa Nere, ne bena mvita bavua balame Ishebaale, muana wa Shawule, kumuka ku Makanayime, kuya luseke lua ku tshimenga tshia Ngibone.

¹³ Yowabe, muana wa Seruya, ne bena mvita bavua balame Davide, kutuadijabu kabidi luendu. Bisumbu ebi bibidi bia bena mvita, kusambakena pabuipi ne dijiba dia Ngibone. Kuelabu mualu wa mvita, aba ku luseke, bakuabu ku luseke lua dijiba adi.

¹⁴ Abnere kuambila Yowabe ne: — Ndi musue bua bansongalume bena mvita batudi nabu, baluangane babidi babidi, kumpala kuetu, bua tumanye udi mupite mukuabu ku bukole. Yowabe kuandamuna ne: — Eyowa, ndi musue.

¹⁵ Bena mvita kusemena. Kusungulabu bena mvita ba mukalenga Ishebaale dikumi ne babidi ba mu tshisamba tshia Binyamine, ne bena mvita ba mukalenga Davide dikumi ne babidi.

¹⁶ Muena mvita yonsu kuela muluishi wende kankose ku nshingu, kumutua muela mu lubadi, kudishindabu pamue bonsu, kufua. Badi babikila muaba wa mu Ngibone awu ne “Budimi bua Mbuebue.”

¹⁷ Dituku adi, kuluanganabu mvita mikole. Bena mvita ba mukalenga Davide kutshimuna Abnere ne bende bavuaye nabu.

¹⁸ Bana ba Seruya basatu bavua mu mvita amu, Yowabe, Abishayi ne Ashayele. Ashayele uvua mupepele, unyema lubilu bu nyama wa kabuluku.

¹⁹ Kulondakajaye Abnere buludi, kayi ulonda muntu mukuabu to.

²⁰ Abnere ukudimuka, kumukonka ne: — Ngwewe Ashayele anyi? Ashayele kuandamuna ne: — Eyowa, mmeme.

²¹ Abnere kumuambila ne: — Londa muntu mukuabu ku dia balume, nansha ku dia bakaji. Kolesha ukuate nsongalume wa ku bena mvita, umunyenga bia mvita bidiye nabi. Kadi Ashayele kavua musue to. Uvua anu ulondakaja Abnere.

²² Abnere kumuambila kabidi ne: — Ashayele, lekela kundonda! Udi musue bua meme kukushipa bua tshinyi? Diba adi, nentshine muanenu Yowabe, tshiyi mua kumutangila kabidi mu mpala to.

²³ Kadi Ashayele kavua mulonde muntu mukuabu to, uvua ulonda anu Abnere. Ke Abnere kutua Ashayele lusongu lua difuma mu difu, kupatukalu pa nyima. Ashayele kudishinda, kufuila muaba awu. Pavua bena mvita bonsu bafike muaba uvua tshitalu tshia Ashayele, bavua anu bimana.

²⁴ Kadi Yowabe ne Abishayi, kulondakaja Abnere. Diba divua dibuela, pafikibu ku Ngibeya-Ama, luseke ludi diba dipatukila lua ku Ngiya, mu njila wa mu tshipela tshia Ngibone.

²⁵ Bena mvita ba bena Binyamine, kudisangisha pabuipi ne Abnere. Kuimanabu mu milongu pa mutu pa kakuna.

²⁶ Abnere kukonka Yowabe ne: — Netuikale anu tushipangana katuyi tulekela anyi? Umanye ne: ku nshikidilu, bualu ebu nebutushile kanyinganyinga. Tudi bena muntu. Udi muindile tshinyi bua wewe kutuma diyi bua bena muntu balekele kuluishangana?

²⁷ Yowabe kuandamuna ne: — Bu mudi Maweja-Nangila ne muoyi, ndi nkujadikala ne: bu wewe kuyi mulombe bua bantu balekele kuluishangana, butuku ebu bujima bantu banyi bavua anu ne bua kunulondakaja.

²⁸ Yowabe kuelesha mpungi. Bena mvita bende kulekela kulondakaja bena Izrayele. Nanku mvita kujika.

²⁹ Butuku abu bujima, Abnere ne bena mvita bende kuenda mu tshibandabanda tshia musulu wa Yardene, pashishe kusabukabu musulu. Kupitshilabu mu Bitrone, kufikabu ku Makanayime.

³⁰ Yowabe mumane kulekela kulondakaja Abnere, kusangishaye bena mvita bende. Anu Ashayele ne bena mvita dikumi ne tshitema ba ku bantu bavua balame mukalenga Davide, ke bavua bafue.

³¹ Kadi bena mvita ba mukalenga Davide, bavua bashipe bena Binyamine nkama isatu ne makumi asambombu, ne bena mvita bakuabu ba Abnere.

³² Kuambulabu tshitalu tshia Ashayele, kutshijikabu mu lukita lua tatuende ku Betleyeme. Pashishe Yowabe ne bena mvita bende, kuenda butuku bujima, ufika ku Ebrone, butuku bumane kutshia.