2 Samuele 19 - MUKANDA WA MYIDI MUKULU

Kanyinganyinga ka Davide

¹ Ke mukalenga Davide kubungama bikole. Kuyaye mu nzubu uvua pa mutu pa tshiibi tshia tshimenga, bua kudila. Uvua wenda wamba ne: — Eyi, Absalome wanyi, Absalome wanyi, muananyi, muananyi eyi, Absalome wanyi! Meme ke uvua mua kufua. Wewe kushala. Absalome wanyi, muananyi!

² Kumanyishabu Yowabe bua muadi wa mukalenga Davide, ne muvuaye udila, upuekesha binsonji bivule bua lufu lua Absalome.

³ Dituku adi, bena mvita kabena benza tshibilu tshia ditshimuna diabu to. Bavua amu ne dibungama dikole. Bena mvita kumvua ne: mukalenga Davide udi unyingalala bikole bua lufu lua muanende Absalome,

⁴ kupinganabu mu tshimenga mu musokoku ne bundu, bu mudi bena mvita benza padibu banyema mvita.

⁵ Kadi, mukalenga Davide uvua anu mubuikile tshilamba ku mesu, udila anu kudila, wamba ne: — Eyi, Absalome wanyi, eyi muananyi Absalome, muananyi, eyi muananyi.

⁶ Yowabe kuya kudi mukalenga Davide mu nzubu muende, umuambila ne: — Paudi udila nenku lelu, udi ufuisha bena mvita bebe bundu. Bobu ke badi basungidila wewe, bana bebe ba balume, bana bebe ba bakaji, ne bakaji bebe bonsu.

⁷ Bualu wewe udi munange bantu badi bakukina, kabidi udi ukina bantu badi bakunanga. Bionsu ebi bidi bileja ne: bamfumu ba bena mvita bebe ne bantu bonsu badi bakuitaba muabu muonsu, bakuenzela mudimu, kabena ne mushinga kuudi wewe to. Eyowa, ndi mumone ne: bu tuetu bonsu bafue, Absalome mushale ne muoyi, wewe uvua mua kusanka bikole.

⁸ Juka mpindiewu, udikoleshe. Uye kusamba bena mvita bebe bua kupetabu bukole. Wewe kuyi muye kudibu, ndi nditshipa mu dina dia Maweja-Nangila ne: muena mvita nansha umue kena mua kukuenzela mudimu kabidi dituku nansha dimue to. Nanku, wewe neupete dikenga dikole, dipite makenga onsu audi mumane kukenga, biangatshile ku buana buebe.

⁹ Ke mukalenga Davide kuya kusomba pabuipi ne tshiibi tshia ku tshimenga. Kumanyishabu bena mvita bonsu bualu abu. Kufikabu bonsu muaba uvua mukalenga Davide. Bena mvita ba Absalome bavua bamane kunyema. Muntu yonsu wa kudibu uvua muye ku nzubu kuende.

Badi balomba Davide bua apingane mu Yerushalayime

¹⁰ Mu bisamba bionsu bia bena Izrayele, bantu kutuadija kukonkangana, bamba ne: “Mukalenga Davide ke uvua mutusungidile mu bianza bia baluishi betu, nangananga mu bianza bia bena Peleshete. Kadi uvua munyeme mu ditunga emu anu bua Absalome.

¹¹ Absalome ke utuvua badisunguile nkayetu bua kuikalaye mukalenga. Mpindiewu mmumane kufua mu mvita. Kadi bua kulomba mukalenga Davide, apingane mu Yerushalayime, tshitudi bindile ntshinyi?”

¹² Ke mukalenga Davide kabidi kutumina batuangaji Sadoke ne Abiyatare diyi, ubambila ne: — Nuye kudi bakulu ba bena Yuda, nubakonke ne: “Nuenu nutshidi bashadile panyima, kanuyi nukeba mushindu wa kupingaja mukalenga ku nzubu kuende bua tshinyi? Mukalenga mene mmumane kumanya meji adi bena Izrayele bakuabu nawu.

¹³ Nuenu nudi bana babu ne mukalenga Davide menemene. Nanku, kanuikadi ba ndekelu bua kumupingaja to.”

¹⁴ Pashishe, nuye kungambidila Amasha ne: “Kuena mulele wanyi anyi? Nanku, Mvidi Mukulu annyoke ne dinyoka dikole, pangikala tshiyi mukupingaje muaba wa Yowabe kashidi, bua wewe kuikala mulombodi wa bena mvita banyi!”

¹⁵ Meyi a mukalenga Davide kusaka bena Yuda, bua bumvuangane bonsu. Ke kutuminabu mukalenga Davide diyi, bamuambila ne: “Pingana mu Yerushalayime, ne bantu bebe bonsu.”

¹⁶ Nanku, mukalenga Davide kupingana, kupueka too ne ku muelelu wa Yardene. Bena Yuda kufika ku Ngilgale, bua ku sambakena ne mukalenga Davide, ne kumuambuluisha bua kusabukaye Yardene.

Davide udi ufuila Shimeyi luse

¹⁷ Shimeyi muana wa Ngera, muena Binyamine wa mu musoku wa Bakurime, uvua muye ne bena Yuda bua kupueka nabu, kuya kudileja kudi mukalenga Davide.

¹⁸ Shimeyi uvua muye ne bena Binyamine tshinunu. Uvua muye kabidi ne Siba, muena mudimu wa mu nzubu mua Shawule, ne bana bende ba balume dikumi ne batanu, ne bena mudimu bende makumi abidi. Bantu aba bonsu kunyemena ku Yardene, bua kusambakena ne mukalenga Davide.

¹⁹ Pavua buatu buvua ne bena nzubu wa mukalenga Davide busabuka Yardene, bantu bavua ne Shimeyi bavua babambuluisha, benza bionsu bivua mukalenga Davide wamba. Mukalenga mumane kusabuka musulu, Shimeyi kudiela mpala panshi kumpala kua mukalenga,

²⁰ umuambila ne: — Mukalenga, kunsombuedi bua bubi buanyi! Kuvuluki bibi bionsu bimvua mukuenzele, dituku diuvua umuka mu Yerushalayime. Kuntekedi lukuna to.

²¹ Ndi mumanye bimpe ne: ndi muenze bibi. Kadi, mukalenga, lelu umone mundi mupueke bua kusambakena nebe, bena Izrayele bakuabu bonsu ba ku mutu wa ditunga kabayi banji kufika.

²² Kadi Abishayi, muana wa Seruya, kukonka mukalenga Davide ne: — Bualu budi Shimeyi wamba ebu, ke budi butukandika bua katumushipi anyi? Kena mutshipe mukalenga uvua Maweja-Nangila musungule anyi?

²³ Mukalenga Davide kukonka Abishayi ne muanabu Yowabe ne: — Nuenu, bana ba Seruya, nudi nubuelakana mu malu aa bua tshinyi? Mpindiewu nudi nubenga tshindi musue bua tshinyi? Tshiena musue bua bashipe muntu wa bena Izrayele dituku dia lelu, dindi mujadike meme nkayanyi ne: ndi mukalenga wa bena Izrayele bulelela!

²⁴ Mukalenga Davide kuambila Shimeyi ne: — Ndi nditshipa ne: kabena mua kukushipa to.

Davide udi umvuangana ne Mefibaale

²⁵ Mefibaale, muikulu wa Shawule, uvua muye kabidi bua kusambakena ne mukalenga Davide. Kadi biangatshile dituku divua mukalenga Davide mumuke too ne dituku divuaye mupingane mu Yerushalayime ne bukole bua mubidi, Mefibaale kavua mukose miedi, kavua mowa mayi ku makasa, nansha musukule bilamba biende.

²⁶ Mefibaale ufika kumpala kua mukalenga Davide, mukalenga Davide kumukonka ne: — Mefibaale, uvua mushale kuyi muye nanyi bua tshinyi?

²⁷ Mefibaale kuandamuna ne: — Mukalenga, muena mudimu wanyi ke uvua munshime! Meme mvua muambe ne: “Bu mundi tshiyi ngenda bimpe, ndi musue kusuika biseba bia kusomba pa nyama wanyi wa mpunde, mbande pa nyama, bua tuye ne mukalenga Davide.”

²⁸ Kadi malu onsu adi muena mudimu wanyi mukuambile, mmunshiminyine. Nanku, mukalenga, wewe udi bu mutumibue wa Mvidi Mukulu, udi mua kuenza muudi musue.

²⁹ Bantu bonsu bavua bashale mu nzubu mua kaku wanyi Shawule, wewe uvua amu mua kubashipa bonsu. Kadi mukalenga kuena muenze nanku to! Wewe kungakidila bua ngikale ndia nebe ku mesa. Nanku, tshiena ne tshikuabu tshindi mua kukulomba kabidi to.

³⁰ Mukalenga kuandamuna ne: — Eyowa mbimpe. Biudi mumane kuamba abi mbikumbane. Ndi njadika ne: Siba ne wewe Mefibaale nenuabanyangane maloba a Shawule.

³¹ Mefibaale kuandamuna ne: — Siba nkayende udi mua kuangata bionsu abi. Mukalenga tshidi ne bualu menemene, mbua upingane ku nzubu kuebe anu katakata.

Davide udi ufuta Barzilayi

³² Barzilayi, wa mu musoku wa Rogelime, mu ditunga dia Ngilaade, uvua mupueke kabidi ku Yardene. Yeye ke uvua musabuke musulu awu ne mukalenga Davide, bua kushiya mukalenga dishiya.

³³ Barzilayi uvua muntu mukulumpe wa bidimu makumi muanda mukulu. Bu nuwuaye mubanji munene, uvua mua kupesha mukalenga Davide biakudia pawaye ku Makanayime.

³⁴ Mukalenga Davide kumuambila ne: — Barzilayi, ndi nya nebe mu Yerushalayime. Meme ne nkulame bimpe, nkudisha.

³⁵ Barzilayi kuandamuna ne: — Mukalenga, nkunshadile matuku bungi munyi bua meme kuikala ne muoyi? Matuku anyi mmashale makese matambe. Tshiena mua kuya nebe ku Yerushalayime.

³⁶ Mpindiewu ndi ne bidimu makumi muanda mukulu. Tshiena mumanye kabidi mua kusunguluja bimpe ne bibi. Tshiena mua kumvua busheme bua bintu bindi ndia, nansha bindi nnua. Tshiena mua kusunguluja meyi a bantu balume nansha bakaji badi bimba misambu. Nanku ndi mua kuya nebe anu bua kukutatshisha bua tshinyi?

³⁷ Mbikumbane bua meme kusabuka nebe musulu wa Yardene. Kadi meme tshiena nansha mukumbanyine disanka edi!

³⁸ Nanku itaba, mpingane mu tshimenga tshietu. Nemfuilemu pabuipi ne lukita lua tatu wanyi ne lua mamu wanyi. Kadi, mukalenga, muananyi wa balume Kimhame, nyeye ewu. Uye nende, umuenzele muonsu muudi musue.

³⁹ Mukalenga Davide kuandamuna ne: — Eyowa, mbimpe. Nenye ne Kimhame. Netumuenzele tshionsu tshiudi ujinga. Tshintu tshiwikala mundombe, nenkupeshatshi.

⁴⁰ Bantu bonsu kusabuka Yardene, uvua mukalenga Davide mumane kusabuka kumpala. Mukalenga Davide kupukila Barzilayi, kumuela lupemba. Pashishe, Barzilayi kupingana ku nzubu kuende.

⁴¹ Mukalenga Davide kuya ne Kimhame ku Ngilaade. Bena Yuda bonsu, ne tshia bibidi tshimue tshia bena Izrayele bavua ku mutu mu ditunga, kuyabu ne mukalenga Davide.

Bena Yuda ne bena Izrayele badi batandangana

⁴² Bena ku mutu, mu ditunga kusemena kudi mukalenga Davide, kumukonka ne: — Wewe udi ne bena mvita bebe bonsu, kadi amu bana betu bena Yuda nkayabu mbakusabule wewe ne bena nzubu webe bua tshinyi?

⁴³ Bena Yuda kuandamuna ne: — Mukalenga Davide mmulele wetu menemene! Kabiyi bu bienu to. Kadi nudi nufika munda bua bualu ebu bua tshinyi? Mukalenga Davide ke udi utudisha anyi? Tshidiye mutupeshe ntshinyi?

⁴⁴ Diakamue bena Izrayele kuandamuna bena Yuda ne: — Mu bukalenga ebu, tuetu tudi banupite misangu dikumi. Eyowa, nansha bua mukalenga Davide, tuetu tudi mua kuenza mutudi basue kunupita nuenu. Kadi, nudi nutupepeja bua tshinyi? Kabidi tuetu ke bavua badianjila kuela meji a kupingaja mukalenga Davide mu tshimenga. Kadi, bena Yuda bavua batanda bikole, bapite bena Izrayele.