2 Samuele 18 - MUKANDA WA MYIDI MUKULU

Badi batshimuna bena mvita ba Absalome

¹ Mukalenga Davide kubandila bena mvita bende bavuaye nabu. Kusungulaye balombodi ba bisumbu binene ne bikese bia bena mvita.

² Kupeshaye mansebende Yowabe, muana wa Seruya, tshia bisatu tshimue tshia bena mvita. Kupeshaye Abishayi muanabu ne Yowabe tshia bisatu tshimue kabidi. Kupeshaye Itayi wa mu tshimenga tshia Ngate tshia bisatu tshikuabu. Kumanyishaye bena mvita ne: netuye nenu mu mvita.

³ Kadi bena mvita kubenga, bamba ne: — Nansha, kuena mua kuya netu to. Bualu pikala baluishi batutshimuna, tuetu banyema, baluishi kabena batukeba tuetu to. Nansha baluishi bashipe tshia bibidi tshimue tshia bena mvita betu, kabena bamona bu bualu to. Badi bakukeba anu wewe. Bualu wewe nkayebe udi mupite bena mvita betu binunu dikumi. Nanku tudi basue bua ushale mu tshimenga, bua wikale utuambuluisha, ututumina bitudi tukengela.

⁴ Mukalenga Davide kuandamuna ne: — Eyowa, mbimpe nengenze tshinudi nujinga. Nanku, mukalenga Davide kuimana pabuipi ne tshiibi tshia tshimenga. Bena mvita kupatuka mu bisumbu binene ne bikese.

⁵ Mukalenga Davide kuambila kabidi Yowabe, Abishayi ne Itayi, ne: — Ndi nnusengelela, kanuenzedi muananyi Absalome bibi to. Bena mvita bonsu bavua bumvue pavua Davide welela balombodi mukenji awu.

⁶ Bena mvita ba Davide kuluisha bena mvita ba Absalome. Mvitaayi, ivua yenzekela mu ditu dia Efrayime.

⁷ Bena mvita ba Davide kutshimuna bena mvita ba Absalome. Dituku adi, mbashipe bantu bapite bungi bu binunu makumi abidi.

⁸ Mvita ivua mitangalaka mu ditu dijima. Bantu bavua badifuile nkayabu muitu, bavua ba bungi, bapite bavuabu bashipe mu mvita.

Yowabe udi ushipa Absalome

⁹ Ke Absalome, mubande pa nyama wende wa mpunde, kusambakena ne bena mvita ba Davide. Nyama wa mpunde wa Absalome kupitshilaye muinshi mua mutshi munene, uvua ne matamba mapindakane. Mutu wa Absalome kubuela mu matamba a mutshi awu. Nyama wa mpunde kutungunuka ne luendu, Absalome kushala mukalame, mulembelele makasa kaayi atue panshi.

¹⁰ Muena mvita wa Davide kumumona, kuya kuambila Yowabe ne: — Ndi mumone Absalome mukalame mu matamba a mutshi.

¹¹ Yowabe kumukonka ne: — Udi mumumone! Kadi kuena mumutuute, mumushipele muaba awu bua tshinyi? Mvua mua kukupesha nkanu ya mushinga mukole dikumi, ne mukaba!

¹² Muena mvita awu, kuandamuna Yowabe ne: — Nansha wewe mumpeshe nkanu mitoke ya mushinga mukole tshinunu, tshiena mua kuenzela muana wa mukalenga bibi to. Tuetu bonsu tuvua bumvua mukalenga Davide ukuambila wewe, Abishayi ne kayi ne: “Ndi nnusengelela, kanuenzedi muananyi Absalome bibi to.”

¹³ Bu meme mushipe Absalome, muenze bu muntu uvua kayi mumvue tshivua Davide muambe, mukalenga Davide uvua anu mua kunjingulula mashimi anyi. — Bualu yeye mmumanye bionsu. — Bu meme mubenge diyi dia mukalenga, wewe kuvua mua kungakuila to.

¹⁴ Yowabe kuamba ne: — Tshiena mua kuelangana nebe mpata. Ndi njimija diba dianyi. Yowabe kuambula misongolu mitue isatu, kuya kuyasa Absalome mu tshiadi pa muoyi. Bualu katshia Absalome ukalama mu matamba a mutshi, kavua muanji kufua to, utshivua ne muoyi.

¹⁵ Bansongalume dikumi bena mvita, bavua bambula bia mvita bia Yowabe, inyunguluka Absalome, kumushipa kashidi.

¹⁶ Ke Yowabe kuelesha mpungi bua bantu balekele mvita. Bena mvita ba Davide kulekela kulondakaja bena mvita ba Absalome.

¹⁷ Kuambulabu tshitalu tshia Absalome, kutshimansha mu tshiina tshinene tshiwa mu ditu amu. Pashishe kunguijabu mushiki munene wa mabue pa tshitalu atshi. Diba adi, bena mvita ba Absalome kunyema, muntu yonsu kuya ku nzubu kuende.

¹⁸ Patshi wa Absalome ne muoyi, uvua muimanyike dibue mu tshibandabanda tshia Mukalenga, bualu uvua wamba ne: “Tshiena ne muana wa balume udi mua kusangula dina dianyi.” Nanku, kuinyikaye dibue adi dina diende. Too ne mpindiewu, batshidi babikila dibue adi ne: “Tshivulukilu tshia Absalome” Davide udi upeta lumu lua lufu lua Absalome

¹⁹ Akimase, muana wa Sadoke, kuambila Yowabe ne: — Itabe nye lubilu bua kuambila mukalenga Davide, mushindu udi Maweja-Nangila mu-mulumbuluila, mu bianza bia baluishi bende.

²⁰ Yowabe kuandamuna ne: — Nansha, kuena mua kuamba bualu ebu lelu to. Mbibi. Neuye kuamba dituku dikuabu. Kadi lelu kuenji nanku to, bualu udi mufue mmuana wa mukalenga Davide.

²¹ Nanku, Yowabe kutumina mupika wa bena Kushe diyi ne: — Wewe uye kuambila mukalenga Davide bionsu biudi mumone mu mvita. Mupika kutua mpala panshi kumpala kua Yowabe, kuya lubilu.

²² Kadi Akimase kulomba Yowabe bikole, umuambila ne: — Tshiasua kungenzekela tshingenzekele. Ndi musue kulonda muena Kushe lubilu. Yowabe kumukonka ne: — Mulunda wanyi, udi musue kuya bua tshinyi? Kuena mua kupeta difutu ku lumu lua mushindu ewu to.

²³ Akimase kuandamuna ne: — Kakuena bualu to. Ndi musue anu kuya. Yowabe kuitaba ne: — Eyowa, ndaku. Akimase kuya lubilu, kulonda njila wa mu mpata wa Yardene, kupita muena Kushe.

²⁴ Diba adi, Davide uvua musombe muaba uvua pankatshi pa tshiibi tshia pa mbelu ne tshia munda mua tshimenga. Mutentekedi kubanda pa mutu pa tshibumba tshivua pa mutu pa tshimana tshia tshimenga. Pavuaye pa mutu pa tshimana ukenzakana, diakamue kumonaye muntu umue ulua lubilu.

²⁵ Kuambilaye mukalenga Davide. Mukalenga Davide, kuamba ne: — Pikalaye nkayende, udi ne bualu bua disanka. Muntu uvuabu batume kusemena pabuipi.

²⁶ Mutentekedi kumona kabidi muntu mukuabu ulua lubilu. Kuelaye diyi kudi muntu uvua ku tshiibi ne: — Muntu mukuabu kabidi udi ulua nkayende lubilu. Mukalenga Davide kuandamuna ne: — Muntu awu, udi anu ne bualu bua disanka.

²⁷ Mutentekedi kuamba kabidi ne: — Muntu udi kumpala, mushindu udiye unyema, udi bu Akimase, muana wa Sadoke. Mukalenga kuandamuna ne: — Mmuana wa mushinga mukole. Bulelela, udi ne bualu bua disanka.

²⁸ Akimase, kayi muanji kufika, kuelaye mukalenga Davide diyi ne: — Malu onsu adi bimpe! Kudielaye mpala panshi kumpala kua mukalenga Davide, wamba ne: — Mukalenga, Maweja-Nangila Mvidi Mukulu atumbe, bualu yeye ke udi mufile mu bianza biebe baluishi bebe bavua bakutombokela.

²⁹ Mukalenga Davide kumukonka ne: — Absalome muana udi bimpe anyi? Akimase kuandamuna ne: — Pavua Yowabe mututume, meme ne muena mudimu webe mukuabu, mvua mumvue mutoyi mukole bu bantu bunguile kaba kamue, bela mbila. Kadi tshiena mumanye tshidi tshienzeka to.

³⁰ Mukalenga Davide kumuambila ne: — Mbimpe! Imana ku luseke. Kadi wikale pabuipi nanyi. Akimase kuya kuimana ku luseke lua mukalenga Davide, kushala muindile.

³¹ Mutantshi mukese, muena Kushe kufika. Kuambilaye mukalenga Davide ne: — Mukalenga, ndi ne bualu bua disanka bua kukuambila. Maweja-Nangila ke udi mukose tshilumbu tshiebe lelu, bualu mmukusungile mu bianza bia baluishi bebe.

³² Mukalenga Davide kumukonka ne: — Absalome muana udi bimpe anyi? Muena Kushe kuandamuna ne: — Mukalenga tudi tujinga ne bionsu bidi bienzekela nsongalume ewu, bienzekele baluishi bebe ne bantu bonsu badi bakutombokela!