2 Samuele 16 - MUKANDA WA MYIDI MUKULU

Davide ne Siba

¹ Mukalenga Davide mumane kupita ku lusongu lua mukuna, kusambakenaye ne Siba, muena mudimu wa Mefibaale. Siba uvua ne nyama ya mpunde ibidi misuike biseba panyima bia kusomba. Nyama eyi ivua miambula mampa nkama ibidi, bisangi lukama bia tumuma tua mvinyo tumane kuuma, bimuma lukama bikuabu, ne mulondu wa biseba muela maluvu a mvinyo.

² Mukalenga Davide kukonka Siba ne: — Bintu ebi mbia tshinyi? Siba kuandamuna ne: — Mukalenga, nyama ya mpunde neyambuluishe bena mudimu bebe bua bikale babandapu. Mampa ne bimuma, nebiambuluishe bena mvita bebe. Maluvu neambuluishe bantu bikale bapungile mu tshipela.

³ Mukalenga Davide kumukonka kabidi ne: — Mefibaale, muikulu wa mfumuebe Shawule udi penyi? Siba kuandamuna ne: — Mmushale mu Yerushalayime. Bualu mmutekemene ne: mpindiewu bena Izrayele badi bamupingajila bukalenga bua kakuende Shawule.

⁴ Mukalenga Davide kumuambila ne: — Nanku ndi nkupesha bintu bionsu bivua bia Mefibaale. Siba kutua mpala panshi, wamba ne: — Mukalenga, tuasakidila! Udi mungenzele bimpe.

Shimeyi udi utshipa Davide

⁵ Mukalenga Davide ufika pabuipi ne Bakurime, kusambakena ne muntu mukuabu, ufuma mu musoku. Dina dia muntu awu divua Shimeyi, muana wa Ngera. Uvua wa mu tshisamba tshimue ne Shawule. Shimeyi kutuadija kutshipa mukalenga Davide,

⁶ umuasa mabue, wasa kabidi ne balombodi ba mu bukalenga bua Davide, kayi utshina bantu, nansha bena mvita bavua benda ku dia balume ne ku dia bakaji dia mukalenga Davide.

⁷ Shimeyi uvua upenda mukalenga Davide ne: — Umuka, umuka, muntu mutshimbakane, mushipianganyi!

⁸ Maweja-Nangila ke udi ukunyoka bua bena nzubu wa Shawule bonsu baudi mushipe. Udi muibe bukalenga bua Shawule. Ke padi Maweja-Nangila mukunyengabu, mubupesha muanebe Absalome. Mpindiewu, wewe udi mu dikenga, bualu udi mushipianganyi!

⁹ Abishayi, muana wa Seruya kuambila Davide ne: — Mukalenga, Shimeyi ewu udi bu mbua mumane kufua. Kena mua kukupenda musangu mule nenku to. Itabe, nye kumukosa mutu.

¹⁰ Mukalenga Davide kumukonka ne: — Wewe Abishayi ne muanenu Yowabe, nudi nubuelakana mu bualu ebu bua tshinyi? Pikala muntu ewu umpenda, misangu mikuabu Maweja-Nangila ke udi mumutume bua kumpendaye. Nanku muntu kena mua kumutandisha to.

¹¹ Mukalenga Davide kuambila kabidi balombodi bonsu ba mu bukalenga buende ne Abishayi ne: Pikala muananyi, muananyi menemene undi mulela, ukeba mua kunshipa, kanukemi bua padi Shimeyi, muena Binyamine, umpenda. Mulekelayi, ampende! Misangu mikuabu, Maweja-Nangila ke udi mumutume bua kumpendaye.

¹² Misangu mikuabu Maweja-Nangila ke udi mua kumona dikenga dianyi, akudimune bipendu ebi bienza disanka.

¹³ Patshivua mukalenga Davide ne bantu bende baya mu njila, Shimeyi uvua wenda mutangilangane nabu, ku luseke lukuabu lua mukuna. Uvua anu ubapenda, ubasa mabue, ubeela maloba.

¹⁴ Ke mukalenga Davide ne bantu bavuaye nabu, kufika ku muelelu wa Yardene. Kuikishabu muaba awu, bualu bavua bapungile bikole.

Ushayi udi usambakena ne Absalome

¹⁵ Absalome uvua mufike mu Yerushalayime ne tshisumbu tshia bena Izrayele. Akitofele uvua ku bantu abu.

¹⁶ Ushayi, muena Arki, mufidi wa ngenyi wa mukalenga Davide, ufika pabuipi ne Absalome, kuambaye ne: — Mukalenga, kuata ku mundundu! Mukalenga, kuata ku mundundu!

¹⁷ Absalome kumukonka ne: — Ke muebe muonsu muudi unanga mulunda webe Davide nanku! Kuena muye nende bua tshinyi?

¹⁸ Ushayi kuandamuna ne: — Tshivua mua kuya nende to, bualu ndi muena mudimu wa muntu udibu basungule kudi Maweja-Nangila, ne kudi bena Izrayele bonsu bua kuikalaye mukalenga. Nanku, ndi musue kuenda nebe.

¹⁹ Tshiena mua kuenza mudimu ne muntu patupu to. Wewe kuena muana wa mulunda wanyi Davide anyi? Nanku bu mumvua muena mudimu wa tatuebe Davide too ne ku mpindiewu, ke mundi musue kuikala kabidi muena mudimu webe wewe.

Absalome ne bakaji ba Davide

²⁰ Ke Absalome kuambila Akitofele ne: — Konkanganayi! Tshitudi mua kuenza mpindiewu ntshinyi?

²¹ Akitofele kuandamuna lukasa ne: — Bakaji bonsu badi tatuebe Davide mushiye bua kulamabu nzubu wa bukalenga, ubabuelele mu nzubu, bua ushale muena lukuna wa tatuebe Davide. Pikala bena Izrayele bonsu bumvua bualu ebu, bantu badi batue ku tshiebe nebikale ne dikima.

²² Nanku, kuashilabu Absalome ntenta ku musaka wa nzubu wa bukalenga. Absalome kubuelela bakaji ba tatuende mu ntenta amu, bena Izrayele bonsu batangile.

²³ Tshikondu atshi, mubelu onsu uvua Akitofele ubela muntu, bavua bauteleja amu bu diyi dia Mvidi Mukulu mene. Nansha Davide nansha Absalome bavua bateleja ngenyi ayi, bayikumbaja.