2 Samuele 14 - MUKANDA WA MYIDI MUKULU

Absalome udi upingana mu Yerushalayime

¹ Yowabe, muana wa Seruya kumona ne: mukalenga Davide ukadi ujinga muanende Absalome.

² Nanku kubikidishaye mukaji mutalame uvua ku Tekowa, umuambila ne: — Wenze bu muntu udi mu madilu. Uwale bilamba bia madilu. Kulabi manananshi to. Wikale bu mudi mukaji mushale mu madilu matuku a bungi.

³ Pashishe uye kudi mukalenga Davide, umumanyisha malu onsu andi nkuambila. Yowabe kuambila mukaji bionsu bivuaye mua kumanyisha mukalenga Davide.

⁴ Mukaji kuya kudi mukalenga Davide, kudiela mpala panshi kumpala kuende, umuambila ne: — Mukalenga, ungambuluishe.

⁵ Mukalenga Davide kumukonka ne: — Tshiudi ujinga ntshinyi? Mukaji kuandamuna ne: — Akia! Mukalenga, meme ndi mukaji mukamba. Bayanyi mmumane kufua.

⁶ Mvua mushale ne bana ba balume babidi. Bana abu, mbaye kuluangana mvita ku budimi. Umue kushipa mukuabu, bualu kakuvua muntu bua kubasunga to.

⁷ Pashishe bena diku bonsu mbansangidile, bangamba ne: “Tupeshe mushipianganyi. Tumushipe bua kusombuela muanabu udiye mushipe. — Nanku nembutule kabidi mupianyi wa bintu udi mushale ne muoyi”. Bena diku mbasue kuenza nanku bua kushipa muana ewu wa ndekelu umvua mushala mutekemena. Kabidi mbasue bua dina dia bayanyi dijimine pa buloba.

⁸ Mukalenga Davide kuandamuna ne: — Pingana ku nzubu kuebe. Nenjikije tshilumbu tshiebe.

⁹ Mukaji kuandamuna kabidi ne: — Nansha wewe muenze munyi, tshilema netshikale anu kundi meme ne bena nzubu wanyi. Kakuena muntu udi ne dikima dia kukulumbuluisha wewe, ne bukalenga buebe to.

¹⁰ Mukalenga Davide kumujadikila ne: — Pikala muntu mukuele mpata, ufike nende kundi meme! Nanku muntu kena mua kukutatshisha kabidi to!

¹¹ Mukaji kuandamuna kabidi ne: — Mukalenga uditshipe mu dina dia Maweja-Nangila Mvidi Mukulu webe bua muntu udi ne bua kusombuela bua lufu lua muananyi, kankengeshi bibi bipite, kashipi muananyi undi mushale nende. Mukalenga Davide kumuambila ne: — Bu mudi Maweja-Nangila ne muoyi, ndi nditshipa ne: nansha lusuki lua muanebe lua ku mutu kaluakumata panshi to.

¹² Mukaji kuandamuna ne: — Mukalenga, ndi musue kukuambilaku bualu bukuabu. Mukalenga kuandamuna ne: — Ambaku.

¹³ Mukaji kumuambila ne: — Wewe udi ukengesha bantu ba Maweja-Nangila nunku bua tshinyi? Wewe mumane kuditshipa bu muudi uditshipa mpindiewu emu, udi udipisha nkayebe, bualu kuena ubikidisha Absalome uuvua muipate.

¹⁴ Tuetu bonsu tudi ne bua kufua. Diba adi tudi anu bu mayi adibu bitshikija panshi, kabayi mua kuaboya kabidi to. Kadi mpindiewu, Mvidi Mukulu kena musue kuenzela Absalome nanku to. Mvidi Mukulu mmumane kulongolola bua Absalome uvuabu bipate apingane pabuipi nende.

¹⁵ Mukalenga, ndi nkuambila bionsu ebi, bualu ndi ntshina bana betu. Ke meme kuamba ne: “Ndi musue kuyukila ne mukalenga Davide. Misangu mikuabu udi mua kuitaba tshindi mmulomba.

¹⁶ Udi mua kunsungidila mu bianza bia muntu udi ukeba mua kunshipa, kushipa kabidi ne muananyi, kutumusha munkatshi mua tshisamba tshia bantu badi Mvidi Mukulu musungule.”

¹⁷ Nanku, mukalenga, meme mvua ngela meji ne: “Diandamuna dia mukalenga neditusambe, bualu mukalenga, wewe udi bu mutumibue wa Mvidi Mukulu, udi mumanye mua kusunguluja bualu buimpe ne bubi.” Nanku Maweja-Nangila Mvidi Mukulu webe ikale nebe!

¹⁸ Mukalenga Davide kumuambila ne: — Ndi musue kukukonka bualu. Ungandamune, kunsokoki to. Mukaji kuandamuna ne: — Eyowa, mukalenga, konkaku!

¹⁹ Mukalenga kumukonka ne: — Kanuena balongolola bionsu ebi pamue ne Yowabe anyi? Mukaji kuandamuna ne: — Bulelela, mukalenga wanyi, kabena mua kukusokoka bualu to. Bu muudi ne muoyi, ndi nkujadikila ne: mbua bushuwa! Muntu webe Yowabe ke udi mungambile bionsu bindi muakule ebi.

²⁰ Yowabe mmusue nenku bua kulongolola tshilumbu. Kadi mukalenga wewe udi mumanye bionsu bidi bienzeka pa buloba, bualu udi ne meji matue bu a mutumibue wa Mvidi Mukulu.

²¹ Mukalenga Davide kuya kuyukila ne Yowabe, umuambila ne: — Ndi mumane kuitaba bua kuenza tshiudi mulomba. Uye kukeba nsongalume Absalome, ufike nende muaba ewu.

²² Yowabe kudiela mpala panshi kumpala kua mukalenga Davide. Kumuelaye tuasakidila, wamba ne: — Mukalenga, mpindiewu ndi mujadika ne: udi munnange bushuwa. Bualu udi muitabe bua kuenza tshimvua mukulombe.

²³ Yowabe kujuka, kuya ku Ngeshure. Kupinganaye ne Absalome ku Yerushalayime.

²⁴ Mukalenga Davide kumuambila ne: — Absalome aye amu ku nzubu kuende! Kafiki muaba undi to! Nanku Absalome kuya ku nzubu kuende. Kena mumonangane ne mukalenga Davide to.

Davide udi umvuangana ne Absalome

²⁵ Mu ditunga dijima dia bena Izrayele, kamuvua muntu mukuabu uvua ukemesha bantu bonsu bua buimpe buende, bu Absalome to. Absalome uvua muimpe biangatshile ku dikasa too ne ku mutu. Kavua ne tshilema nansha tshimue pambidi.

²⁶ Absalome uvua udikosa nsuki ku ndekelu kua tshidimu tshionsu. Bualu nsuki yende ivua ne bujitu bua bungi. Pavua Absalome upima nsuki ayi, ivua ne bujitu bua kilo ibidi, bilondeshile bipimu bivua nabi mukalenga Davide.

²⁷ Absalome uvua ne bana ba balume basatu, ne muana wa bakaji umue. Dina dia muana wa bakaji awu divua Tamare. Tamare uvua muimpe mutambe.

²⁸ Absalome kushala mu Yerushalayime bidimu bibidi. Mukalenga Davide kubenga bua Absalome kafiki ku nzubu kuende.

²⁹ Dituku dikuabu, Absalome kubikidisha Yowabe bua kumutuma kudi mukalenga Davide. Kadi Yowabe kubenga mua kufika ku nzubu kua Absalome. Absalome kumutumina muntu musangu muibidi. Yowabe kubenga kabidi.

³⁰ Pashishe Absalome kuambila bena mudimu bende ne: — Nudi bamone budimi bua Yowabe bua ntete ya kuenza bukula, budi pabuipi ne buanyi? Nuye kubosha! Bena mudimu kuenza tshivua Absalome muambe.

³¹ Yowabe kuya ku nzubu kua Absalome lukasa, umukonka ne: — Bena mudimu bebe, mboshe budimi buanyi bua tshinyi?

³² Absalome kuandamuna ne: — Bualu mvua mukubikile, wewe kubenga. Meme mvua musue kukutuma kudi mukalenga Davide bua wewe kumuambila ne: “Ndi mumuke ku Ngeshure bua tshinyi? Bivua bimpe bua meme kusomba amu ku Ngeshure!” Mpindiewu, ndi musue kufika ku nzubu kua mukalenga. Pangikala muenze bibi, mukalenga anshipe!

³³ Yowabe kuya kumanyisha mukalenga Davide bionsu bivua Absalome muambe. Mukalenga Davide kubikidisha Absalome. Absalome kuya lubilu, kudiela mpala panshi kumpala kua mukalenga. Ke mukalenga Davide kumupukila.