2 Samuele 13 - MUKANDA WA MYIDI MUKULU

Amnone ne Tamare

¹ Malu makuabu avua menzeka pashishe. Absalome, muana wa Davide, uvua ne muanabu wa bakaji muimpe mutambe, dina diende Tamare. Amnone, muana mukuabu wa Davide, kunanga Tamare bikole.

² Nanku, Amnone kutuadija kusama, bualu kavua ne dikisha bua Tamare, muana mukuabu wa tatuende uvuaye ujinga. Amnone kavua ne mushindu wa kubuelela Tamare mu nzubu, bualu Tamare kavua muanji kumanya balume.

³ Kadi Amnone uvua ne mulunda wende mudimuke bikole, Yonadabe, muana wa Shama. Shama uvua muanabu ne Davide.

⁴ Yonadabe kukonka Amnone ne: — Muana wa mukalenga, udi uleja mpala mubi ku dituku dionsu nunku bua tshinyi? Kuena mua kungambilaku tshidi tshikutonda anyi? Amnone kuandamuna ne: — Bualu ndi munange Tamare, muakunyi wa Absalome, muanetu wa tatu.

⁵ Yonadabe kumupesha meji ne: Nanku, ulala pa bulalu bu muntu udi usama. Pikala mukalenga Davide mufike bua kukusamba, umuambile ne: “Itaba bua muanetu wa bakaji Tamare, afike bua kundambila biakudia. Neandambile biakudia abi, meme mutangile. Yeye nkayende neampeshe biakudia abi, bua meme kudia.”

⁶ Nanku, Amnone kulala bu muntu udi usama. Mukalenga Davide kufika bua kumusamba. Amnone kumuambila ne: — Itaba bua muanetu wa bakaji Tamare, afike kumpala kuanyi bua kundambila mikata ibidi. Ayimpeshe yeye nkayende, bua meme kudia.

⁷ Nanku Davide kutuma muntu bua kuambila Tamare ku nzubu kuvuaye ne: — Ndaku ku nzubu kua muanenu Amnone, umulambile biakudia.

⁸ Tamare kuya kua Amnone, kumusangana mu bulalu. Kusopaye bukula, kukanga mikata, muanabu Amnone mutangile.

⁹ Pashishe Tamare kuteka mikata ayi mu dilongu, kupesha muanabu. Kadi Amnone kubenga mua kudia. Kutumaye diyi bua bantu bonsu bapatuke. Bantu bonsu kupatuka.

¹⁰ Amnone kuambila Tamare ne: — Luaku, umpeshe mikata mu bulalu emu. Ke muaba undi musue bua wewe nkayebe uyimpeshile bua meme kudia. Tamare kuambula mikata iwaye muenze, kuyaye nayi too ne ku bulalu bua Amnone.

¹¹ Pavua Tamare umupesha mikata ayi bua kudia, Amnone kukuata Tamare, umuambila ne: — Tamare wetu, luaku tulale nebe.

¹² Tamare kubenga ne: — Nansha, Amnone wetu! Kuena mua kunkuata ku bukole to! Bena Izrayele kabena benza malu a mushindu ewu to. Kuenji bibi nanku to!

¹³ Wewe muenze nanku, meme nengendela njila kaayi? Wewe kabidi kuakuikala ne mushinga munkatshi mua bena Izrayele to. Nanku, anji kuambila mukalenga Davide bualu ebu. Kena mua kubenga bua wewe kunsela to.

¹⁴ Amnone kubenga bionsu abi, kutekesha Tamare, kulala nende ku bukole.

¹⁵ Pashishe kutuadijaye kukina Tamare bikole. Lukinu luende kupita dinanga divuaye munange Tamare kumpala. Nanku, kuipataye Tamare, umuambila ne: — Umbuka apa!

¹⁶ Tamare kuandamuna ne: — Nansha! Paudi ungipata nenku, udi wenza kabidi bibi bipite biudi mumane kuenza! Kadi Amnone kubenga kabidi bionsu abi.

¹⁷ Kubikilaye nsongalume muena mudimu wende, umuambila ne: — Ipata nsongakaji ewu mu nzubu muanyi. Papatukaye ukange tshiibi bikole.

¹⁸ Muena mudimu kuipata Tamare, kukanga tshiibi. Tamare uvua muvuale muntumpu muimpe mutambe, bu mudi bana ba bakalenga bavuala padibu kabayi banji kubuela mu dibaka.

¹⁹ Nanku kudielaye butu mu mutu, kupanda muntumpu wende muimpe. Kubuikilaye bianza kuisu, kuyaye, wenda udila bikole.

²⁰ Mukuluende Absalome kumukonka ne: — Muakunyanyi wa bakaji! Amnone mmukubuelele mu nzubu ku bukole anyi? Lekela mutoyi, bualu ebu kabukutondi to. Amnone mmuanenu! Biangatshile diba adi, Tamare kusomba ku nzubu kua mukuluende Absalome ne kanyinganyinga, bu mukaji udibu babenga ku dibaka.

²¹ Mukalenga Davide kupeta lumu lua bionsu bivua bienzeka abi. Kufikaye munda bikole. Kadi kena mutandishe Amnone to, bualu uvua muanende muanabute, kabidi uvua mumunange bikole.

²² Bu muvua Amnone mubuelele muakunyende Tamare mu nzubu ku bukole, Absalome kumujila, kumukina bikole bipite.

Absalome udi ushipesha Amnone, pashishe udi unyema

²³ Bidimu bibidi bimane kupita, dituku dikuabu, Absalome uvua ne bakoshi ba miosa ya mikoku ku nzubu kuende ku musoku wa Baale-Ashore, pabuipi ne tshimenga tshia Efrayime. Kubikidishaye bana ba mukalenga Davide bonsu.

²⁴ Kuyaye kuambila Davide ne: — Mukalenga, ndi ne bakoshi ba miosa ya mikoku ku nzubu kuanyi. Wewe ufike mu tshibilu etshi, ne balombodi ba mu bukalenga bebe bonsu.

²⁵ Mukalenga Davide kubenga ne: — Nansha muananyi! Tuetu bafike bonsu ku tshibilu atshi, udi mua kutata bikole. Absalome kusengelela mukalenga Davide bikole. Kadi, mukalenga Davide kubenga mua kuya. Kumuelaye anu lupemba.

²⁶ Absalome kuambila kabidi mukalenga Davide ne: — Bu muudi ubenga bua kuya, nanku itaba bua tuye nansha ne muanetu Amnone. Mukalenga Davide kukonkaye ne: — Udi musue kuya ne Amnone bua tshinyi?

²⁷ Absalome kusengelela kabidi mukalenga Davide bikole. Nanku mukalenga Davide kuitaba bua Amnone aye. Kuitabaye kabidi bua bana bende bakuabu baye ne Absalome.

²⁸ Ke Absalome kutumina bena mudimu bende diyi ne: — Nutangile Amnone bikole. Pikalaye mumane kukuatshika maluvu, meme nennuambile ne: “Tapayi Amnone!” Nanku nenumutute, numushipe. Kanutshinyi to, meme ke udi munutume. Nuikale ne dikima, nuleje bukitu buenu!

²⁹ Bena mudimu kukumbaja bionsu bivua Absalome muambe. Kushipabu Amnone. Bana bakuabu ba mukalenga Davide kujuka ku mesa diakamue, kubanda muntu yonsu pa nyama wende wa mpunde, kunyema.

³⁰ Patshivua bana abu mu njila, mukalenga Davide kupeta lumu ne: “Absalome mmushipe bana bebe ba balume bonsu. Kakuena kushala muana nansha umue to.”

³¹ Nanku, mukalenga Davide kupanda bilamba biende, kulala panshi mu buloba. Balombodi ba mu bukalenga buende bonsu, kupanda bilamba biabu, kuimana pabuipi ne Davide.

³² Kadi, Yonadabe, muana wa Shama (Shama ke uvua tatuende wa Davide), kuambila Davide ne: — Mukalenga, kuedi meji ne: mbashipe bana bebe ba balume bonsu to. Mbashipe amu Amnone nkayende. Absalome uvua mumane kulaya bua kuenza bualu ebu, biangatshile dituku divua Amnone mubuelele muanabu Tamare mu nzubu ku bukole.

³³ Nanku kuedi meji ne: bana bebe mbalue bonsu to. Mbashipe anu Amnone nkayende.

³⁴ Kabidi Absalome mmunyeme. Nsongalume uvua wenza mudimu wa kutentekela, kumonaye bantu musumba balonda njila wa ku Oronayime. Kuyaye kuambila mukalenga Davide ne: — Ndi mumone bantu balua kuneku, bapueka pa mukuna balonda njila wa ku Oronayime.

³⁵ Yonadabe kuambila kabidi Davide ne: — Mukalenga, bana bebe bafiki! Bionsu mbienzeke anu bu mumvua mukuambile.

³⁶ Anu Yonadabe ujikija kuakula, bana ba mukalenga Davide kufika. Kudilabu miadi bikole. Mukalenga Davide muine, ne balombodi ba mu bukalenga buende bonsu, kudila bikole.

³⁷ Absalome mumane kunyema, kuya ku nzubu kua Talmayi, muana wa Amikude, uvua mukalenga wa mu ditunga dia Ngeshure.

³⁸ Kushalaye ku nzubu aku bidimu bisatu. Mataku onsu awu, mukalenga Davide uvua amu unyingalala bua lufu lua muanende Amnone.

³⁹ Kanyinganyinga kavua mukalenga Davide naku, bua lufu lua Amnone kamane kujika, tshiji tshivuaye mutekele Absalome kujika patshi.