2 Samuele 11 - MUKANDA WA MYIDI MUKULU

Davide ne Batsheba

¹ Ku ntuadijilu wa tshidimu bakalenga bavua ne tshibidilu tshia kuya mu mvita. Nanku mukalenga Davide, uvua mutume pende Yowabe, mfumu wa bena mvita ba bena Izrayele, ne balombodi babu, bua baye kuluisha bena Amone. Bena Izrayele kunyangakaja ditunga dia bena Amone, kuluisha bena tshimenga tshia Raba. Davide uvua mushale mu Yerushalayime.

² Dituku dikuabu dilolu, Davide mumane kuikisha, kujukaye bua kuololoka, wendakana ku musaka wa nzubu wende wa bukalenga. Kumonaye mukaji wowa mayi. Mukaji awu uvua muimpe mutambe.

³ Davide kukonka bantu bua mukaji awu. Kumuambilabu ne: “Mukaji ewu ke Batsheba, muana wa Eliyame, mmukaji wa Uriya, muena Iti.”

⁴ Davide kutuma bantu bua babikile mukaji awu. Mukaji mumane kufika, Davide kumubuelela mu nzubu! Pashishe, mukaji kupingana ku nzubu kuende. Kadi mukaji awu, utshivua umukilaku ku dijikija mikiya ya tshijila tshia bakaji.

⁵ Batsheba kuimita difu, kumanyisha Davide ne: — Ndi mumvue ne: ndi mumane kuimita.

⁶ Ke Davide kutuma diyi lukasa kudi Yowabe, mfumu mulombodi wa bena mvita ne: — Untumine Uriya, muena Iti. Yowabe kumutumina Uriya.

⁷ Uriya mumane kufika, Davide kumukonka bua Yowabe, bua bena mvita bonsu, ne bua mushindu uvua mvita mienzeke.

⁸ Pashishe Davide kuambila Uriya ne: — Uye ku nzubu kuebe bua kuikisha kakese. Uriya kumuka ku nzubu kua mukalenga. Davide kumutuminaye bintu bia disanka.

⁹ Kadi, Uriya kena muye ku nzubu kuende nansha. Kuyaye kulala pabuipi ne ku tshibuelelu tshia ku nzubu wa mukalenga, muaba uvua bena mvita bavua balame mukalenga Davide balala.

¹⁰ Kumanyishabu Davide bua muaba uvua Uriya mulale. Davide kukonka Uriya ne: — Wewe udi mushale ku luendu matuku a bungi, kuena muye ku nzubu kuebe bua kuikisha bua tshinyi?

¹¹ Uriya kuandamuna ne: — Mukalenga, mushete wa tshijila wa Maweja-Nangila udi anu mu ntenta, ne bena mvita bonsu ba bena Izrayele, ne ba bena Yuda kabidi badi balala amu mu ntenta. Yowabe mfumu wa bena mvita, ne balombodi bebe bonsu ba bena mvita, mbase mitanda anu mu mpata. Kadi matuku a mushindu ewu, meme ndi mua kuya ku nzubu kuanyi bua kudia, kunua, ne kubuelela mukajanyi mu nzubu anyi? Ndi nditshipa ne: kashidi tshiena mua kuenza bualu bua mushindu ewu nansha kakese!

¹² Mukalenga Davide kuitaba ne: — Eyowa mbimpe. Nanku ushale anu muaba ewu lelu, malaba nenkulekele bua wewe kupingana. Nanku, Uriya kulala kabidi mu Yerushalayime dituku adi kutshiabu.

¹³ Davide kumubikidisha bua kudiabu ne kunuabu nende ku mesa. Davide kumuelela maluvu mapite bungi. Uriya kukuatshika. Kadi dilolu Uriya kulala anu muaba uvua bena mvita bavua balame mukalenga Davide. Kena muye kulala ku nzubu kuende to.

¹⁴ Butshia dinda, Davide kufunda mukanda, kupesha Uriya bua aye nawu kudi Yowabe mulombodi wa bena mvita.

¹⁵ Mu mukanda awu, Davide uvua mufunde ne: “Uteke Uriya anu mulongu wa kumpala, muaba udi mvita mikole. Pashishe numuke, numushiye nkayende bua bamuase kudi baluishi, bamushipe.”

Lufu lua Uriya, bayende wa Batsheba

¹⁶ Pavua Yowabe mutuadije kuluisha bena Raba, kutekaye Uriya muaba uvuaye mumone baulame kudi baluishi ba bukitu.

¹⁷ Bantu bavua balame tshimenga atshi kupatukabu, bua kuluisha Yowabe ne bena mvita bavuaye nabu. Kushipabu bena mvita bakuabu ba Davide, ne balombodi bakuabu ba bena mvita. Kushipabu kabidi ne Uriya.

¹⁸ Nanku, Yowabe kutuma muntu bua kumanyisha Davide bionsu bivua bienzeka mu mvita.

¹⁹ Yowabe uvua muambile muntu awu ne: — Pawikala mumane kumanyisha mukalenga Davide bionsu bivua bienzeka mu mvita,

²⁰ misangu mikuabu mukalenga udi mua kufika munda, ukukonka ne: “Nuvua basemena anu pabuipi ne tshimenga bua kuluangana bua tshinyi? Kanuvua bamanye ne: bantu badi kulu ku bimana badi bela miketa ne mabue anyi?

²¹ Uvua mushipe Abimeleke, muana wa Yerubaale, ku Tebese nnganyi? Uvua anu muntu mukaji! Mukaji awu uvua mubande kulu pa tshimana tshia tshimenga. Kuasaye Abimeleke dibue dia mpelu. Abimeleke kufila! Kadi nuenu, nuvua basemena pabuipi ne bimana bua tshinyi? Pikala mukalenga Davide mukukonke nanku, umuambile ne: ‘Mulombodi wa bena mvita, Uriya muena Iti, mmufue kabidi.’ ”

²² Muntu uvua Yowabe mutume, kuyaye kuambila mukalenga Davide bionsu bivua bienzeka mu mvita.

²³ Kuambilaye mukalenga Davide ne: — Bantu bavua balame tshimenga bavua batupite bukole. Bavua bapatuka mu tshimenga bua kutuluisha mu mpata. Tuetu kubipata too ne ku tshiibi tshia tshimenga.

²⁴ Kadi bantu bavua kulu ku bimana, ne mata ne miketa, kutuasa miketa. Nanku balombodi ba bena mvita bebe bakuabu mbalue, ne Uriya, muena Iti, mmufue kabidi.

²⁵ Mukalenga Davide kuambila muntu awu ne: — Pingana ku mvita, ukoleshe Yowabe ku muoyi, umuambile ne: “Bualu ebu kabukutondi to. Bualu mu mvita bantu badi anu bafua nseke yonsu ibidi. Nanku uluishe tshimenga atshi bikole, ntshibutule.”

²⁶ Batsheba upeta lumu lua lufu lua bayende Uriya, kutekaye madilu.

²⁷ Kadi batangalaja madilu, Davide kubikidisha Batsheba ku nzubu kuende, kumusela. Mukaji kulela muana wa balume.