2 Samuele 10 - MUKANDA WA MYIDI MUKULU

Badi bafuisha balombodi ba mu bukalenga bua Davide bundu

¹ Matuku mamane kupita, mukalenga wa bena Amone kufua, muanende Anune kumupingana mu bukalenga.

² Davide kuamba ne: “Ndi musue kuenzela Anune, muana wa Nakashe bimpe, bu muvue tatuende mungenzele.” Nanku, Davide kutuma balombodi ba mu bukalenga buende kudi Anune, bua kumusamba bua lufu lua tatuende. Balombodi ba mu bukalenga bua Davide bamane kufika mu ditunga dia bena Amone,

³ balombodi ba mu bukalenga bua bena Amone kuambila mfumuabu Anune ne: — Udi wela meji ne: Davide mmutume balombodi ba mu bukalenga buende anu bua kukusamba bua lufu lua tatuebe anyi? Mmubatume bua kutentekela tshimenga etshi, bua kutshikuatabu dituku dikuabu.

⁴ Nanku Anune kutuma diyi, bua bakuate balombodi ba mu bukalenga bua Davide. Kubakuatabu, kubabeya miedi luseke lumue. Kubakosabu bilamba bivuabu bavuala, kushalabi bishikidila pa mataku. Kubalekelabu bua bapingane kuabu.

⁵ Kumanyishabu Davide bionsu abi. Kutumaye bantu bua baye kuakidila balombodi ba mu bukalenga buende, bualu bavua ne bundu bua bungi. Mukalenga Davide kubatumina diyi ne: “Nusombele amu mu tshimenga tshia Yeriko too ne pikala miedi yenu mimena kabidi. Pashishe nenufike muaba ewu.”

Davide udi uluisha bena Amone ne bena Siriya

⁶ Bena Amone kumona ne: Davide ukadi muluishi wetu. Nanku kufutabu bena mvita binunu makumi abidi ba bena Siriya, ba mu Beterekobe ne mu Soba, bena mvita tshinunu ba mukalenga wa Maaka, ne bena mvita binunu dikumi ne bibidi ba mu Tobe.

⁷ Davide upeta lumu lua bena mvita bavua badisangisha abu, kutumaye Yowabe, mfumu mulombodi wa bena mvita bende, ne bena mvita bonsu bavua bamanye mvita bikole.

⁸ Bena Amone kuya kuela mualu wa mvita pabuipi ne tshiibi tshia tshimenga tshiabu tshinene. Bena Siriya ba mu Soba, ne ba mu Beterekobe, ne bena mvita ba mu Tobe, ne ba mu Maaka, bavua bela mualu wa mvita luseke lukuabu mu mpata.

⁹ Yowabe kumona ne: baluishi bende badi bitupa bibidi: aba kumpala kuende, bakuabu panyima. Nanku kusungulaye bena mvita ba bena Izrayele bavua bamanye mvita bikole. Kubatekaye batangilangane ne bena Siriya.

¹⁰ Bena mvita bende bavua bashala, kubapeshaye muanabu Abishayi, kubatekaye batangilangane ne bena Amone.

¹¹ Yowabe kuambila muanabu Abishayi ne: — Pikala bena Siriya bampite bukole, wewe neungambuluishe. Kadi pikala bena Amone bakupite bukole, meme nenkuambuluishe.

¹² Nanku kolesha muoyi, tuluangane mvita eyi ne dikima, bua tusungidile bana betu bena Izrayele, ne bimenga bia Mvidi Mukulu wetu. Maweja-Nangila enza mudiye musue.

¹³ Yowabe ne bena mvita bende kusemena bua kuluisha bena Siriya. Bena Siriya kunyema Yowabe.

¹⁴ Bena Amone bamone bena Siriya banyema, kunyemabu Abishayi, kupinganabu mu tshimenga tshiabu. Ke Yowabe kutekesha mvita ivuabu baluisha bena Amone, kupinganabu mu tshimenga tshia Yerushalayime.

¹⁵ Bena Siriya kujadika ne: bena Izrayele mbatupite bukole. Nanku kusangishabu bena mvita babu bonsu.

¹⁶ Adadezere kutuma bantu, ubikila bena Siriya bonsu bavua base dishiya dia musulu wa Perate. Bena Siriya abu, kufika ku Elame. Shobake, mfumu wa bena mvita ba Adadezere, ke uvua ubalombola.

¹⁷ Davide kupeta lumu lua bena mvita abu. Kusangishaye bena mvita bonsu ba bena Izrayele. Kusabukabu Yardene, kuyabu ku Elame. Bena Siriya kuela mualu wa mvita, batangilangane ne Davide. Bena Siriya kutuadija mvita,

¹⁸ kadi bena Izrayele kubatshimuna. Bena Siriya kunyema. Davide ne bena mvita bende, kushipa nyama ya tubalu ivua ikoka matempu a mvita, ne bena mvita bavua pa matempu abu, nkama muanda mutekete, ne bantu binunu makumi anayi, bavua babanda pa nyama ya tubalu. Kutapabu kabidi ne Shobake, mfumu wa bena mvita mputa. Kutuilaye muaba awu.

¹⁹ Nanku bakalenga bonsu bavua ku bumfumu bua Adadezere bamone ne: bena Izrayele mbatupite bukole, kutuabu nabu ndondu, kushalabu ku bumfumu bua bena Izrayele. Bena Siriya kutshina bua kuambuluisha kabidi bena Amone.