2 Kulondolola 7 - MUKANDA WA MYIDI MUKULU

Milambu ivua Shelomu mulambule Maweja-Nangila

¹ Shelomu mumane kujikija ditendelela Maweja-Nangila, kapia kufuma mu diulu, kuosha milambu ya kuosha, ne ya bobumue. Butumbi bua Maweja-Nangila kuwula mu nzubu wa Mvidi Mukulu.

² Batuangaji kabavua mua kubuela muaba wa tshijila, bualu muvua muwule ne butumbi bua Maweja-Nangila.

³ Bena Izrayele bonsu bavua muaba awu, kumonabu kapia kafumina mu diulu, butumbi bua Maweja-Nangila bukenka mu nzubu wa Mvidi Mukulu. Diakamue, kutuabu binu panshi, kuinyika mitu panshi bua kutendelela Maweja-Nangila, kumutumbisha bua bulenga buende ne bua dinanga diende didi kadiyi dijika.

⁴ Mukalenga Shelomu ne bena Izrayele bonsu kulambula Maweja-Nangila milambu.

⁵ Kulambulabu ngombe binunu makumi abidi ne bibidi, mikoku ne mbuji binunu lukama ne makumi abidi, bua kubanjija nzubu wa Mvidi Mukulu.

⁶ Batuangaji bavua anu pa miaba Kuabu benzela mudimu. Bena Levi bavua bimba biombelu bia tshijila, bivua mukalenga Davide muenzeje. Bavua batumbisha Maweja-Nangila, bua dinanga diende didi kadiyi ne ndekelu, bilondeshile musambu uvua Davide mubalongeshe. Batuangaji bavua bela mpungi, batangilangane ne bena Levi aba. Bantu bonsu bavua amu bimane kulu.

⁷ Pashishe, mukalenga Shelomu kujidila tshitupa tshijima tshia pankatshi tshia lubanza luvua kumpala kua nzubu wa Mvidi Mukulu, bualu tshilambuilu tshia tshiamu tshikunze, tshivua Shelomu muashishe, tshivua tshikese, katshiyi tshikumbane mua kulambuilapu milambu yonsu to. Nanku mukalenga uvua ne bua kulambula milambu ya kuosha, ya bintu bia mu madimi, ne manyi a nyama ya milambu ya bobumue amu mu lubanza amu.

⁸ Anu tshikondu atshi, Shelomu ne bena Izrayele bonsu bavua muaba awu bapite bungi, kuenza tshibilu tshia tuzubu tua Bisasa matuku muanda mutekete. Bena Izrayele abu, bavua bafumine mu ditunga dijima dia bena Izrayele, biangatshile ku Lebo-Amate ku mutu mu ditunga, too ne ku musulu wa Ejipitu udi kuinshi mu ditunga.

⁹ Nanku, dituku dia muanda mukulu dia tshibilu, bena Izrayele kuenza tshisangilu tshinene. Kuenzabu tshibilu tshia dijidila dia tshilambuilu matuku muanda mutekete, pashishe tshibilu mene tshia tuzubu tua Bisasa matuku makuabu muanda mutekete.

¹⁰ Dituku dia makumi abidi ne disatu dia ngondu wa muanda mutekete, mukalenga Shelomu kutangalaja bena Izrayele. Kupinganabu bonsu ku nzubu yabu ne musangelu. Bavua ne disanka, bualu Maweja-Nangila uvua muenzele Davide, Shelomu, ne tshisa tshiende tshia bena Izrayele bimpe bitambe.

Maweja-Nangila udi umuenekela Shelomu tshiakabidi

¹¹ Mukalenga Shelomu mumane kujikija diasa nzubu wa Mvidi Mukulu, ne wende yeye wa bukalenga, mumane kukumbaja bionsu bivuaye musue kuenza mu nzubu ibidi eyi,

¹² Maweja-Nangila kumumuenekela munkatshi mua butuku, umuambila ne: — Ndi mumvue dilomba diebe. Ndi muanyishe nzubu ewu bua bikale bandambuilamu milambu.

¹³ Dituku dikuabu pangikala mukange diulu, mvula kayi uloka, nansha pangatuma mpasu bua kunyanga ditunga, nansha pangatumina bantu banyi bena Izrayele tshipupu tshia disama dia tshiambu,

¹⁴ padi bantu banyi bena Izrayele, bandi muinyike dina dianyi, badipuekesha, bantendelela, padi bena Izrayele bankeba, balekela bibidilu biabu bibi, Meme Maweja-Nangila, mu diulu mundi, nembateleje. Nembalekele bilema biabu, nengakaje ditunga diabu.

¹⁵ Mpindiewu ndi mbatabalela. Nenteleje ditendelela diabu dionsu didibu bantendelela mu nzubu ewu.

¹⁶ Ndi musungule nzubu ewu, mumujidile bua meme kuikala munkatshi muenu kashidi. Nennutabalele kashidi, amu ne muoyi wa kunuenzela bimpe.

¹⁷ Kadi, Shelomu, wewe mungitabe, bu muvua tatuebe Davide mungitabe, wewe mukumbaje bionsu bindi nkuambila, mutumikile meyi ne mikenji bianyi bimvua mukupeshe,

¹⁸ umanye ne: nenjadike bumfumu buebe kashidi, bilondeshile ndondu umvua mutue ne tatuebe Davide, mumuambile ne: misangu yonsu muntu wa ku ndelanganyi yebe neakupingane mu bukalenga bua bena Izrayele.

¹⁹ Kadi, wewe muntombokele, kuyi ukumbaja meyi ne mikenji bianyi bimvua mukupeshe, wewe mutendelele mvidie mikuabu, wewe muyituile binu bua kuyikukuila,

²⁰ nenkuipate mu buloba bumvua mukupe, nengumuke mu nzubu ewu undi mujidile bua nuenu kuntendelelamu. Nanku bantu ba bisamba bikuabu nebaseke bena Izrayele, bahele bibingu.

²¹ Padi bantu bapitshila pabuipi ne nzubu munene wa lumu ewu mumane kunyanguka, nebakeme, bakonka ne: “Maweja-Nangila mmunyangakaje ditunga edi ne nzubu ewu nenku bua tshinyi?”

²² Nebabandamune ne: “Bualu bena Izrayele mbatombokele Maweja-Nangila Mvidi Mukulu wabu, uvua mupatule bankambua babu mu Ejipitu. Maweja-Nangila udi ubakengesha nenku, bualu badi batendelela mvidie mikuabu.”