2 Korente 10 - MUKANDA WA MYIDI MUKULU

Polu udi ndilumbuluila

¹ Meme Polu, ndi ne bua kudilumbuluila mpindiewu. Badi bangamba ne: ndi ne bowa, pandi munkatshi muenu. Kadi pandi kule, ndi nnubela ne dikima. Bu mudi Kristu ne muoyi mulenga wa bupole, ndi nnusengelela ne:

² kanumbikidi bua meme kuleja dikima pandi munkatshi muenu. Bualu tshiena ntshina bantu badi banjana, bamba ne: udi ukeba amu bia panu!

³ Bushuwa, tudi amu bantu. Kadi katuena baluangana ne bia mvita bia bantu.

⁴ Bia mvita bitudi uluangana nabi, kabiena bia bantu ba panu. Kadi bidi bia mvita bikole bitudi bapete kudi Mvidi Mukulu, bitudi mua kubutula nabi nzubu ivuabu bakoleshe ne bimana. Tudi tu-vingutula nabi meji a dishima.

⁵ Tudi tubumbula nabi ditambisha dionsu didi dijikila njila wa kumanya Mvidi Mukulu. Tudi tuela meji onsu mu nkanu, bua itabe Kristu.

⁶ Nuenu bamane kuitaba Kristu muenu muonsu, netuikale nenu pabuipi, bua kunyoka bantomboji bonsu.

⁷ Nudi nutangila nangananga bidi bimueneka ku mesu. Nanku padi muntu wela meji ne: ndi wa Kristu, amanye ne: tuetu kabidi tudi ba Kristu, mudiye yeye amu.

⁸ Tshiena ne bua kufua bundu, nansha meme muditambishe kakese, bua bumfumu buvua Mfumu mutupeshe. Bumfumu ndi nabu amu bua kunutuma kumpala mu tshisumbu, ki mbua kunubutula nabu to.

⁹ Tshiena musue kumueneka bu muntu udi ukeba kunukuatshisha bowa ne mikanda yanyi.

¹⁰ Bualu badi bamba ne: “Mu mikanda ya Polu mudi miaku mikole idi itapa ku matshi. Kadi padiye munkatshi muetu, udi bu kantu ka patupu, wakula bikuata ne luse.”

¹¹ Muntu udi wamba nanku, amanye ne: bu mudi mikanda yanyi inutapa ku matshi, meme muikale kule, ke muanutapa kabidi miaku yanyi ku matshi patuamonangana nenu mpala ne mpala.

¹² Bushuwa katuena ne dikima dia kuditeka mu mulongu umue, nansha dia kudifuanyikija, ne bamue badi badipa lumu nkayabu. Badi bantu batatakane, badi badienzela tshipimu tshia kudipima natshi, badilumbuluisha bobu nkayabu.

¹³ Kadi tuetu katuena basue kuditambisha tupita mikalu. Mvidi Mukulu uvua muanyishe bua tulongeshe Lumu lua Disanka kuenu aku. Ke bindi mua kuditambishila.

¹⁴ Bu tuetu katuyi bafike kuenu aku, tuvua mua kupita mikalu. Kadi nudi munda mua mikalu idi Mvidi Mukulu mutufundile. Bualu tuvua bafike kuenu aku, banumanyishe Lumu lua Disanka lua Kristu.

¹⁵ Nanku katuena tusambuka mikalu. Katuena tuditemba bua midimu ivua bakuabu bakuate. Kadi tudi batekemene ne: ditaba dienu nedikole, bua tumone mua kukuata mudimu mupite bunene munkatshi muenu, katuyi tupita mikalu ivua Mvidi Mukulu mutufundile.

¹⁶ Ditaba dienu dimane kukola, netumone mua kutantshisha Lumu lua Disanka mu matunga a kupita kuenu aku, katuyi tuditemba bua mudimu uvua bakuabu bakuate muaba mukuabu.

¹⁷ Ke mudi Mukanda wa tshijila wamba ne: “Udi musue kuditemba, aditembe bua bidi Mfumu muenze.”

¹⁸ Bualu muntu udi udianyisha, kena ne mushinga nansha, kadi amu udi Mfumu muanyishe.