2 Bakalenga 9 - MUKANDA WA MYIDI MUKULU

Badi bajidila Yehu, ikale mukalenga

¹ Dituku dikuabu, muambi Elisha kubikila nsongalume wa mu tshisumbu tshia bambi, kumuambila ne: — Udilongolole, ndi nkutuma ku luendu. Angata kalondu ka mafuta a tshijila aka. Uye mu tshimenga tshia Ramote mu ditunga dia Ngilaade.

² Pawafika, umonangane ne muikulu wa Nimshi, dina diende Yehu, muana wa Yosafate. Umubikile, umuke nende munkatshi mua bana babu, uye nende mu tshibambalu tshikuabu.

³ Wangate kalondu ka mafuta, umuele mafuta pa mutu, umuambile ne: Maweja-Nangila udi wamba ne: “Ndi nkujidila bua wikale mukalenga wa bena Izrayele!” Pashishe, kujingakanyi to. Unzulule tshiibi, upatuke lubilu.

⁴ Nanku, muambi nsongalume awu kuya mu tshimenga tshia Ramote mu ditunga dia Ngilaade.

⁵ Yeye mumane kufika, kusangana bamfumu ba bena mvita ba bena Izrayele mu tshisangilu. Muambi nsongalume kuamba ne: — Mfumu ndi ne bualu bua kukuambila! Yehu kumukonka ne: — Kutudi eku udi musue kuyukila ne nganyi? Muambi nsongalume kuandamuna ne: — Mfumu, anu wewe.

⁶ Yehu kujuka, kuya nende ku nzubu. Muambi nsongalume kumuela mafuta pa mutu, umuambila ne: — Maweja-Nangila Mvidi Mukulu wa bena Izrayele udi wamba ne: “Ndi nkujidila bua wikale mukalenga wa bantu banyi bena Izrayele.

⁷ Wewe neushipe ndelanganyi ya Akabe, mfumuebe wa kale. Ndi ngenza nanku bua kusombuela bua bena mudimu banyi bonsu, bambi ne bantu bakuabu, bavua Yezabele mushipeshe.

⁸ Bulelela, bena nzubu wa Akabe bonsu nebafue. Nembutule bena diku dia Akabe bonsu: bantu bakole ne bana batekete.

⁹ Angenzele bena nzubu wa Akabe anu bu mumvua muenzele bena nzubu wa Yerobowame, muana wa Nebate, ne bena nzubu wa Basha, muana wa Akiya.

¹⁰ Kadi tshitalu tshia Yezabele kabakutshijika to. Mbua neitshidile mu budimi bua Yizreyele.” Muambi nsongalume wamba nanku, kunzulula tshiibi. Kapatuka lubilu.

¹¹ Ke Yehu kupatuka, kupingana muaba uvua balombodi bakuabu ba mukalenga. Balombodi abu kumukonka ne: — Malu kaayi? Muntu mutomboke ewu uvua mulue kukuambila tshinyi? Yehu kuandamuna ne: — To, ki mmuambe bualu to! Nudi bamanye malu adibu bamba kudi bambi ba mushindu ewu.

¹² Balombodi kuandamuna Yehu ne: — Udi ushima. Mbimpe utuambile bionsu bidiye mukuambila. Nanku Yehu kubambila ne: — Bulelela, muambi ewu mmungambile malu, kadi nangananga mmungambile ne: Maweja-Nangila udi wamba ne: “Ndi nkujidila bua wikale mukalenga wa bena Izrayele.”

¹³ Diakamue, balombodi bonsu abu, kuangata bilamba biabu, kubiadija pa mutu pa tshibandilu bua Yehu kuimanapu, bena misambu kuela mpungi. Bantu bonsu kuela mbila, bamba ne: “Mukalenga Yehu, akuate ku mundundu.”

Yehu udi welela mukalenga Yorame tshifufu

^14-15 Tshikondu atshi, bena mvita bonsu ba bena Izrayele bavua balame tshimenga tshia Ramote tshivua mu ditunga dia Ngilaade, bua Azayele, mukalenga wa bena Siriya, kabuedimu to. Kadi, pavua mukalenga Yorame uluisha Azayele, bena Siriya kumutapa mputa. Nanku, mukalenga Yorame kuya kudiondapisha mputa ayi, mu tshimenga tshia Yizreyele. Kushalaye mu bulalu muaba awu. Kadi muikulu wa Nimshi, dina diende Yehu, muana wa Yosafate, kuelela Yorame tshifufu. Yehu kuambila bena mvita bakuabu ne: — Panuikala ku luseke luanyi, nudimuke. Muntu kena mua kumuka mu tshimenga bua kuya kuambila bena mu Yizreyele bidi bienzeka muaba ewu to.

¹⁶ Pashishe, Yehu kubanda pa ditempu diende dia mvita, kuya mu Yizreyele muaba uvua Yorame, mu bulalu bua kudiondapisha. Akaziya mukalenga wa bena Yuda kabidi uvua muye mu tshimenga atshi bua kusamba Yorame.

¹⁷ Mutentekedi uvua muimane pa tshibumba tshia mu tshimenga tshia Yizreyele, kumonaye tshisumbu tshia bena mvita bavua ne Yehu. Kuambilaye mukalenga Yorame ne: — Ndi mumone tshisumbu tshia bena mvita bafika. Mukalenga Yorame kumuambila ne: — Utume muntu mubande pa nyama wa kabalu, aye kusambakena nabu bua kubakonka ne: Nudi bavuile tshinyi?

¹⁸ Mubandi wa pa nyama wa kabalu kuya kusambakena ne bantu abu, kubambila ne: — Mukalenga Yorame udi ukonka ne: Nudi bavuile tshinyi? Yehu kuandamuna ne:. — Udi musue kubuelakana mu bualu ebu bua tshinyi? Buela mu tshisumbu tshietu. Ke mutentekedi kuambila mukalenga Yorame ne: — Muntu uudi mutume, mmumane kufika kudi bantu abu. Kadi kena upingana kuneku to.

¹⁹ Mukalenga Yorame kutuma muntu muibidi, mubandi wa pa nyama wa kabalu. Muntu awu ufika kudibu, kubambilaye ne: — Mukalenga Yorame udi ukonka ne: Nudi bavuile tshinyi? Yehu kumukonka ne: — Udi musue kubuelakana mu bualu ebu bua tshinyi? Buela mu tshisumbu tshietu.

²⁰ Mutentekedi kuambila mukalenga Yorame ne: — Muntu muibidi uudi mutume, mmumane kufika kudi bantu abu. Kadi kena upingana kuneku to. Kadi ndi mumone ne: udi uvua awu ke Yehu muikulu wa Nimshi. Ndi mumumanye bualu udi wendesha ditempu bu muntu mupale.

²¹ Mukalenga Yorame kutuma diyi bua basuike nyama ya tubalu ku ditempu diende. Pashishe kubandaye mu ditempu. Akaziya, mukalenga wa bena Yuda, kubandaye kabidi mu diende ditempu. Kuyabu kusambakena ne Yehu. Kumusanganabu pabuipi ne budimi buvua bua Nabote, muena Yizreyele.

Lufu lua Yorame, mukalenga wa bena Izrayele

²² Anu Yorame usambakena ne Yehu, kumukonkaye ne: — Yehu, malu kaayi? Yehu kuandamuna ne: — Udi unkonka nanku bua tshinyi? Udi mumanye bimpe ne: mamuebe Yezabele utshidi utendelela mvidie ya dishima, kabidi utshidi wenza majimbu…

²³ Ke Yorame kukudimuka, kunyemaye wenda wela Akaziya diyi ne: — Akaziya, udimuke! Mbatuelele tshifufu!

²⁴ Yehu kuambula buta buende bua miketa, kuasa Yorame muketa pankatshi pa makaya, kubuelawu ne ku muoyi wa munda, kusompoka. Yorame kudishadila mu ditempu diende, kufua.

²⁵ Ke Yehu kuambila Bidkare, muambuluishe wende wa mu mvita ne: — Ambula tshitalu tshia Yorame, utshimanshe mu budimi bua Nabote, muena Yizreyele. Bualu dituku dituvua nende babidi, tuya ne mukalenga Akabe ne bantu bakuabu benda bendesha matempu, uvuluke muvua Maweja-Nangila mulaye mukalenga Akabe, tatuende wa Yorame ne:

²⁶ “Meme Maweja-Nangila mvua mumone bionsu biuvua muenze makelela. Wewe uvua mutume bantu bua bashipe Nabote ne bana bende ba balume. Nanku, meme Maweja-Nangila, ndi nditshipa bua kukusombuela anu mu budimi ebu.” Nanku, wewe Bidkare, ambula tshitalu tshia Yorame, utshimanshe mu budimi ebu, bu muvua Maweja-Nangila muambe.

Lufu lua Akaziya, mukalenga wa bena Yuda

²⁷ Akaziya, mukalenga wa bena Yuda, umona bionsu abi, kunyemaye kuya luseke lua ku Bete-Gane. Kadi, Yehu kumulondakaja. Kutuminaye bantu bende diyi bua bashipe kabidi Akaziya. Nanku, kuasabu Akaziya patshivuaye wendesha ditempu diende mu njila wa ku musoku wa Ngure, pabuipi ne tshimenga tshia Ibleyame. Kadi, Akaziya kunyema, kuya kufuila mu tshimenga tshia Megido.

²⁸ Bena mudimu ba Akaziya kuambula tshitalu tshiende mu ditempu diende kuya natshi mu Yerushalayime. Kutshijiikabu mu lukita lua bena diku diabu, luvua mu Tshimenga tshia Davide.

²⁹ Akaziya uvua mudie bukalenga bua bena Yuda, mu tshidimu tshia dikumi ne tshimue tshivua Yorame, muana wa Akabe, mu bukalenga.

Lufu lua Yezabele

³⁰ Yezabele kumvuaye lumu lua bionsu bivua bienzeka abi. Kudilabaye bilabu pa makiki, kudilengejaye bimpe. Yehu ufika mu Yizreyele, Yezabele kuimana ku dididishi, mutangile Yehu.

³¹ Anu Yehu ubuela ku tshiibi tshia mu tshimenga, Yezabele kumukonka ne: — Yehu, malu kaayi? Wewe udi muntu tshianana, mufuanangane ne Zimri, uvua mushipe mukalenga wende.

³² Yehu ubanduluka, utangila ku dididishi, kuelaye diyi ne: — Kunudi aku, udi musue kutua ku tshianyi nnganyi? Bantu babidi anyi basatu ba mu nzubu wa bukalenga kuinangila pa dididishi.

³³ Yehu kubela diyi ne: — Sakilayi mukaji awu panshi! Kusakilabu Yezabele pa dididishi. Kudishindaye panshi. Mashi ende kutampakana ku bimana ne ku nyama ya tubalu. Yehu kudiatakaja tshitalu atshi ne ditempu.

³⁴ Yehu kubuela mu nzubu wa bukalenga. Kumupeshabu biakudia, kudiaye, kunuaye. Pashishe kuambilaye bantu bavuaye nabu ne: — Jiikayi tshitalu tshia mukaji muena tshibawu ewu, bualu uvua anu muana wa mukalenga.

³⁵ Kupatukabu bua kuya kujiika tshitalu tshia Yezabele. Kadi, kusanganabu anu kabalubalu ka mutu, bianza ne makasa.

³⁶ Kupinganabu bua kumanyisha Yehu. Yehu kukema, wamba ne: — Eyowa, ke diyi dia Maweja-Nangila divua muambi Eliya, muena Tishebe, muambe ne: “Mbua neidie tshitalu tshia Yezabele mu budimi bua Yizreyele.

³⁷ Minyinyi ya Yezabele ikale mishale, nebayimiamine mu budimi ebu bu bufuke buela panshi. Nanku, muntu kakumanya kabidi ne ewu ke Yezabele to!”