2 Bakalenga 8 - MUKANDA WA MYIDI MUKULU

Elisha udi wambuluisha mukaji wa mu Shuneme tshiakabidi

¹ Dituku dikuabu, muambi Elisha kuambila mukaji, muena muana uvuaye mubishe ku lufu, ne: — Umuka munemu ne bena nzubu webe, nuye kusomba muaba unudi basue. Bualu Maweja-Nangila mmusue kutuma tshiyole tshia nzala mu ditunga dia bena Izrayele. Tshiyole atshi, tshikadi tshituadija anu mpindiewu. Netshinenge bidimu muanda mutekete.

² Mukaji awu kukumbaja bionsu bivua muambi mumuambile. Diakamue kuyaye ne bena nzubu wende mu ditunga dia bena Peleshete, kusombamu bidimu muanda mutekete.

³ Bidimu muanda mutekete bimane kukumbana, mukaji kumuka ne bena nzubu wende mu ditunga dia bena Peleshete. Ufika mu ditunga diabu, kuyaye kudi mukalenga wa bena Izrayele bua kulomba lupangu luende ne nzubu wende.

⁴ Tshikondu atshi, mukalenga wa bena Izrayele uvua uyukila ne Ngeyazi, muena mudimu wa muambi Elisha. Uvua umukonka bishima bionsu bivua muambi Elisha muenze.

⁵ Ngeyazi uvua umulondela muvua muambi Elisha mubishe muana ku lulu. Amu diba adi, mamuende wa muana awu kufika bua kulomba lupangu luende ne nzubu wende kudi mukalenga wa bena Izrayele. Nanku Ngeyazi kukema, wamba ne: — Mukalenga, mona, ke mukaji ewu muena muana uvua muambi Elisha mubishe ku lufu.

⁶ Mukalenga wa bena Izrayele kukonka mukaji. Mukaji kumulondela bualu bujima. Diakamue, mukalenga wa bena Izrayele kuambila muntu mukuabu wa ku bantu bende, uvuaye wenda nende miaba yonsu, bua atangile tshilumbu tshia mukaji awu. Mukalenga kuamba ne: — Ndi musue bua bamupingajile bintu biende bionsu. Kabidi bamufute bua bintu bionsu bivuabu banowa mu budimi buende, katshia umuka mu ditunga dietu too ne mpindiewu.

Elisha ne Azayele

⁷ Tshikondu tshikuabu, muambi Elisha kuya mu tshimenga tshia Damase. Benadade, mukalenga wa bena Siriya, uvua usama. Benadade umvua ne: muambi Elisha mmufike mu tshimenga,

⁸ kuambilaye Azayele ne: — Angata tshintu tshia disanka, uye kupesha muambi Elisha. Pashishe umuambile bua akonke Maweja-Nangila bua disama dindi nadi edi ne didi mua kujika.

⁹ Azayele kuya kumonangana ne muambi Elisha. Uvua mutuadile muambi bintu bimpe bia disanka bia mu Damase, biambula kudi nyama ya tumelu makumi anayi. Azayele ufika kudi muambi Elisha, kumuambila ne: — Muena mudimu webe Benadade, mukalenga wa bena Siriya ke udi muntume ewu. Uvua mungambile bua kukukonka bua disama diende ne didi mua kujika?

¹⁰ Muambi Elisha kuandamuna ne: — Uye kumuambila ne: bulelela, disama diende nedijike. Kadi Maweja-Nangila udi mumane kundeja ne: neafue bulelela.

¹¹ Diakamue, muambi Elisha kulengama, mpala wende kubinduluka. Kutuadijaye kudila.

¹² Azayele kumukonka ne: — Muambi udi udila bua tshinyi? Muambi Elisha kuandamuna ne: — Ndi ndila bualu nkadi mumanye ne: neukengeshe bena Izrayele bikole. Newoshe bimenga biabu bidi bibaka ne bimana bikole. Neukose nsongalume yonsu muminu, uzaza bana bakese, upanda mafu a bakaji badi bimite.

¹³ Azayele kumukonka ne: — Meme tshiena mukalenga, kadi ndi mua kuenza bionsu ebi mushindu kaayi? Muambi Elisha kuandamuna ne: — Maweja-Nangila udi undeja ne: wewe newikale mukalenga wa bena Siriya.

¹⁴ Azayele kumuka kudi muambi Elisha, kupingana kudi mfumuende Benadade, kumukonka ne: — Muambi wakuambidi tshinyi? Azayele kuandamuna ne: — Wanjadikidi ne: disama diebe nedijike kamuyi mpata.

¹⁵ Kadi butshia dinda, Azayele kuangata tshilamba tshia pa bulalu, kutshitua mu mayi, kutshibuikila Benadade pa mpala bua kumuenzatshi tshipuidiji. Nanku, mukalenga Benadade kufua. Azayele kumupingana mu bukalenga.

Yorame, mukalenga wa Yuda

¹⁶ Mu tshidimu tshitanu tshivua Yorame, muana wa Akabe mu bukalenga mu bena Izrayele, Yorame, muana wa Yosafate, kubuela mu bukalenga bua bena Yuda.

¹⁷ Yorame, muana wa Yosafate, uvua ne bidimu makumi asatu ne bibidi. Uvua mushale mu bukalenga mu Yerushalayime bidimu muanda mukulu.

¹⁸ Kadi, kuenzaye anu buenzayi bu muvua bakalenga bonsu ba bena Izrayele benza, — kabidi anu bu muvua bena nzubu wa Akabe benza, bualu Yorame uvua musele muana wa Akabe. — Nanku, Yorame kuenza bidi Maweja-Nangila ubenga.

¹⁹ Kadi Maweja-Nangila kavua musue kubutula bukalenga bua Yuda to. Bualu uvua mulaye muntu wende Davide ne: ndelanganyi yende neishale mu bukalenga mu Yerushalayime kashidi.

²⁰ Pavua Yorame mu bukalenga, bena Edome kutombokela bena Yuda. Kudisunguilabu wabu mukalenga.

²¹ Nanku, Yorame kuya ku Sayire ne matempu ende a mvita onsu. Kadi mundankulu mua butuku, mukalenga Yorame ne balombodi ba matempu ende a mvita, kudipandila njila munkatshi mua bena Edome bavua babanyungulula, kusambuka. Bena mvita ba bena Yuda kunyema, kuya kuabu.

²² Biangatshile tshikondu atshi, bena Edome kabavua kabidi ku bumfumu bua bena Yuda to. Bena tshimenga tshia Libna kutomboka kabidi anu tshikondu atshi.

²³ Malu makuabu a Yorame, mbaafunde mu mukanda udibu babikila ne: Malu adi bakalenga ba bena Yuda benza.

²⁴ Yorame mumane kufua, kumujikabu mu lukita lua bena diku diabu luvua mu Tshimenga tshia Davide. Muanende wa balume Akaziya kumupingana mu bukalenga.

Akaziya, mukalenga wa bena Yuda

²⁵ Mu tshidimu tshia dikumi ne tshibidi tshivua Yorame, muana wa balume wa Akabe, mu bukalenga bua bena Izrayele, Akaziya, muana wa Yorame, kudia bukalenga mu Yuda.

²⁶ Akaziya uvua ne bidimu makumi abidi ne bibidi. Uvua mushale tshidimu tshijima mu bukalenga mu Yerushalayime. Dina dia mamuende divua Ataliya. Ataliya uvua wa mu diku dia Omri, mukalenga wa bena Izrayele.

²⁷ Akaziya uvua muenze buenzayi anu bu muvua bena diku dia Akabe benza. Uvua wenza bidi Maweja-Nangila ubenga, anu muvuabu benza kudi baku bende bena diku dia Akabe.

²⁸ Yorame, muana wa Akabe, ne Akaziya mukalenga wa bena Yuda, kuya mu tshimenga tshia Ramote, mu ditunga dia Ngilaade, bua kuluisha Azayele, mukalenga wa bena Siriya. Mu mvita, bena Siriya kutapa mukalenga Yorame mputa.

²⁹ Mukalenga Akaziya kuya mu tshimenga atshi tshia Yizreyele bua kusamba Yorame, bualu uvua usama bikole.