2 Bakalenga 7 - MUKANDA WA MYIDI MUKULU

¹ Muambi Elisha kuandamuna ne: — Telejayi bonsu! Maweja-Nangila udi wamba ne: “Malaba pa diba ditudi edi, mu tshisalu tshia mu Samariya, bantu nebasumbishangane kilo ya bukula dikumi ne ibidi, nansha kilo ya ntete ya oije makumi abidi ne inayi, anu ku lukanu lumue lua tshiamu tshitoke tshia mushinga mukole.”

² Kadi muntu uvua wenda ne mukalenga, kubenga, wamba ne: — Nansha Maweja-Nangila mutunzuluile biibi biamu diulu bua kututumina ntete, bualu buudi wamba abu budi mua kuenzeka anyi? Muambi Elisha kuandamuna ne: — Eyowa, wewe neumone bualu ebu. Kadi kuakudi a bintu ebi to.

Bena Siriya badi banyema, bashiya mitanda yabu

³ Bena nsudi banayi bavua pambelu ku tshiibi tshinene tshia tshimenga, kuambilanganabu ne: — Tudi basombe muaba ewu bindila lufu bua tshinyi?

⁴ Tuetu baye mu tshimenga tudi mua kufua, bualu kamuena biakudia kabidi to. Kabidi nansha tuetu bashale muaba ewu tudi anu mua kufua! Nanku, tuyayi mu mitanda ya bena Siriya, tuye kudilambula kudibu. Padibu batulekela ne muoyi bidi bimpe. Kadi padibu basue kutushipa, netufue!

⁵ Nanku dilolu, bena nsudi abu kuya mu mitanda ya bena Siriya. Bobu kufika ku tshibuelelu tshia mu mitanda, kabena basangana muntu to.

⁶ Bena Siriya bavua mu mitanda, Maweja-Nangila uvua mumane ibatshinyisha ne mutoyi mukole wa bena mvita, bikale ne nyama ya tubalu ne matempu a mvita. Ke bena Siriya kuambilangana ne: “Yorame, mukalenga wa bena Izrayele, mmumane kufuta bakalenga ba bena Iti ne ba bena Ejipitu bua batume bena mvita babu bua kutuluisha.”

⁷ Nanku, butuku, bena Siriya kunyema bua kudisungidila, kushiya mitanda yabu ne bintu biabu bionsu, ntenta, nyama ya tubalu ne mpunde.

⁸ Ke bena nsudi banayi abu kufika ku tshibuelelu tshia mitanda ya bena Siriya, kubuela mu ntenta, kudia, kunua bintu bionsu bivuabu basangana. Pashishe, kuangatabu tshiamu tshitoke tshia mushinga mukole, tshiamu tshia mpawungi ne bilamba, kuyabu kubisokoka muaba mukuabu. Pashishe kubuelabu mu ntenta mukuabu, kuangata kabidi bintu bishilangane bivuamu, kuya kubisokoka.

Bena mvita bumuke, tshiyole tshijike mu tshimenga

⁹ Kadi bena nsudi banayi abu kuambilangana ne: — Bitudi tuenza ebi kabiena bimpe to. Lelu tudi bapeta bualu bua disanka. Katuena mua kushala bapuwa to. Tuetu bindile too ne patshia butuku bua kuamba bualu ebu, bulelela Mvidi Mukulu udi mua kutunyoka. Nanku, tuyayi kuambila badi mu nzubu wa mukalenga bualu ebu.

¹⁰ Nanku, kupinganabu mu tshimenga, kubikila batentekedi bavua balame tshiibi tshinene, babambila ne: — Tuvua baye mu mitanda ya bena Siriya, katuena basanganamu muntu to. Kabidi katuena bumvue nansha diyi dia muntu. Tudi basangana anu nyama ya tubalu ne ya mpunde misuike. Tudi basangana kabidi ne ntenta ivuabu balekele.

¹¹ Diakamue, batentekedi kubikila muntu, kumumanyisha bualu abu, bua aye kuambila bantu bavua mu nzubu wa bukalenga.

¹² Mukalenga wa bena Izrayele kubika mundankulu, kuambila balombodi ba bukalenga buende ne: — Ndi musue kunumvuija meji mabi adi bena Siriya babielela! Bena Siriya mbamanye ne: tudi ne nzala. Nanku mbumuke mu mitanda yabu, baye kusokoma mu tshisuku. Badi bela meji ne: tuetu bena Izrayele netupatuke mu Samariya. Diba adi, bobu nebabakuate ne muoyi, nebabuele mu tshimenga tshietu.

¹³ Mulombodi mukuabu wa mu bukalenga, kupesha mukalenga Yorame meji, umuambila ne: — Tuangate nyama yetu ya tubalu itanu itshidi ne muoyi, (nyama ayi ikadi pa kufua, bu mudi bantu ba mu tshimenga). Tutume bantu bakuabu baye ne nyama ayi bua tumone tshidi mua kuenzeka.

¹⁴ Nanku, mukalenga Yorame kusuika nyama ya tubalu ku matempu a mvita abidi. Kutumaye bena mvita bende nawu bua kukeba bena mvita ba bena Siriya, kabidi bua kujadika bivua mua kuenzeka.

¹⁵ Bena mvita ba bena Izrayele, kulondakaja bena mvita ba bena Siriya too ne ku musulu wa Yardene. Mu njila muonsu amu, bena mvita ba bena Izrayele kusangana bilamba bia bungi ne bintu bikuabu bivua bena Siriya benda bimansha, bua kumona mua kunyema lukasa. Nanku bantu bavuabu batume, kupingana bua kumanyisha mukalenga wa bena Izrayele bionsu abi.

¹⁶ Diakamue bena Samariya kuya kupawula bintu mu mitanda ivua bena Siriya balekela. Nanku bu muvua Maweja-Nangila mumane kuamba, bantu kusumbishangana kilo ya bukula dikumi ne ibidi, nansha kilo ya orje makumi abidi ne inayi, anu ku lukanu lumue lua tshiamu tshitoke tshia mushinga mukole.

¹⁷ Mukalenga Yorame kutuma muntu uvuaye wenda nende miaba yonsu, bua aye kumona bivua bienzeka mu tshisalu, ku tshiibi tshia tshimenga. Kadi bantu bavua bunguile muaba awu, kudiata muntu awu, kufuaye bu muvua muambi Elisha muambe pavua mukalenga wa bena Izrayele mufike bua kumonangana nende.

¹⁸ Muambi Elisha uvua mumane kuambila mukalenga wa bena Izrayele ne: “Malaba pa diba ditudi edi, mu tshisalu tshia mu Samariya, bantu nebasumbishangane kilo ya bukula dikumi ne ibidi, nansha kilo ya ntete ya oije makumi abidi ne inayi, anu ku lukanu lumue lua tshiamu tshitoke tshia mushinga mukole.”

¹⁹ Muntu uvua wenda miaba yonsu ne mukalenga wa bena Izrayele uvua mubenge, wamba ne: “Nansha Maweja-Nangila mutunzuluile biibi bia mu diulu bua kututumina ntete, bualu buudi wamba ebu budi mua kuenzeka anyi?” Nanku, muambi Elisha uvua mumuandamune ne: “Eyowa, wewe neumone bualu ebu. Kadi kuakudia bintu abi to.”

²⁰ Bionsu abi kuenzeka: bantu bavua bunguila ku tshiibi tshia ku tshimenga, kudiatakaja muntu uvua wenda miaba yonsu ne mukalenga wa bena Izrayele, muntu awu kufua.