2 Bakalenga 3 - MUKANDA WA MYIDI MUKULU

Yorame, mukalenga wa bena Izrayele

¹ Yorame, muana wa Akabe, uvua mubuele mu bukalenga bua Izrayele mu tshidimu tshia dikumi ne muanda mukulu, tshivua Yosafate mu bukalenga bua bena Yuda. Yorame kushala mu bukalenga mu tshimenga tshia Samariya bidimu dikumi ne bibidi.

^2-3 Uvua muenze malu mabi avua Maweja-Nangila mubenge. Uvua mufikishe bena Izrayele ku dienza bibi, anu bu muvua Yerobowame, muana wa Nebate, muenze. Uvua anu wenza malu mabi onsu avua Yerobowame muenze. Kadi, Yorame kavua wenza bibi bipite, bu mumve tatuende ne mamuende benza to. Bualu uvua munyangakaje dikunji dia kutendelela mvidie Baale di wa tatuende Akabe muashile mvidie awu.

Badi baluisha ditunga dia Mowabe

⁴ Mesha, mukalenga wa bena Mowabe, uvua mumunyi wa mikoku. Ku tshidimu tshionsu, uvua ne bua kulambula mukalenga wa bena Izrayele, bana ba mikoku binunu lukama, ne mikoku binunu lukama kabiyi bikosa miosa to.

⁵ Kadi, mukalenga Akabe mumane kufua, Mesha kutombokela Yorame uvua mupingane Akabe mu bukalenga.

⁶ Nanku, Yorame kumuka mu Samariya, bua kubandila bena mvita ba bena Izrayele bonsu.

⁷ Pashishe, kutumaye bantu bua kuambila Yesafate, mukalenga wa bena Yuda, ne: “Mukalenga wa bena Mowabe mmuntombokele. Tudi mua kuya nebe bua kuluisha ditunga diende anyi?” Yosafate, mukalenga wa bena Yuda, kuandamuna ne: “Ndi muanyishe. Wewe ne meme tudi bantu bamue. Bantu bebe mbanyi meme. Bantu banyi mbebe wewe. Nyama yebe ya tubalu nyanyi meme. Nyama yanyi ya tubalu nyebe wewe.”

⁸ Kadi, Yosafate kukonka Yorame ne: “Netuyile njila kaayi?” Yorame kuandamuna ne: “Netuyile mu tshipela tshia Edome.”

⁹ Bakalenga aba, wa bena Izrayele, wa bena Yuda, ne wa bena Edome kutuadija luendu. Bobu bamane kuenda matuku muanda mutekete, kabena bapeta kabidi mayi bua bena mvita kunuabu, nansha bua kunuisha nyama ivuabu nayi to.

¹⁰ Nanku, mukalenga wa bena Izrayele kuela lubila ne: — Diakabi! Maweja-Nangila ke udi mututume tuetu bonsu bakalenga basatu muaba ewu, bua kutufikisha mu bianza bia bena Mowabe!

¹¹ Kadi, Yosafate kukonka ne: — Muaba ewu, kakuena muambi udi mua kutuebejila malu kudi Maweja-Nangila anyi? Mulombodi wa bena mvita ba mukalenga wa bena Izrayele kuandamuna ne: — Tudi ne Elisha, muana wa Shafate. Yeye uvua wambuluisha muambi Eliya bikole.

¹² Yosafate kuandamuna ne: — Eyowa, mbimpe! Muntu awu, neatumanyishe tshidi Maweja-Nangila musue kutuambila. Diakamue, bakalenga aba, wa bena Izrayele, wa bena Yuda ne wa bena Edome, kuya kumonangana ne Elisha.

¹³ Muambi Elisha kukonka mukalenga wa bena Izrayele ne: — Udi mulue kumatshisha bua tshinyi? Udi mua kuya kuebeja malu kudi bambi ba tatuebe, nansha bambi ba mamuebe! Mukalenga wa bena Izrayele kubenga ne: — Nansha! Tuetu bakalenga basatu, Maweja-Nangila ke udi mututume muaba ewu, bua kutufila mu bianza bia bena Mowabe.

¹⁴ Elisha kubambila kabidi ne: — Bu mudi Maweja-Nangila Mvidi Mukulu wa bukole buonsu, undi ngenzela mudimu ne muoyi, ndi nnuandamuna anu, bualu ndi nnemeka Yosafate mukalenga wa bena Yuda. Bu meme tshiyi nnemeka Yosafate, tshivua mua kukuteleja, nansha kukutangila mene to.

¹⁵ Mpindiewu, nufike kundi ne muimbi wa tshisanji. Muimbi wa tshisanji utuadija kuimba, bukole bua Maweja-Nangila kutulukila Elisha.

¹⁶ Elisha kutuadija kuakula, wamba ne: — Meme Maweja-Nangila ndi ngamba ne: “Imbayi biina bia bungi mu musulu udi muume,

¹⁷ bualu meme Maweja-Nangila ndi njadika ne: Tshibandabanda etshi netshiwule mayi tente. Kanuakumvua lupepela to. Kanuakumona mvula to. Kadi, nenupete mayi a kunua, nuenu, bimuna bienu, ne nyama mikuabu inudi nayi.”

¹⁸ Kadi, bualu ebu mbualu bukese kudi Maweja-Nangila. Yeye neafile kabidi ditunga dia bena Mowabe mu bianza bienu.

¹⁹ Nenubutule bimenga bimpe bionsu bivuabu bakolesha ne bimana. Nenupule mitshi ya bimuma yonsu. Nenujibikile mpokolu ya mayi yonsu. Kabidi nenunyangakaje madimi onsu adibu badime, nenuimanshemu mabue.

²⁰ Butshia dinda, diba dia kulambula milambu, kumonabu mayi afumina mu ditunga dia Edome, kuwujawu buloba.

²¹ Bena Mowabe kupeta lumu lua difika dia bakalenga basatu bua kubaluisha. Nanku, kusangishabu bantu bonsu batshivua ne bukole bua kuambula bia mvita. Kubatekabu ku mikalu ya ditunga.

²² Mu dinda, bena mvita ba bena Mowabe babike ku tulu, kumonabu nkenke ya diba imueneka mu mayi. Mayi awu, avua amueneka pa bule bu mashi.

²³ Nanku bena Mowabe kuela mbila ne: — Eyi, mmashi! Bulelela, bakalenga abu ne bena mvita badibu nabu, ke bavua basangane, bashipangane nkayabu. Bena Mowabe jukayi, tuye kupawula!

²⁴ Kadi, bena Mowabe bamane kufika pabuipi ne mitanda ya bena Izrayele, ke bena Izrayele kujuka, kubaluisha. Nanku, bena Mowabe kunyema. Bena Izrayele kubalondakaja, kubuela mu buloba bua bena Mowabe. Kubutulabu bena Mowabe bapite bungi.

²⁵ Kunyangakajabu bimenga. Yonsu wa kudibu kuimansha dibue mu madimi avua bena Mowabe badime, too ne pavua mabue mapite bungi mu madimi onsu. Kujibikilabu mpokolu yonsu, kupulabu mitshi ya bimuma yonsu. Anu tshimenga tshia Kirerese ke tshivua tshishale kabayi batshinyanga to. Kadi, bena mvita bavua ne ndundu ya kuela nayi nsoka, kunyungululabu tshimenga atshi, kutshiluisha.

²⁶ Mukalenga wa bena Mowabe, kumona ne: mvita ayi mmipite bukole. Nanku kusangishaye bena mvita bende nkama muanda mutekete bavua ne miela. Kuidikijabu mua kupanda njila bua kufikabu kudi mukalenga wa bena Edome. Kadi kakuvua mushindu to.

²⁷ Ke mukalenga wa bena Mowabe, kubikidisha muanende wa balume muanabute, uvua mua kumupingana mu bukalenga. Kumulambulaye pa tshimana tshia tshimenga atshi bu mulambu wa kuosha. Bena Izrayele bamone nanku, kutshinabu bikole. Kumukabu muaba awu, kupingana kuabu.