2 Bakalenga 25 - MUKANDA WA MYIDI MUKULU

¹ Ke Nebukadnesare kufika mu Yerushalayime ne bena mvita bende bonsu. Kuasaye mitanda yende kumpala kua tshimenga. Bena Babilone kunyungulula tshimenga atshi ne mishiki ya maloba. Bualu ebu buvua buenzeka mu matuku dikumi a ngondu wa dikumi, Sedekiya mumane kulala mu bukalenga bidimu tshitema.

² Kushalabu baluisha tshimenga atshi too ne tshidimu tshia dikumi ne tshimue, tshivua Sedekiya mu bukalenga.

³ Tshiyole tshivua tshipite bukole mu tshimenga, bantu kabatshivua ne biakudia to. Mu matuku tshitema a ngondu muinayi,

⁴ bena Babilone kupula tshitupa tshia tshimana tshia tshimenga. Butuku, bena mvita ba bena Yuda kunyema. Bena Babilone bavua anu banyungulula Yerushalayime. Kadi, bena mvita ba bena Yuda kuyila mu njila, bapitshila pa tshiibi tshivua pankatshi pa bimana bibidi bia tshimenga, pabuipi ne lupangu lua mukalenga. Diba adi, mukalenga Sedekiya uvua mulonde njila wa ku tshibandabanda tshia musulu wa Yardene.

⁵ Kadi, bena mvita ba bena Babilone kumulondakaja, kumukuatshila mu mpata wa Yeriko. Bena mvita bende bonsu bavua bamane kunyema bamushiya.

⁶ Bena Babilone kumukuata, kuya nende kudi mukalenga wa bena Babilone uvua mu tshimenga tshia Ribla. Bena Babilone kulumbuluisha Sedekiya mu tshimenga atshi.

⁷ Kushipabu bana ba Sedekiya ba balume, tatuabu mutangile. Pashishe, Nebukadnesare kutonkona mesu a Sedekiya onsu abidi. Kumutumaye ku Babilone musuike mionji bikole.

Badi bakuata Yerushalayime baya ne bantu musangu muibidi

⁸ Nebukadnesare, mukalenga wa bena Babilone, mumane kulala mu bukalenga bidimu dikumi ne tshitema, mu matuku muanda mutekete a ngondu muitanu, Nebuzaradane kubuela mu Yerushalayime. Uvua mfumu wa bena mvita bonsu bavua balame mukalenga. Uvua mulombodi munene wa bena mvita ba mukalenga wa Babilone.

⁹ Nebuzaradane kuosha nzubu wa Mvidi Mukulu, nzubu wa bukalenga, ne nzubu mikuabu ya mu tshimenga, nangananga nzubu yonsu ya bantu bamanyike bikole.

¹⁰ Bena mvita ba bena Babilone, bavua ne mfumu wa bena mvita, kupulabu bimana bivua binyunguluke Yerushalayime.

¹¹ Pashishe, bantu bonsu bavua bashala mu Yerushalayime, Nebuzaradane kuya nabu ku Babilone: bonsu kudifila kudi mukalenga wa bena Babilone, kabidi ne bena midimu ya bianza, batshivua bashale.

¹² Kadi uvua mushiye bakuabu bantu bapele, bua kukunabu mionji ya mvinyo, ne kudima madimi.

¹³ Bena Babilone bavua bupule makunji a tshiamu tshikunze avua mu mushiku wa nzubu wa Mvidi Mukulu. Bavua banyangakaja kabidi matempu, ne dilonga dinene dia tshijengu dia tshiamu tshikunze, bivua mu lubanza lua nzubu wa Mvidi Mukulu. Kuyabu ne tshiamu tshikunze tshionsu atshi ku Babilone.

¹⁴ Kuangatabu kabidi bintu bia tshiamu tshikunze bionsu, bivuabu benza nabi mudimu wa nzubu wa Mvidi Mukulu: ngesu ya kuela butu, bikasu, bintu bia kusukula nabi miendu, ne makopu.

¹⁵ Nebuzaradane kuangata kabidi bintu bionsu bia tshiamu tshia mpawungi, ne bia tshiamu tshitoke tshia mushinga mukole: mbabula, ne makopu a kumiamina nawu.

¹⁶ Kakuvua mushindu wa kupima bintu bionsu bia tshiamu tshikunze, bivua bifuma ku bintu bivua mukalenga Shelomu muenzeje bua kuteka mu nzubu wa Mvidi Mukulu. Bintu abi bivua: makunji abidi, dilonga dinene dia tshijengu, ne matempu.

¹⁷ Tshilejilu, dikunji dionsu divua ne metre tshitema mu butumbuke. Mutu wa dikunji dionsu uvua wa tshiamu tshikunze, muikale ne metre umue ne tshitupa mu butumbuke. Kabidi kuvua bilengejilu bifuanangane ne bukondu bua tshiamu tshikunze, binyunguluke mutu wa dikunji adi. Kuvua kabidi bilengejilu bikuabu bia tshiamu tshikunze bifuanangane ne bimuma bia mutshi wa grenade. Makunji onsu abidi ne makondu avuaku bivua amu mushindu umue.

¹⁸ Mfumu wa bena mvita bavua balama mukalenga wa bena Babilone, kukuatshisha Seraya, mutuangaji munene, ne Sefanya tshindonde tshiende, ne batuangaji bakuabu basatu, bavua balame ku mushiku wa nzubu wa Mvidi Mukulu.

¹⁹ Kukuatshishaye kabidi muena mudimu mukuabu, uvua utangila bena mvita bonsu. Pashishe, kukuatshishaye mu lukanu bantu batanu bavua benza mudimu mu lubanza lua mukalenga, ne mufundi wa malu a mukalenga uvua wangata bena mvita ku mudimu, (uvua mfumu wa bena mvita), ne bantu bakuabu makumi asambombu ba bena Yuda. Bantu bonsu aba, batshivua bashala anu mu Yerushalayime.

²⁰ Nebuzaradane kuya nabu mu tshimenga tshia Ribla kudi mukalenga wa bena Babilone.

²¹ Mukalenga wa bena Babilone kubashipela mu tshimenga atshi, mu ditunga dia Amate. Ke muvuabu bumuke ne bena Yuda mu buloba buabu, nanku baye nabu mu bupika.

Ngedaliya udi ulombola ditunga dia Yuda

²² Nebukadnesare, mukalenga wa bena Babilone, uvua mushiye bantu bakuabu mu ditunga dia bena Yuda. Kusungulaye muntu mukuabu Ngedaliya, muana wa Ahikame, muikulu wa Shafane, bua kuikalaye mulombodi wa ditunga dia bantu abu.

²³ Balombodi ba bena mvita ne bena mvita ba bena Yuda bavua kabayi baye ne bena Babilone, bumwa ne: mukalenga Nebukadnesare mmusungule Ngedaliya bua kuikalaye mulombodi wa ditunga, kuyabu kumonangana ne Ngedaliya ku Mispa. Balombodi bavua baye bavua Ismayele, muana wa Netaniya, Yowanane, muana wa Kareya, Seraya, muana wa Tanehumete, wa mu musoku wa Netofa, ne Yazaniya, muena Maaka.

²⁴ Ngedaliya kubambila bonsu ne: — Ndi nnulaya ne: bena Babilone kabakunuenzela bibi to. Asayi mu ditunga, nuitabe amu bumfumu bua mukalenga wa bena Babilone. Nenusanke.

²⁵ Kadi, mu ngondu wa muanda mutekete wa tshidimu atshi, Ismayele, muana wa Netaniya, muikulu wa Elishama, wa mu diku dia bukalenga, kufika ku Mispa ne bantu dikumi. Kushipabu Ngedaliya, ne bena Yuda bakuabu, ne bena Babilone bavua ku nzubu kuende.

²⁶ Pashishe, bantu bonsu ne balombodi ba bena m vita, kuyabu ku Ejipitu, bualu bavua batshina bena Babilone.

Mukalenga wa bena Babilone udi ufuila Yowakine luse

²⁷ Yowakine, mukalenga wa bena Yuda, mumane kulala mu bupika bidimu makumi asatu ne muanda mutekete, Evile-Merodake, kudia bukalenga mu Babilone. Mu matuku makumi abidi ne muanda mukulu a ngondu wa dikumi ne muibidi, tshidimu atshi, Evile-Merodake kufuila Yowakine luse, kumupatula mu nzubu wa lukanu.

²⁸ Kuambilaye Yowakine malu ne muoyi muimpe onso, kumutekaye mu muanzu uvua mupite wa bakalenga bakuabu bavua nende mu Babilone.

²⁹ Kukandikabu Yowakine bua kavuadi kabidi bilamba bia bena lukanu to. Nanku, Yowakine kutuadija kudia ku mesa ne mukalenga wa bena Babilone.

³⁰ Dituku dionsu too ne mudi Yowakine ufua, mukalenga wa bena Babilone uvua anu umupesha biakudia bikumbane.